| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
صفحة 1 من 7 1 2 3 4 5 6 ... الأخيرةالأخيرة
النتائج 1 إلى 10 من 61

  1. #1

    الصورة الرمزية Ahmed.TV

    رقم العضوية : 18439

    تاريخ التسجيل : 09Sep2008

    المشاركات : 8,548

    النوع : ذكر

    الاقامة : حدائق الاهرام

    السيارة: بولو 99

    السيارة[2]: تيدا 2009

    دراجة بخارية: honda

    الحالة : Ahmed.TV غير متواجد حالياً

    Lightbulb السجل الميكانيكى لقسم نيسان..كل الاعطال التى واجهها الاعضاء وحلولها هنا - Facebook Twitter whatsapp انشر الموضوع فى :

    hasad">


    اخوانى اعضاء قسم نيسان

    تم عمل فكرة الموضوع وتجميع اهم مشاركتم جميعا طوال السنين الماضية فى الموضوع لاجلكم ولاجل مصلحة الاعضاء جميعا

    ليكون مرجع لينا وقت الازمات ونكتسب خبرة من بعضنا ومن المواقف الميكانيكية التى نمر بيها

    فاتمنى منكم جميعا تنمية فكرة الموضوع...وإثقاله بمشاركتم الغنية فيه بوضع حلول المشاكل الميكانيكية التى واجهتكم وحلتوها
    بنفس طريقة العرض والاجابة

    ليصبح مرجع وسجل ميكانيكى هام نكتسب منه الخبرة والحلول




    وهذه أهم المشاكل والاستفسارات المكيانيكية
    وحلها من جانب الاعضاء او اصحاب المشكلة


    سؤال للعضو : MOK3336
    يا جماعة فى مشكلة عندى سعات لما أجيب المارشدير مش بيرضي ياخد الغيار
    فا بسيب رجلي من علي الدبرياج و ادوس تانى فياخد الغيار عادى
    فهل ده طبيعى ولا عيب في العربية و يتحل ازاى ؟؟؟؟

    الاجابة للعضو : ahmed.tv
    موضوع الديرياج ده فعلا طبيعى جدا فى كل الصنى وكل موديلات نيسان المانيول كدا
    والمفروض عشان تتعامل معاه صح =
    انك تدوس على الدبرياج لمدة ثانيتين او تلاتة بالكتير وبعد كدا تنقل الى المارشيدر وتجرع للخلف,
    والفكرة من انك بتستنى الثوانى دى
    عشان يكون ماستر الدبرياج فتح معاك وتقدر تجيب مرشيدر من غير ما يعصلج معاك كدا
    ---------------------------------------------------------------------------
    سؤال للعضو : MOK3336

    يا جماعة هو تغيير الويت بره التوكيل فيه أى غلط علي الضمان
    عشان بصراحة عاوز أغير لشيل هليكس ألترا و أنتم عارفين ان التوكيل شغال في موبيل بس

    الاجابة للعضو :walidadel

    عادي ياباشا كده كده تغير الزيت و الفلتر مالهمش دعوه بالضمان بس اهم حاجه الفلتر يكون من التوكيل و اي منفذ بيع زي محمد جابر و محمود جابر محلاتهم موجوده في دمشق و جسر السويس و المنفذ البيع بتاع التوكيل في الحجاز

    واجابة اخرى من العضو :ahmed.tv
    السبع بيغير بشل
    وغير كدا لو حضرتك جبت الزيت معاك محدش حيقولك لا فى اى مركز صيانة , وحغيروه على طول
    واستحالة يعكوا فى مركز الخدمة وهما بيغيروا
    وفى نفس الوقت لو عايز تغيره بره مفيش مشكلة ومش حتخرج من الضمان
    -------------------------------------------------------------------------

    سؤال للعضو :othmanelshaikh

    بعد الحادثه ، ازاي استفيد من التامين؟؟ (نيسان صني )

    الاجابة للعضو:sehry

    اعتقد انك لازم تتبع الاجراءات التاليه
    1- عمل اخطار في شركة التأمين بالحادث وخد بالك ان ليك مدة برده تعمل فيها الاخطار 48 او 72 ساعة حسب وثيقتك
    2- الذهاب الي وكيل معين وتليسمه السياره لعمل المقايسه
    3- الانتظار حتي يتم معاينة السيارة من مندوب شركة التأمين والموافقه علي المقايسه

