الموضوع: وايه يعنى لما اروح اتفرج

فتح معرض لمرسيدس فى طلخا لما قريت الأفتتاح وكنت هناك فى طلخا حبيت اروح اتفرج هو لازم الواحد يبقى جاهل يعنى
المهم صاحب المعرض فرجنى على عربية بمليون و400 الف
اغلى عربية فى المكان (المكان ده غويط)
بيقولك ايه بقى التابلوه بيتحول لشاشة لو فى قطة على بعد 500 متر عشان ينبهك

كرسى السواق (اللى هو السواق الخصوصى بتاعك طبعا مش انت ) فيه 5 ذاكرة لأوضاع الجلوس المختلفة عشان ميتعبش نفسه ويقعد يعدل فى الكرسى

الكرسى كمان بيلف بيك لما تاخد ملف عشان جسمك ميتلويش ويوجعك ولا حاجة

الستاير الخلفية كهربا فى شاشتين طبعا فى مساند الكراسى وزراير زى الأمامية بالضبط فى مخدع ورا للتحكم فى كل حاجة وراديو كمان

الباب طبعا متتعبش نفسك وتزقه هو فى خاصية الشفط انت سيبه وهو هيقفل لوحده

بيتفتح بالبصمه (عادى )

الكراسى طبعا كل حركتها كهربا بزراير القاعدة والظهر ومساند الرأس لسه هتتعب نفسك وتحرك ايدك

الفوج بيشتغل ويتحرك مع الدركسيون لما يلف عشان تشوف كويس


طبعا مش هشرح التقفيل والفخامة دى مرسيدس وانتو متخيلين طبعا


طب انا غلطانة انى رحت ؟ انا طبعا شايفة انى مش غلطانة وانا متاكدة ان اكتر من نص الناس الى بتروح اوتوماك مش ناوية تشترى وبتاخد فكرة بس انا بحب العربيات خلاص اصحابى بقى مصرين ان مش مفروض اتفرج على الحاجات دى لأن ده تعقيد
طب وانا هتعقد ليه لو واحد شايف ان شوية الرفاهيات دى تستاهل يدفع كل ده هو حر اكيد معاه كذا مليار ربنا يباركله لازم ابقى حقودة يعنى !ّ! واما اشوفها بقى هحس ان جتنا نيلة فى حظنا الهباب
انا اسفة اذا كانوا بيحسوا كده دى مشكلتهم
ومشكلة كل واحد مش بيقدر نعمة ربنا عليه لما اعطى لع عينين وغيره كفيف ولما بيركب تاكسى وغيره على كرسى متحرك ......
اللى غايظنى بقى ان واحدة زميلتنا فى الشغل كانت قاعدة وانا بحكى لهم فقامت قالت لى ايه بكل استنكار وتريقة ( وهو يفرجك ليه اصلا هو يعنى شايف ان شكلك هتشترى مرسيدس )
طبعا مش هقدر اقول عملت فيها ايه عشان الرقابة: )