تنتيشة تنتيشة.... هتجنن !!!

**amazingahmed** · 13-04-2011 05:51 PM

السلام عليكم يا أصدقاء. عندي شكوى مجنناني و بقالي فترة مش عارف أحلها.

1- موديل السياره وسنة الصنع (دايو ماتيز 99)
2-عدد الكيلومترات المقطوعه 120,000
3-موقف أستهلاك الزيت ( عادي)
4-شكل العادم الخارج من الشكمان (عادى)
5-موقف البوجيهات وأسلاكها وهل تم عمل أختبار لقوة الشراره للبوجيهات الأربعه (مغيرها من 10,000 كيلو)
6-موقف الفلاتر (هواء - بنزين - زيت) مغير كله من 10,000 كيلو و الزيت لسة مغيره
7-موقف أستهلاك البنزين (جميل)
8- موقف الشكمان (سالك وتمام )
9- موقف الفرامل (كويسه )
10-موقف السيور ( كاتينه - تكييف - دينامو ).....مغير كله من 10,000 كيلو
11-موقف البطاريه والدينامو من ناحية الفولت والأمبير (مكشفتش بس كل حاجة شكلها طبيعي)
12-مصدر الصوت فى حالة ظهور أصوات من عند المحرك ومكانه بالضبط (لا يوجد صوت غريب)
13- موقف آخر صيانه أتعملت ....وهل العيب المطروح ظهر بعدها ولا كان موجود من قبلها ....لأن دى نقطه مهمه جدا (العيب من سنة و نصف و ظهر فجأة)

العيب اللي عندي أن العربية كانت بدأت تنتش سواء علي السلانسيه أو و أنا دايس بنزين. و بعدين لمبة التشك نورت و التنتيشة زادت كتير. رحت عند محمد السيد الكهربائي و كشف عليها و ظبت الاسبراتير و لقى أن حساس الIAT بتاع فلتر الهواء سلكته مهزوزة فصلحها و لمبة التشك طفت.
من ساعتها التنتيشة قلت كتير بس ما راحتش نهائي.
غيرت بوجيهات و فلتر بنزين و فلتر هواء و مفيش فايدة.
العربية زي ما يكون عليها عفريت..... شوية تنتش و تتعبني جدا كأني حاطط مية في تنك البنزين و شوية تكون كأنها زيرو و تشد ولا اللانسر
نضفت بلف الأيدل و حطيت منظف رشاشات في البنزين و حرقت عليه.
و أهم حاجة اللي كلفتني كتير... ركبت حساس أكسجين جديد... حسن استهلاك البنزين لكن التنتيشة قلت شوية صغيرة و بعدين رجعت زادت نفس الشوية الصغيرة

حد عنده حيل تانية ؟؟؟؟ أنا تعبت

**mahmoudysf** · 13-04-2011 08:47 PM

غالبا لو متاكد من السلوك والوجيهات انها سليمة هتكون الموبينة فيها مشكلة اعمل اختبار شرارة للموبينة
وهي انك بتشيل سلك سلك من ناحية الموبينة وتشوف الشرارة للسلوك الاربعة زي بعض ولا لا

**ABO_MAREM** · 13-04-2011 10:35 PM

انتا بتمن بنزين منين يا كبير؟ دا اول سؤال

مون من بنزينه تانيه غير الى انت متعود عليها

يستحسن من من مصر الامارات او الوطنيه لانهم مضمونين

وكمان نظف الانجكشن بتاع العربية تقريبا فى سائل او حاجه بتعمل كده الاخوه حتفيدك فى موضوع التنظيف دا

الحاجات دى مش حتكلفك حاجه اصلا جرب ونشوف

**ABO_MAREM** · 13-04-2011 10:37 PM

نسيت اقولك ان موضوع التموين دا علشان ممكن يا باشا تكون بتمون من بنزينات بتحط ميه او سولار او عصير قصب ههههه

**amazingahmed** · 14-04-2011 10:27 AM

شكرا لكل اللي ردوا عليا
أنا فعلا كنت غيرت البنزينة لكن المشكلة ما راحتش.
عاوز أقول أني بعد ما حطيت منظف الرشاشات و العربية اتحسنت كتير.... لكن مشكلتي أني مهندس و طبيعة شغلي تخليني عاوز الحاجة 100% مش 95%. على العموم لسة ما فولتش تاني علشان أشوف ايه اللي هيحصل.
لكن الوضع دلوقتي كالآتي: أنا معنديش آر بي إم لكن أقدر أقول أني عند بداية النقلات بيبقى فيه نتشة و بعدين العربية تشد عادي. و عند السرعات البطيئة جدا (مثلا في الزحمة) لما أدوس بنزين خفيف جدا العربية بتقطع خفيف (مش ناعمة أو مش سلسة) و لما أكون ماشي و أشيل رجلي من على البنزين يبقى فيه نتشة أو نتشتين و بعد كده تبدأ تظبت نفسها و عند السرعات البطيئة لما أشيل رجلي من على البنزين (أمشي سلانسيه) العربية تاخد و تدي مع نفسها شوية و بعدين تبدأ تظبت نفسها.
اللي مدايقني أن العربية ما كانتش كده في الأول و المشكلة حصلت فجأة و مش عارف السبب.
يا رب أكون عرفت أوصف المشكلة بدقة.
@mahmoudysf
هحاول أروح لميكانيكي معرفة علشان يشوف الشرارة.
هبقى أقولكم عملت ايه لما يكون فيه جديد.

**ahmedfd** · 14-04-2011 10:36 AM

المشاركة الأصلية كتبت بواسطة mahmoudysf

غالبا لو متاكد من السلوك والوجيهات انها سليمة هتكون الموبينة فيها مشكلة اعمل اختبار شرارة للموبينة
وهي انك بتشيل سلك سلك من ناحية الموبينة وتشوف الشرارة للسلوك الاربعة زي بعض ولا لا

لو كل الحاجات التانية سليمة زي ما بتقول فأنا شايف إنه غالباً عيب بوبينة فعلاً.

**mo2men2010n** · 14-04-2011 02:27 PM

يا باشا المشكله دى كانت عندى نفس اللي بتتكلم عليه كدة تقريبا بس كانت في 128 تمام روحت للمكانيكى وغيرت كل ماتتخيل بوجيهات وسلك وطرومبة بنزين واسبراتير بطقم الكهربا كمان ولا غير اى حاجه
وطلعت في الاخر الموبينة كان فيها سلكة مشعرة كدة كانت اول متلمس كانت تنتش وممكن تبطل كمان فا ممكن تجرب الموبينة

**amazingahmed** · 14-04-2011 03:26 PM

شكرا يا أساتذة... طب حد عنده فكرة موبينة الماتيز الجديدة تعمل كام و أجيبها منين ؟ و ياترى أصلي ولا صيني؟

**amazingahmed** · 17-04-2011 09:46 AM

السلام عليكم.
أنا رحت للميكانيكي و قاللي الشرارة كويسة و العربية بتعد 3 و قاللي كده صح.
المهم هو غير البوجيهات اللي راكبين ببوجيهات تانية 3 شعلة. اللي راكبين كان على السن بتاعهم شوية رواسب.
و كمان نضف البوابة. بعد كده العربية اتحسنت كتير و أنا راضي عنها دلوقت ... لكن حيث أن المشكلة بتيجي و تروح يبقى لو حصل حاجة تانية حقولكم علشان كلنا نستفيد.