    وتغيير القطع بيكون عن طريق الاتفاق بين التوكيل ومندوب شركة التامين علي القطع اللي هتتغير والقطع اللي ممكن يستعدلها علي البراد او لو هتحتاج شغل اكتر
    بس اعتقد لو هيكون فيه سمكرة ودهان هتتاخر شويه قبل ماتستلمها
    لكن لو تم استبدال الكبوت والاكصدام يبقي ممكن تدخل في 5 ايام بالكتير
    ---------------------------------------------------------------------------
    سؤال للعضو peaceman

    فترة ضمان البطارية؟

    الاجابة للعضو :peacemam

    فترة تغطية الضمان هي 36 شهر او 100000 كم (60000ميل) ايهما اسبق وفقا ً للاسس التالية :
    تكلفة قطع الغيار
    البطارية الاصلية و التي تكون غير صالحة للعمل خلال 12 شهر الاولي سيتم استبدالها بدون اي تكلفة.
    بعد 12 شهر و لكن ضمن 24 شهر , سوف تدفع نيسان 50% من قيمة البطارية الجديدة .
    بعد 24 شهر و لكن ضمن 36 شهر , سوف تدفع نيسان 25% من قيمة البطارية الجديدة
    ---------------------------------------------------------------------------
    سؤال للعضو hossam_zaky

    التكيف بيفصل فى الحر

    الاجابة من نفس العضو

    عن طريق عرض المشكلة على مركز الصيانة انه بسبب نقص الفريون
    ---------------------------------------------------------------------------
    السؤال من العضو :aiman0173

    فيه في كابوت الصني من قدام شمال يالضبط امام البطارية زرار زي الزراير اللي موجودة في ابواب السيارة لإطفاء نور الصالون فهل المفروض بيكون فيه اضاءة في الكابوت والزرار دا اللي بيطفيها ولا المفروض دا بيظهر علامة في التابلوة لو الكابوت مفتوح ولا دا منظر بس

    الاجابة للعضو :حاتم فوزى

    ده جزء من اجزاء دائرة الحماية بالسيارة
    nats-nissan anti theft system
    بيقفل الدائرة مش اكتر
    (اعتقد لو الكبوت مفتوح ومش ضاغط على الصباع ده الانذار مش هيشتغل )
    ---------------------------------------------------------------------------
    السؤال من العضو :aiman0173

    لو سمحتوا انا بعد صيانة ال5000 كم وبعد ما فكوا صالون العربية 5000 حته لقيت لمبة الحزام اللي في التابلوة معدتيش بتضئ واضح انهم نسيوا يشبكوا السلك بتاعها وكلمتهم في التوكيل علشان يقولولي أوصلها ازاي قالولي لأ تعالى نركبهالك وبصراحة انا معنديش وقت وحاولت اتتبع مسار السلك اللي جاي من الحزام لقيت انه مثبت تحت كرسي السواق بس السك اللي جاي من التبلوة علشان يتشبك فيه الاقيه فين

    الاجابة للعضو : peaceman

    بص يا استاذ ايمن .. علشان لمبة حزام الامان تنور تاني هتلاقي الكابلين تحت كرسي السائق .. معلش هتتعب شوية و تحاول تمد ايدك تحت الكرسي و توصل الكابلين ببعض و ان شاء الله اللمبة هتنور علي طول
    ---------------------------------------------------------------------------
    السؤال من العضو : EISultan

    لمبة البطارية منورة حمرا باستمرار على الرغم من العربية دايرة

    الاجابة من نفس العضو بعد سؤال الميكانيكى وكمان من الاعضاء :

    غالبا سير الدينامو حصل فيه مشكلة أو اتقطع ممكن يكون هو اللي عمل المشكلة فالبطارية ما بتشحنش ودا اللي مخلي اللمبة منورة
    ---------------------------------------------------------------------------
    سؤال من العضو : amrstreet

    طقطقه جامده قوي من قدام لما يجي يلف بالعربيه

    الاجابة من نفس العضو بعد ما سال المهندسين فى مركز الخدمة:

    رمان البلي كان في مشكله واتغير
    ---------------------------------------------------------------------------
    سؤال للعضو : hany_mohamed

