الكاربون فايبر على التابلوة ؟؟؟

**mido_soliman** · 12-04-2011 12:38 PM

معلش انا كنت عايز اسال السوال دة بس مش عارف حد حيضحك عليا ولا اية ؟
انا شوفت الاستيكر الكاربون فايبر اللى بيتلزق على الكبوت وبصراحة شكلة خرافة ومضلع كدة وتحس انة فخم اوى
عموما انا فكرت بما انى مقدرش الزقة على الكبوت لان عربيتى زرقا وبالتالى مش حخلص من المخالفات
قلت اسال هوة الكاربون دة ممكن يتكسى او يتلزق بية طابلوة العربية ولا لاء ؟
وهل بيتعمل باتقان مع انحناءات التابلوة ولا بيبان انة ملزوق ؟
والسؤال الاخير لما يتشال الكاربون دة بيكون بوظ التابلوة تحتية وسايب اثار اللزق ولا بيشال عادى ومين احسن واحد ممكن يعمل الكلام دة اذا كان بيتعمل اساسا
شكرا جدا واسف على الازعاج

**MohssenRashed** · 12-04-2011 12:50 PM

انا عندي واحد صاحبي عمله بس الصنايعي كان وحش و مش مظبط فاشكل التبلوه كان وحش اوي. بس لو اتعم صح شكلو هيبقى تحفة.

بالنسبة انة يسيب اثار لو اتشال بصراحه معرفش

**mido_soliman** · 12-04-2011 12:55 PM

شكرا جدا يباشا وفى انتظار باقى الاراء والخبرات

**eldell** · 12-04-2011 01:19 PM

شوفت واحد كان بيعملها فى سيراتو كان شكلها تحفه بجد بس المهم يكون فعلا صنيعى عشان يشد الكالابون كويس ويبان انها نازله كده

**a7madramadan** · 12-04-2011 01:54 PM

انا مش عارف الخامة بتاعة التابلوه او الجزء من التابلوه الي هتركب عليه الاستيكر بس هأقولك على معلومات عامة

السطح لو جلد وقابل للإنضغاط (تحته فوم او سفنج) انسى ... علشان مش هيركب كويس والــ Heat Gun مش هيتعمل كويس وهيتكرمش خالص والنتيجة غير مضمونة

السطح لو صلب ومغطى بجلد (يعنى ملمس جلد وغير قابل للانضغاط) هيركب بشكل متوسط ولا ينصح بيه لو الجلد الــ Details بتاعته غارزة قوي يعنى لو جلد خشن او باين باللمس تفاصيله بلاش

السطح لو بلاستيكي صلب و ناعم تماما .... ده يركب عليه زي الفل طبعا ويستحسن تفكه من التابلوه او الكونصول او ايا كان المكان الي راكب فيه ويتلزق عليه باستخدام Heat Gun هيبقى شكله خرافة (طبعا مع مراعاة الألوان لباقي مكونات المقصورة الداخلية)

لو السطح بلاستيكي صلب وغير قابل للانضغاط و عليه شكل تفاصيل الجلد لا انصح بالتركيب لإن التركيب لا رجعة فيه ... بس في حل لو لابد التركيب ... يتفك ويتصنفر مرة بصنفرة خشنة ومرة بناعمة خالص بالمياه .... ويترش أي نوع بوية Glossy عند اي حد بتاع دوكو عالسريع مش هياخد فلوس كتير لإنه هيرش من بقايا البوية الي عنده او حتى ممكن تجيب اسبراي دوكو أي لون ... هيحول السطح لناعم وأملس و تلزق عليه عادي ويستخدم Heat Gun لنتيجة أفضل

ولإزالة الستيكر بدون بقايا ... تشيل طرف رفيع من الستيكر و ترش WD-40 و تسحب و تشد مع استمرار الرش رشات صغيرة وفالآخر تسمح وترش تاني وتمسح آخر البقايا وبعدين بقطنة عليها كحول تمسح بيها كويس علشان تشيل الأثر الزيتي الطفيف للــ WD-40 ....

أتمنى أكون أفدتك و أي إستفسارات أخرى انا فالخدمة