الموضوع: شفتو اللى جرى لى مع دبرياج ال127

السلام عليكم و رحمة الله و بركاته
أنا كنت عايزة اشارككم فى اللى جرى لى و انا راجعة من الشغل و كانت معايا 2 من زميلاتى و ده بس من اجل المشاركة و افادة الغير و اكيد انتوا اهل خبرة و علم اكتر منى فيا ريت تشاركونى بارائكم و برده علشان ابين لسيادتكم ان الدنيا لسة بخير و بلدنا فيها خير كتير
على فكرة عربيتنا 127 مو 83
انا و انا عند نادى الجلاء بعد السبع عمارات باغير من التالت للتانى لقيت بدال الدبرياج سقط و ما بيقمش فقلبى وقع فى رجلى و رحت مهدية اوى و رامية على اقرب ركنة و كانت شمال و وقفت العربية و بعدين حاولت اقومها تانى بعد ما اديت غيارو هى مقفولة نطت منى و لقيت العجلة الشمال وقعت فى فتحة بلاعة مفتوحة
نزلت انا و زميلاتى علشان نزقها لاقيناها محشورة و الدينا فاضية الساعة 1.30 تقريبا . بس الحمد لله لقيت واحد ابن حلال كده لابس اسود فى اسود لقيته جه من بعيد و حاول يرفع العربية و من ستر ربنا جه اتنين كمان و ساعدوة و طالعوها من فتحة البلاعة. و قالى اطلعى بيها. قلت له على الدبرياج اللى سقط. فتح الكمبوت و شاف سلك الدبرياج لاقاه كويس قاللى دى عايزة ميكانيكى المهم انا شكرته و قلت له اتفضل حضرتك و انا حاتصرف و انا مش عارفة اعمل اية .
المهم زمايلى واقفين معايا و انا مش عارفة اعمل اية ؟؟؟؟؟؟
قلت اوقف تاكسى يقطرها لى للميكانيكى . و وقفت تلاتة ما فيش حد رضى المهم لاقيت تاكسى وقف و بينادينى رحت له و قلت له. قاللى القطرة ب 100 جنية انا تنحت
انا قلت من نادى لجلاء لمساكن عين شمس بكتيرة 30 او 40 جنية مش المبلغ الكبير ده ؟ فقلت له حاعمل تليفون فكلمت الميكانيكى و سالته قاللى اركينيها و تعالى خدى واحد من عندنا . قلت حسبى الله و نعم الوكيل فالظاهر صعبت على سواق التاكسى فقاللى فين العربية. قلت له قدام على الشمال. قاللى اركبى بس( فبامانة خفت جد)ا و قلت اتفضل انت و انا حاعدى و اجى لك المهم جه للعربية و شافها. قاللى انتى بتسوقى بقالك كتير و لا لسة بتتعلمى (يظهر شكلى جاهل اوى فى السواقة و باين عليه ). قلت لا الحمد لله كويسة . فقاللى انا حاقول لك على طريقة تمشى بيها من غير دبرياج و انا مشيت بعربيتى من غير دبرياج من التجمع الخامس لمدينة نصر . و قاللى اركبى معايا و انا حاوريكى . فانا خفت فقلت له حضرتك قوللى بس و انا حاعرف باذن الله
فحس انى خايفة منه فقالى ادى الاول و العربية مش شغالة و بعدين اشغل و ادى بنزين . قلت له انا عملت كدة و قفلت منى . قاللى لا علشان بتشيللى رجلك من على البنزين خليكى دايسة علية و بعدين شيلى رجلك لما تمشى و لما تحسى ان الغيار على اخرة دوسي مرة خفيفة على البنزين و بعدين غيرى الغيار حيغير معاكى و لما تيجى تفرملى و تقفى مورى العربية .
قلت له طيب و كان مصمم يركب معايا و يورينى . قلت له شكرا و ركبت و عملت زى ما قال لى بس علشان يمشى( الحقيقة انا كنت مرعوبة)
المهم العربية وقفت منى عشر الاف مرة بس ربنا سترها معايا اوى و رحت بيها للميكانيكى فى المساكن بعد طلوع الروح و بعد ما اعصابى سابت على الاخر و صاحبتى كان قربت يغمى عليها.
الميكانيكى قاللى ان السلك مش واقع و ان العيب فى البدال نفسه فحله. و قال ان فيه خرطوش اتقطم فلحمه و غير سلك الدبرياج و جلب كمان المهم اخد يومها 60 جنية و كارمنى كمان و دفعتهم زى الحمارة اللى بديلين و مش عارفة عمل اية اصلة معرفة و صمم انى اسيب له العربية و اجى بعدين
بس بامانة انا حسيت ان ربنا سترها معايا اوى انى عرفت اروح من غير ما اخبط فى حد و لا حد يخبط فية
ربنا كريم حقيقى
انا قلت اقول لكم اللى جرى معايا علشان نتشارك فى خبراتنا و نفيد بعض مش اكتر و ربنا يسلم لنا الطريق و يستر علينا جميعا

المشاركة الأصلية كتبت بواسطة Hondawy_2008

حمد الله على سلامتك وكويس طبعا انك مخلتهوش يركب معاكي مفيش أمان أوي و الحمد لله ان الموقف عدى على خير

