رايكم فى الفيرنا خصوصا انى ماليش فى العربيات اووووى

السلام عليكم ورحمه الله وبركاته
معلش ياجماعه كنت عايز اخد رايكم فى هيونداى فيرنا خصوصا انى ماليش فى العربيات وكنت عايز اعرف الفرق بين الـ 1500 و الـ 1600 واستهلاكها فى البنزين عامل ايه عشان ناس كتير قالتلى استهلاكها جبار فى البنرين وناس تانيا تقول لا معقوله وناس تقولى ابعد عنها عشان ساجها ضعيف اوووووى ومع السرعه العربيه بتعوم
وكنت عايز اعرف لو حبيت اكشف على العربيه فى غبور لانى هشتريها مستعمله واكيد هناك هيفدونى اكتر لانى كنت بعانى مع الميكانيكيه فى العربيه القديمه
واخيرا انا اسف على الاطاله واتمنى تساعدونى ان شاء الله
لان ده اكتر موقع انا بثق فيه

انا راكب فيرنا وهى عربيه كويسه مش وحشه بس نصيحه لوجه الله
جيب ساجا

و عليكم السلام و رحمة الله
بالنسبه للفيرنا 1600 و 1500 الأتنين واحد في كل شئ ماعدا الموتور طبعا
1600 تعتبر أفضل موتورها مشهور و شغال في معظم العربيات الهيونداي زي الماتريكس و الألنترا و الكوبيه و الجيتز ال1600 علي ما اعتقد
بالنسبه لأستهلاك البنزين أنا هاقول علي تجربتي مع الماتريكس مع غن الماتريكس الإستعهلاك أعلي بسبب الحجم و الوزن و الشكل وهي بتستهلك حوالي 1 ليتر /10 كيلو ده في المتوسط يعني في الصفيحه 20 ليتر بتعمل 200 _220 كيلو حسب أسلوب و ظروف القياده و هل مشغل التكييف ام لا
بالنسبه للسحب فحدث و لا حرج العربيه دي طايشه جدا لأن موتورها أقوي منها اضعاف أضعاف ومفيش عربيه 1600 بتقدر عليها
و لو عايز تكشف عليها في غبور ممكن و لكن ممكن برضه تكشف في أي محطه شيل و هايدو حضرتك تقرير وافي و ثقه إن شاء الله

الفرنا عربية على قد تمنها
متور :سافل بمعنى الكلمة
عفشة : تعباتة مش مريحة
الثبات : بعد الـ100-120 مع السلامة متلاقيش
الفرامل : مع الـ 1500 عندى معقولة لحد 100-120 فى الـ 1600 مجربتش علشان مكدبش
البنزين : متعتبرش موفرة وزود على كدة انك لو سوقتك شبابى فالبنزين بالسلامة لانها مغرية جدا انك تحرق وتقرص عليها
الصاج : كلة زى بعضة خفيف بس الميزة هنا ان الصاج الى بيتغير فيها مش غالى زى الرفاف والحاجات دى فى المعقول يعنى الرفرفين كانوا عاملين 200 جنية

الخلاصة عايز عربية على اد ادينا فى قطع الغيار والتصليح و وتكون مش غالية وفى نفس الوقت مبتقلش لا فى اى حاجة يعنى عايلة راكبة فيها ماشى شباب ماشى راجل كبير فى السن ماشى كلة شغال معاها

العيوب القفيل والخامات سيئة بس بردوا هقول على قد تمنها والثبات وكدة فى ناسة زودتة بجنوط اسبوروكاوتش اعرض بس خلى بالك لو هتعمل كدة متعرضش الكاوتش اوى اوى علشان استهلاك البنزين وربنا يباركلك فيها مقدماً واى حاجة انا فى الخدمة

شكرا ليك HOSSAM99
شكرا ليك Angel_wolf
ربنا يكرمكوا
يعنى اتوكل على الله فيها ولا لا مع العلم انى بسافر كتير فكنت عايز اعرف هى امان فى السفر ولا الواحد يسافر بيها وهو قلقان
انا كنت سمعت عشان موضوع الثبات ده وانها بتعوم بعد 100 كيلو انى اغير الجنوط والكاوتش هل الكلام ده صحيح

العفو دا حضرتك تؤمر
العربيه امان و كل حاجه و لزيادة التأكيد ركب جنوط و عجل عريض شويه

انا معاى فيرنا جايبها شهر مايو 2008 1600cc استهلاك البنزين معقول وغير موفرة زى اليابانى طبعا وفعلا من 10 الى 12 كيلوا فى اللتر ، العربية وحش فى صورة عربية خطر جدا على العصبى او اللى بيتنرفز لانه هايمسح كل العربيات اللى حوليه ماعدا الكورى الاحدث من هذا الموتور ، العربية ممتازة على ثمنها وسواقتها سهلة وسلسة ومتنساش ان i10 او بيكانتوا زيروا ب61 او 62 الف والفيرنا لا وجه مقارنة بينهم هى اكبر واقوى واحسن بمراحل
اتكل على الله واكشف عليها وقطع غيارها ارخص من عربيات تانية كثير وتعتبر اكثر العربيات انتشارا الان ومبروك عليك الفيرنا من 2008 موتورها موتور الالنترا 2007

سلام عليكم
في رأيي لو انت مش الاولوية الأولى عندك الشد و الحرق و الذي منه, و رخص قطع الغيار , هات لوجان, ثبات افضل , عربية اوسع , كماليات اكتر , توكيل افضل بكتير , استهلاك بنزين على ما اسمع افضل , فرامل افضل , عفشة افضل , في المقابل سحب اقل و قطع غيار اغلى

انا راكب دايو لانوس , في رأيي خاماتها الداخلية افضل بكتير اوي , و ثباتها برده افضل , لكن سحبها طبعا اقل بكتير, مساوية للفيرنا في مسألة الفرامل الضعيفة و الصاج الطري , لكن فيه ناس هنا عدلت فراملها خلتها احسن , مساوية للفيرنا في الانتشار و اعادة البيع و رخص قطع الغيار و توفرها
الكلام هنا عن اللانوس الدايو , اظن الشيفروليه يفيدك فيه مالكها و ان كان المعروف ان الدايو افضل

اقتباس:

---

المشاركة الأصلية كتبت بواسطة moh_kamal67

ومبروك عليك الفيرنا من 2008 موتورها موتور الالنترا 2007

---

هي موتور الإلنترا 2005 الشكل القديم