    سؤال عن مراية الجانب الكهرباء علشان زجاج المراية الشمال عندى اتكسر
    هل يمكن ان اغير الزجاج بس لان الكفر بتاع المراية سليم
    ومنين اجيب الزجاج ده
    والا لازم اغير المراية بالكفر

    الاجابة للعضو :mohamedbook

    فى التوكيل ب160 بجانب الضريبة

    الاجابة للعضو :walidadel

    انا جيبتها من شارع دمشق مش فاكر بس ماعديتش ال 50 جنيه اصلا
    هيا بتركب بكلبسه كده و تضغط عليها من نص المرايه جامد هتلاقيها عملت صوت طقه كده او خالي الراجل يطلع يركبهالك احسن

    الاجابة للعضو :hany_mohamed

    عند محل زجاج لقيت نوعين ألمانى ب 75 جنية وايطالى ب 40 ج
    اخترت الالمانى و فصلها وركبها فى 5 دقايق بالضبط
    ---------------------------------------------------------------------------
    سؤال للعضو :samsong

    انا عندي تيدا 2007 خليجي- وكله تمام
    ماعدا ان عند تحريك الدركسيون سريعا والعربيه واقفه حركه خفيفه شمال ويمين يكون هناك صوت واثناء القياده لايوجد اي مشكله الا عند ركن العربيه فعند لف الدركسيون الي اليمين والتحرك تحس برده في الدركسيون وكذلك في الشمال . ولكن في القياده العاديه لاشيئ نهائي .
    رحت توكيل مودرن موتورز فقال لي تغير قطمة الدركسيون وتمنها 720 و تسيب العربيه يومان ورحت توكيل اخر قال نفس الشئ ولكن مع خصم 20% وتخلص في ساعاتان

    الاجابة من العضو :samsong

    لقد تم حل المشكله وكانت عندي في تغير جلب وكاوتش المساعدين وربط وتشحيم القطمه
    اسف جدا للتاخير مره اخري

    الاجابة للعضو :alhamza

    انا كان عندي نفس المشكله بالضبط وكنت قلقان جدا مخفيش عليكم لغاية مروحت مركز خدمة السبع وقلتلهم عليها وكان ده في ميعاد الصيانة العادية مفيش 3 ساعات بالظبط كانت الصيانة خلصت بتغيير الزيت والمشكله اتحلت تماما ولما سالتهم كان فيها ايه قالولي انها حاجه بسيطه جدا تزييت وتشحيم في القطمه الصوت اختفي والرده اختفت وعاوز اقولك ان الدريكسيون بقي اخف روح السبع ومتقلقش

    الاجابة للعضو :bassmesh

    يا جماعة دي مش مشكلة أصلا. الحكاية دي مقصوده في التصنيع علشان في خلوص في القطمه متروك عشان في حالات الحوادث -لا قدر الله- الدركسيون ينضغط لجوه ويسيب مساحه أوسع أمام السائق عشان الايرباج متأذيهوه. والكلام ده من مصنع نيسان مصر نفسه واللي قالهولي "مودرن" وكيل نيسان وقاللي أنهم كانوا قبل مايعرفوا السبب ده كانوا فاكرين أنه عيب صنع في العربيه وكانوا بيربطوا قطمة الدركسيون عشان المشكلة تختفي.
    ---------------------------------------------------------------------------
    سؤال للعضو :sedyrohy

    اريد ان اعرف مقدار الزيوت التي يتم تغيرها لي اجزاء السياره
    المحرك ----- كام لتر زيت بالفلتر و بدون الفلتر و افضل الانواع
    الفيتيس الاوتوماتيك مقدار زيت و افضل الانواع
    زيت الباور مقدار الزيت و افضل الانواع