و الله ده من فضل ربنا و ستره و جزاكم الله كل خير على مروركم الكريم

المشاركة الأصلية كتبت بواسطة heshamzaky

معلش حصل خير و بعد خبرة فى ركوب ال 127 لمدة 20 سنة حا أقولك تعملى أية بمنتهى البساطة .
الاول دة ممكن يحصل فى ال 127 أن البنز بتاع بدال الدبرياج يتقطم حصلت معايا مرة واحدة و صلحتة و ممكن السلك يتقطع .
الحل لو البدال سقط منك لتحت خالص مفيش مشكلة أطفى العربية و بعدين هاتى النقلة التانية أو الرابع و دورى العربية حا تنط و تنتش فى الاول بس حا تمشى عادى جدا أول ما تاخدى سرعتك مفيش مشكلة نهائيا خصوصا لو جبتى الرابع .
المشكلة لما تيجى تقفى تماما بالعربية علشان مش حا تعرفى تدوسى دبرياج حا تطفى منك العربية مش مشكلة و الكلام دة حا يواجهك فى الاشارات بس لو الدنيا فاضية يبقى كويس جدا لما تقربى تقفى أطفى العربية علشان ما تنطش منك و ممكن تخبطى العربية الى أمامك دة فى الزحمة و الاشارات أول ما تيجى تطلعى و العربية مطفية هاتى التانى و انتى واقفة قبل الدوارة و بعدين دورى العربية حا تنط نطتين كدة و تمشى زى القردة مفيش مشكلة . لو حاولتى تنقلى من التانى للرابع الفتيس حا يزعق جامد منك لو مش عارفة تنقلى قفى فى مكان فاضى و اطفى العربية و حاولى تطلعى على الرابع .
نصيحة اخرى لو لا قدر الله سلك البنزين أتقطع منك برضو ممكن تمشى بالعربية شدى الشفاط و أمشى بالعربية حا تمشى برضو بس بسرعة بطيئة و هى مقدار شدة الشفاط للبنزين لان الشفاط لة سلك أخر متصل بالكربراتير غير سلك البنزين

جزاكم الله كل خير على النصايح المفيدة دى و ربنا يسترها علينا كلنا
بس ايه هو الشفاط ده بتاع البنزين بيبقى فين و شكرا على مرورك الكريم و ردك القيم
[QUOTE=l0new0lf;3873424103]حمد الله على السلامه
انت ربنا كرمك انه بعت لك السواق ده لان مش اى حد بيعرف يحرك العربيه من غير دبرياج (و دى حاجه مش عيب) و اهو اتعلمتى حاجه جديده :0
انا مره اخدتها من عين الصيره لعابدين سايق من غير دبرياج
فى اول الحركه بكون طافى العربيه
اديها الاول و شغل مع سنة بنزين هتنط نطتين و تدور عادى
و لما نيجى ننقل للتانى لما العربيه تاخد سرعتها ندى سنه بنزين و ننقل عصاية الفتيس بسرعة متوسطه يعنى ابطا شويه من النقل بدبرياج هتنقل من غير مشاكل
و تالت و رابع و خامس عادى جدا حسب سرعة العربيه
لو حاولت تخطف النقله هتسمه صوت التروس نفس الصوت لما بتدى مرشدير من غير متدوس دبرياج على الاخر[/
جزاكم الله QUOTE] كل خير على مرورك الكريم و نصايحك التى تتاقل بالذهب و ربنا يسلم لك و لنا كلنا الطريق

[QUOTE=nicegypt;3873424132]الحمد لله ان الموضوع عدي بكل خير الحمد لله دة اولا
ثانيا .. مع العربيات دى عادي ان حاجة زى كدة تحصل .. وعلشان حضرتك تتلافي دة حاولي كل فترة تعملى تشك عليها عند ميكانيكي كويس
بالنسبة للحاجة اللى غيرها هي مش خرطوش هي قطعة حديد وفيها بلاستكة بتمسك فى سلك الدبرياج ومن الجهة الاخري للسلك بيمسك
فى زراع الفتيس .. هو كان بدل ميلحم كان غيرها .. بس طالما اللحام كويس مش مشكلة . هتشتغل فترة طويلة كويس بأذن الله
انما فى المستقبل تبقى تغيريها .. اما بالنسبة للسلك نفسة .. فهو كان ممكن يسيب نفس السلك طالما مقطعشى عادى
لكن علشان متقفش ف اي وقت ونبعد عن موضوع السلك وميحصلش نفس الموقف تانى .. غير السلك وتمنة 18 ج الايطالى ودى احسن حاجة
اتعملت .. وخلى القديم مع حضرتك اسبير للاحتياط .. وحمد لله على سلامة حضرتك .. وعلى سلامة فيفي 127[/
الله يسلم حضرتك و يسلم لك الطريق و شكرا على خبراتك القيمة دى و ربنا يسترها علينا جميعا QUOTE]

المشاركة الأصلية كتبت بواسطة د.محمود صلاح

العربيات القديمة مقالبها كتير ,, قدر ولطف

الحمد لله فعلا قدر و لطف و ربنا يلطف بنا كلنا دوما
اللهم عاملنا بما انت اهل له و لا تعاملنا بما نحن اهل له انك انت اللطيف الرحيم