فحص و تجديد و نقل ملكية فى ساعتين.......بس فى الإمارات
السلام عليكم
أليكم تجربة عشتها على مدار اليومين اللى فاتو فى الإمارات....لنقل عربية من مرور إلى أخر و ترخيص و فحص و نقل ملكية العربية.
الأول رحت المرور القديم.....و المرور ده كشفت فيه على العربية.....تقرير شامل كل حاجة من الدهان إلى الموتور و الفتيس .
الكشف أخد ساعة إلا ربع تقريباً......و اللى شد أنتباهى هو جهاز صغير بيبقى مع العامل علشان يكشف بيه على الدهان.
الجهاز بيبقى فى حجم قبضة الأيد تقريباً و بيدى قراية معينة على دهان الفابريكة و قراية تاينة على الدهان العادى حتى لو دهان فى التوكيل.
نظراً لصغر حجم الجهاز ممكن ميكونش باين قوى فى الصورة
http://i52.tinypic.com/eq9uag.jpg
بعد الكشف و موافقتك لو عاوز تشترى بيطلبوا منك الأتى
1- صور بطاقة المشترى أو جواز السفر
2- تأمين على العربية لمدة 3 أيام ( تأمين مؤقت لحين الإنتهاء من ترخيص العربية على المرور الجديد )
3- تفك النمر القديمة و تجيبها معاك
بعد كده بتاخد دور و بعدها بتدخل على الشباك أنت و البائع.....البائع بيتحققوا من شخصيته و بيطلبوا منه رخصة العربية و بياخدوا الأوراق و النمر القديمة و يدوك ورقة تديها للمرور الجديد و إيصال إستلام نمر مؤقتة.
تاخد النمر المؤقتة و تركبها و تتوكل على الله........
الموضوع كله أخد ساعة و نص بالكشف اللى فى الأول اللى هو مش شرط.....يعنى لو أنت كاشف على العربية فى مكان تانى يبقى الموضوع هياخد 45 دقيقة.
بعد كده......بتروح المرور اللى أنت عاوز ترخص عليه .....و المرور هنا شغال من 8 الى 8....يعنى 12 ساعة بكامل طاقته.
بتروح بتدخل على الفحص الفنى للعربية....و ده اللى بيحدد إذا كانت العربية ينفع تترخص و لا لأ....و هو ده الجزء المهم فى الموضوع.
الأول العربية بتدخل على جهاز للكشف على العفشة بتقنية متطورة شوية
شوفو الفيديو ده و ركزو فى العجل هتلاقوه شوية بيتهز لتحت و فوق و شوية بيتهز يمين و شمال .
YouTube - IMG_0545.MOV
و بعد كده بتدخل العربية على كشف على الأنوار و الإشارات و خلافه.
و المرحلة التالتة للكشف على العفشة تانى عن طريق رفع العربية و كذلك بيشوفو إذا كان فيه تسريب زيت أو لأ و برضه بشوفوا الكاوتش ينفع ولا لأ و بيشوفوا نسبة إنبعاثات العادم من المحرك....مسموحة و لا أعلى من الطبيعى.
الكاوتش لو متاكل أو بايظ خالص مش بيرخصوا العربية......و أعتقد برضه لو فيه فانوس مكسور بس مش متأكد من دى 100%.
بعد كده بيدوك رقم و تستنى دورك.....و على ما يجى دورك بتكون رحت عملت تأمين على العربية و ده علشان لو لا قدر الله فيه حادث و أنت اللى غلطان التأمين بيشيل الليلة للعربية التانية....و التأمين ده إجبارى.....و فيه نوع تانى شامل و فى الحالة دى لو أنت اللى غلطان التأمين هيصلح العربيتين.
و برضه فى إنتظار دورك بتفك النمر المؤقتة.
لما يجى دورك بتدخل على الشباك....تدفع المعلوم.....و يقولك روح على شباك إستلام الرخصة.....على ما تروح بتلاقى الرخصة أتطبعت....تاخد الرخصة و تدخل على الشباك اللى جنبه.....تستلم النمر الجديدة اللى بتتصنع و أنت واقف.....و بيسألك قبل ما يطبعها....عاوزها قصيرة ( زى نمر مصر كده ) و لا عاوزها طويلة زى المستخدمة فى أوروبا :)
تاخد النمر.....تركبها....و تتوكل على الله.
الموضوع ده أخد ساعة وربع بالفحص بكل حاجة.........يعنى الإجمالى فى المرور القديم و الجديد ساعتين....و لا بقى الملف وصل ولا لسه موصلش و الكلام ده.......كله على أوراكل سيستم و كله يعرف يدخل على بيانات العربية و يشوف اللى هو عاوزه.
بالمناسبة كان فيه غلطة فى بلد الصنع على الرخصة.....أتكتبت غلط و بعد الإستلام قولتلهم و قالولى هنطبع واحدة تانية......و تم الموضوع فى 5 دقايق :)
تفتكروا المرور فى مصر ممكن يبقى كده فى يوم ما ؟؟؟؟؟
