الموضوع: نفسي اسأل .... لماذا قمنا بالثورة؟؟

فليكس باشا أولا الحاجات اللى حضرتك بتتكلم عليها دى منتشرة زى السرطان بقالها 30 سنة و يمكن أكتر و العدوى قوية جدا و عدد قليل أوى اللى أفلت رغم إن ساعات كان بيستسلم للفيروس و بعدين يقاوم و يرجع يخف تانى. الكلام ده عمره ما هيتغير بين يوم و ليلة و الناس كلها و منهم احنا أخلاقنا و عاداتنا مش أخلاق أنبياء احنا بشر نصيب و نخطىء و المرحلة الحالية منعطف صعب جدا و خطير و تشهد حالة سخط من البعض على الثورة و نتائجها كما أن حالة الجهل و الفقر لسه بنعانى مهم زى الأول و يمكن أكتر كمان ده غير غياب الاستقرار الأمنى بشكل عام و الدلع فى تطبيق القانون ماعدا فى حالات البلطجة و المحاكمات العسكرية. و عايز أدى لحضرتك مثال العسكرى الغلبان اللى فى الشارع اللى كنت بتطبق 10 و تديهاله عشان ما يخدكش مخالفة و لا يفتحلك الإشارة لو قدرت تحلل عناصر الفساد فى المعاملة دى بس ببساطتها هتلاقى عوامل كتير مثلا الشخص اللى رشى واحد أنانى عايز يهرب من طائلة القانون و يدفع فلوس أقل من اللى هيفرض عليه لو الغرامة اتطبقت و برده هو شايف إن العربية اللى فى نفس مكانه عليها نسر و لا ميزان و لا نمرها خضرا ما بتاخدش نفس المخالفة فاشمعنى هو و بعدين العسكرى اللى بياخد 100 جنيه فى الشهر و هو فعليا بيشتغل 18 ساعة فى اليوم حتى لو كان متجند و بيأدى دوره الوطنى لما يكون هو عائل لأسرة يعملوله إيه و بعدين إيه سلطته على النماذج اللى بتعدى من غير مخالفة و ما يقدرش كمان يفتح بقه معاهم فطبيعى يبقى تفكيره إنه لما ياخد مقابل إنه يعدى الموضوع أحسن ما يعديه من غير ما يستفيد حاجة و الأدهى إنه ممكن يتضرب كمان و الظابط بتاعه بدل ما ينصفه ممكن ييجى يكمل عليه و الموضوع ده تحديدا حصل قدامى.

شايف بقى كل العوامل دى ممكن تتغير بين يوم و ليلة لأنك محتاج عشان تمنع الرشوة البسيطة دى تحط قوانين مرور محترمة هدفها الحقيقى فرض النظام و سلامة الناس مش لم فلوس و بس و تعامل المجند فى الشرطة بآدمية سواء كقيادة أو كمواطن و يبقى له سلطة كمنظم للمرور على وزير داخليته نفسه إن ما كانش المفروض على الرئيس ده بخيال كده لو كانوا بيمشوا فى الشارع زينا و ياخد مرتب محترم يليق ببنىءادم بياكل و يشرب و يلبس و فى ناس فى رقبته بيصرف عليهم و القانون يتطبق على الكل بلا استثناء و قتها بس كل ده هيختفى و تبقى الدنيا زى ما بنتمناها. شفت الموضوع مش سهل إزاى

ربك قالها في كتابه الحكيم " لا يغير الله ما بقوم حتى يغيرو ما بأنفسهم " صدق الله العظيم

لازم نبتدي من نفسنا و شوية شوية الدنيا هتتصلح ان شاء الله

صح
ابدا بنفسك اى حاجة مش عجباك ما تعملهاش
المسالة صعبة لكن مش مستحيلة ان شاء الله نبقى دولة قوية ومحترمة فى وقت قليل بس نيتدى