الإسبوع اللي فات قولت أخد العربيه و أطلع على التوكيل أشوف وجهة نظرهم في العربيه ايه؟ المهم كنت حاجز موعد قبليها ب 10 ايام و رحت في معادي و الناس كانوا في انتظاري و في غاية الذوق و الإحترام ....المهم قولت للمهندس على طلباتي و كانت لا تتعدى مجموعة اختبارات ميكانيكا و كهرباء و قالي ان الموضوع ممكن يخش في 3-4 ساعات ؟؟؟؟؟؟؟مش عارف ليه كل ده؟ المهم قعدت شويه استخدم النت و ايص اشوف العربيه دخلت و لا لسه لحد ما ربنا كرمنا و بعد ساعتين من الانتظار بدأ و احد من الفنيين بالعمل في السيارة و لكن لاحظت انه كان بطيء جدا كأنه قرفان من الشغلانه و اللي بيشتغلوها و بعد ساعه و نص من التجارب و المدولات اتصل بيا المهندس علشان يقولي نتيجة الفحص الشامل للسياره....وبعد ما قعدت معاه اليكم رأيي الشخصي
مبدئيا الناس الناس دي ما بتشتغلش بدقة لان
1- الراجل طلب تغيير السيور بحجة انها غير اصلية من غير ما يكشف على سير الكاتينه لانه اصلي و اثلاث سيور الباقيين من عند الوكيل بتاعهم في بورسعيد لان الآصلي مش متوفر عنده "التكلفه 533 جنيه "
2- طلب تغيير الردياتير لآنه غير أصلي و فيه رشح "التكلفه 2612 جنيه "
بلإضافه لمجموعة الخراطيم "التكلفه 350 جنيه " + الثرموستات "التكلفه 110 جنيه " طبعا لما روحت للميكانيكي بتاعي رفعنا العربيه لقينا زي الفل و لا في رشح ولا هباب و العربيه أصلا ما بتسخنش و انا لسه مغير وصلى الخرطوم بتاع الثرموستات الآصلي من شهرين ...يعني استهبال بالجامد
3- طلب تغيير طلمبة المياه لانه سامع صوت "التكلفه 392 جنيه " و دي للأسف انا اشتريتها لاني صدقته و بعدين لما روحت للميكانيكي بتاعي طلع الصوت بتاع بلية سير التكييف و غيرتها ب 15 جنيه
4- طلب تغيير جوان غطاء التكيهات و اويل سيل البوجيهات رغم انه لا يوجد اي تسريب للزيوت و الموضوع ده اتأكد من الزميل العزيز المهندس أحمد الشبراوي Shaft لانه شاف العربيه بنفسه يوميها بالليل
5- طلب تغيير الطنابير الآمامية بحجة ان فيها ريجة بتظهر مع الفرامل على سرعات عالية "التكلفه 1300 جنيه " و لما رحت للميكانيكي طلع الموضوع بلية الطنبوره و غيرت الآثنين ب 270 جنيه
المهم ان المهندس قالي احنا ممكن نعملك صيانه شاملة تغيير زيوت و فلاتر و خراطيم "التكلفه 3800 جنيه " قولته ألف ألف شكر على وقتكم الجميل و ادي دقني اهي لو شوفت و شي تاني
انا مش عارف ليه الناس دي بتعمل كده ...هل لآن العربيه موديل 96 و لا هو نظام تطفيش و لا فعلا الناس دي مش فاهمه حاجه ....المفترض في التوكيل انه يديلك التشخيص السليم و الدقيق للمشاكل اللي في السيارات مش مجرد فحص سطحي مع حل التغيير الجذري لمجرد شراء الدماغ !!!!!!!!!!!و طبعا الزبون يدفع