يا نهار .... : مأمور سجن طرة .... لسه بيدي تعظيم سلام ... السفاح " حبيب العادلي

**tamer_a7** · 15-04-2011 03:42 AM

طيب اقولك علي حاجه تعرف منها ان الناس بتسخنك وخلاص ولا تقولي اون تي في ولا غيره
انا ابن خالتي ظابط في سجن طره ايه رايك انهم مش مسؤولين عنهم وان المسؤول ظباط من الشرطه العسكريه
وبعدين مؤمور السجن يعمل تعظيم سلام للعدلي
يا باشا دا لو يطول يولع فيه هيولع الناس دي ما بتطيقش ريحته
اسال اي ظابط كده ايه رايك في القيادات اللي في السجن هيقولك يا رب اعدام
امر اخر بس احب اضيفه القانون في مصر بيسمح بدخول مراتب وملايات وبعض ضروريات الحياه في السجن وبيتم دفع رسوم محترمه بشكل رسمي مش رشوه علشان الموضوع ده

**fepsceasar** · 15-04-2011 04:02 AM

طمنتنا يا اخ تامر
لكن الخوف يتفقو مع بعض والقضايا تبوظ، انت ما شوفتش مسلسل رايه وسكينة نجيبلهم فتحى عبد الوهاب منين

**Mahmoud Saloum** · 15-04-2011 04:21 AM

المشاركة الأصلية كتبت بواسطة osoliman88

في "قناة الحياة" وقناة "أون تي في" .. الكل بيؤكد أن ما يحدث في سجن طره أغرب من الخيال
يعني: دخول سرارير خاصة ، أباجورات، مراتب خاصة، ثلاجات ، ومياه معدنية وفاكهة وغيرها منذ الأمس، وإن الأخ هشام طلعت بيقوم بتجهيز العنابر اللى بيفضوها دلوقتي على حسابه الخاص.

الأهم : ما قاله الأستاذ ممدوح حسن مدير جريدة الشروق: أن المساجين يؤكدون أن مأمور سجن طره كل ما يشوف حبيب العادلي يديله تعظيم سلام، هو وبعض الوزراء .... ما فيش فايدة في ولاد ال.....

قاعدتوا تقولوا مارينا طرة وبيفرلي طرة وأهي طلعت بجد مارينا ومنتجع للحرامية والسفاحين
إنا لله وإنا إليه راجعون . لما نشوف الأخ شرف والمجلس العسكري هيرد يقول أيه ... ولا دي كمان لازمها مظاهرة مليونية ... أنا مش عارف أخرتها أيه

رغم انى مش مقتنع بحكاية التعظيم دى ولكن حتى الأن العادلى برتبة لواء و أيضا لم يتم الحكم عليه حتى الأن ومأمور السجن رتبته أقل والتقاليد العسكرية والشرطية تفرض التعظيم من رتبة أقل لرتبة أعلى. فلو حتى فعلها ده أمر عسكرى صرف قد لا يعنى تعاطف المأمور معه ولكن تعنى أنه يقوم بتنفيذ ما تمليه عليه وظيفته

المشاركة الأصلية كتبت بواسطة medo_2060

انا شايف ان المشكله الكبيره فى حاجتين..تجميع العصابه كلها فى سجن واحد... والسماح لهم بحمل الموبايلات ولاب توب...
عموما نفرح بس بحذر ونشوف ايه الرد عالكلام دا لانه لو صح يبقى تهريج

دى المصيبة والكارثة اشمعنا سجن طرة ؟ وليه كلهم مع بعض؟ ده العكس المفروض يحصل يعنى المفروض يفرقوا بينهم مش يجمعوهم علشان وقت المحاكمة ميوحدوش كلامهم مع بعض ويتفقوا هيعملوا ايه وخصوصا ان فيهم محامى مخضرم وهو فتحى سرور؟ ممكن إن شاء الله بعد كل واحد ياخدله 15 -20 سنة سجن يبقوا يجمعوهم انما دلوقتى وقبل المحاكمة صعب شوية.

**cayman69300** · 15-04-2011 05:33 AM

و لا فتحى سرور و لا 100 زى فتحى سرور
و الحكاية مش تظبيط كلام
دة ورق و مستندات و هيلامان و سيرك هيتنصب كمان عليهم
اما بالنسبة حتى لو جابو ليهم دريم بارك جوة السجن
اللى جابهم و ذلهم و دخلهم السجن
قادر ( قادر على كل شى ) انه يوريهم العذاب و الذل الوان

**Sherlock** · 15-04-2011 05:50 AM

يا أخي لو حتي من الناحيه الانسانيه , الناس دي طول عمرها مرفهه جدا جدا و فجأه لقوا نفسهم في السجن , مفيهاش حاجه يعني لو ناموا علي سرير نضيف و اكلوا اكل محترم , المفروض اصلا الحكومه توفر لكل المساجين الحاجات دي .

**hobiko** · 15-04-2011 02:25 PM

المشاركة الأصلية كتبت بواسطة mahmoud saloum

دى المصيبة والكارثة اشمعنا سجن طرة ؟ وليه كلهم مع بعض؟ ده العكس المفروض يحصل يعنى المفروض يفرقوا بينهم مش يجمعوهم علشان وقت المحاكمة ميوحدوش كلامهم مع بعض ويتفقوا هيعملوا ايه وخصوصا ان فيهم محامى مخضرم وهو فتحى سرور؟ ممكن إن شاء الله بعد كل واحد ياخدله 15 -20 سنة سجن يبقوا يجمعوهم انما دلوقتى وقبل المحاكمة صعب شوية.

دة إلي أن خايف منو ...... المفروض نتعامل معهم بنفس مبدأهم

فرق .... تسد

**ahmedsmg** · 16-04-2011 12:53 AM

الخطورة فى أنهم متجمعين فى مكان واحد وعلى اتصال مباشر ببعضهم وجها لوحه ومع وجود موبيلات ولاب توبات معاهم أصبح سجن طرة بمثابة غرفة العمليات التى يمكن أن تدار منها الثورة المضادة ... مش عارف نتصرف أزاى مع المصيبة دى

**زهير فكري** · 18-04-2011 05:14 PM

اللي اعرفه ان طالما الرجل العسكري خرج من الخدمه العسكريه يصبح مدني عادي دون ادني القاب , و فعلا لو ثبت ان مأمور السجن بيعظم بالتحيه العسكريه , يبقي لا مؤاخذه ما ينفعش يمسك مكانه , المفروض لوائح السجن تحترم , ما قلناش يهينه لا سمح الله او يتطاول عليه انما لكل مقام مقال . انما بالطريقه دي يبقي المأمور خايف و بيحاول يمسك العصايه من النص يقولك طب ما هو ممكن يخرج من القضيه و يأذيني بأي طريقه ده برضه كان وزير وايده طايله ايش اكون انا جنبه ؟؟؟ منطق مرفوض .