الموضوع: محتار اوى اشترى مستعمل وصيانتها تخرب بيتى ولا اشترى جديد وقسطها يخرب بيتى

السلام عليكم ورحمة الله وبركاته
اخوانى الاعزاء فى المنتدى

هناك موضوع يحير كثير من الناس المقبلين على الشراء وميزانيتهم بسيطة من (10 : 20)
وهو يبقى ادامه حل من الاثنين
الاول :
يشترى عربية مستعملة
وميوجعش دماغة بالقسط بس يوجع دماغة بالصيانة
الثانى :
يشترى عربية جديده
يدفع اللى معاه مقدم فى عربية جديدة ويقسط الباقى
وميوجعش دماغة بالصيانة بس يوجع دماغه بالقسط
ده ليه مميزاته وعيوبه
وده ليه مميزاته وعيوبه
بالنسبة للحل الاول :
العربية بتبقى بطيخة
اما يتبقى حمره وحلوه اوى وتريح الواحد
ويعملها اول ما يجبها صيانة شاملة (سرفيس ، عفشه ، ميكانيكه ....) بتاع الفين تلاته تريحه فتره حلوه ممكن تكون كام سنة وممكن تكون كام شهر
او بتبقى بيضه وقرعة اوى وتبهدل الواحد ويفضل يعملها صيانة لحد ماتخرب بيته وفى الاخر يبعها ويخسر فيها ويفضل يشتم فى العربيات القديمة
وفيه ناس خبرة جامد فى العربيات واتلسعوا
والعربيات القديمة للاسف معظم الناس مفيش امانة عندها عند البيع
(لان لو العربية مبهدلاه هيقلل فى السعر علشان يبيع بس قليل اللى بيقول اللى فيها علشان السعر مينزلش عن كده)

بالنسبة للحل الثانى :
العربية طبعا لسه زيرو
بس المشكلة فى القسط وتامين وصيانة فى التوكيل
وخايف عليها من الخربشه
ولو اتخبطت يا خرابى على قطع الغيار المولع نار اوى

فبصراحة محتار جدا انهى احسن؟؟؟؟ وليه ؟؟؟؟
فقلت افتح باب مناقشة للموضوع ده بالنسبة للجماعة الموظفين الغلابة اللى زى حالاتى علشان نستفيد
من الاخوة الاعزاء فى المنتدى وخبرتهم فى العربيات
لانى بصراحة كان معايا تجربة واحدة فقط وهى فيات 127 وللاسف
طلعت قرعة