    الاجابة من العضو : ahmed.tv

    زيت الصنى تحديدا بتاخد بالظبط 2.8 لتر بالفلتر بخصوص زيت الماتور ومفروض انك بتحاسب على 3 لتر ,ولو حطيت 3 بالظبط غلط وبتلاقى غطا الزيت بيرشح
    وبيتغير زى ما انت بتحب يا اما كل 3 الاف او 5000 او 10 الاف والانواع كتيرة , وافضلهم موبيل وشل
    اما زيت الفتيس بتاخد 3 كيلو وبيتغير كل 40 الف كيلو
    والتيدا كمان زي الصنى فى النقطة دى عشان ملاك التيدا يستفادوا من المعلومة
    وبتغير باى نوع بردوا موبيل او شل
    واللى عرفه من زمان من ايام ما كان معايا بولو كان افضل زيوت الفتيس شل
    اما زيت الباور , فده مش بتغير وبيتزود كل ما بينقص
    وافضل الفلاتر بتاعت نيسان الاصلية
    وبخصوص العربية بتاخد كام لتر بالظبط زيت من غير فلتر , فتاخد 2,5

    الاجابة من العضو :walidadel

    بالنسبه للفلتر بتاع التوكيل هو بيقعد 20 الف و دا كلام الراجل اللي في منفذ البيع
    ---------------------------------------------------------------------------
    سؤال للعضو:memo

    السلام عليكم
    عندي مشكله صغيره هي :
    انا غيرت زيت من اسبوع تقريبا ووقفت علي ايد الواد في البنزينه علشان يحط 2.75 ك وكمان غيرت فلتر لكن للاسف مش فلتر اصلي لاني لفيت الغردقه كلها ملقيتش فلتر نيسان اصلي فاجيبت واحد ياباني
    المهم المشكلة اللي ملاحظها ان لمبة الزيت اللي في التابلوه بتاخر ثواني مش بتطفي مع باقي اللمبات اللي جنبها ( البطاريه وحاجه كمان ) انا مش عارف هي كده ولا لا لاني مكنتش بابص علي الحاجات دي قبل كده فهل هي فعلا بتاخر عادي ولا في مشكله

    الاجابة من العضو:ahmed.tv

    ياريت فى اقرب وقت تغير الفلتر ده بلفتر نيسان الاصلى وكل الامور حتتظبط معاك

    الاجابة من العضو :walidadel

    ممكن يكون موضوع اللمبه دا ان الفلتر مكتوم شويه او الزيت مش بيمشي فيه بسرعه بس عادي يعني ماتاخدش في بالك و حصلت معايا قبل كده و طنشت و غير الفلتر ببتاع التوكيل و ريحت دماغي
    ---------------------------------------------------------------------------
    سؤال من العضو :ahmedsaadnassar

    انا لسه مستلم الرائعه الصني من 3 ايام كده ولما انزل الزجاج الخلفي اسمع صوت زي حكه جامده كده فافضل انزل وارفع فيه فيروح الصوت ده ولما اسيبه فتره و انزله بلاقي الصوت موجود ومش عارف ده من ايه وايه الحل لو سمحتو

    الاجابة من العضو :atefadel

    الصوت نتيجة ان المسطرة الجلد الي بتبقي علي حرف الشباك
    تقريبا جلد مصري
    ومع الشمس والتراب وقلة الستخدام بتعمل الصوت دة
    انا كانت بتعمل كدة معايا من اول يوم والاخص الزجاج الخلفي
    وهما بيروشو فوم علي الجلدة ويفضل رايح جاي عليها ويمسحا فالجلدة بتسخن وتبقي اكتر مرونة
    ويبقي شغال زي الفل لسبوع بعد كدة مع التراب والشمس
    بترجع تاني
    انا عملتة بفوم الحلاقة
    ودعكتة كويس وبقي احسن من الاول
    يفضل لو محدش بيركب في الخلف انك تحرك الزجاج كزة مرة كل يوم
    ---------------------------------------------------------------------------
    السؤال من العضو:ahmed_52869

    ممكن اعرف كل زرار فى التكيف بتاع صنى بيعمل اية

    الاجابة من العضو :harizy

    الزرايز من ناحية السواق: الدائرة الأولى بتحدد درجة الحرارة فيها لونين أزرق وأحمر الأول بيدل على البارد والأحمر ساخن يعنى زى حنفية المطبخ والحمام كده، حلوه دى، لو عايز بارد أور يبقى الأزرق على الأخر أو على الشارة الكبيرة، والعكس بالعكس.

    الزرار المدور الثانى: سرعة التكييف زى ما أنت عاوز بس خليه على اثنين أفضل ومعقول وأحياناً كتير مش هتستحمله لأن العربية ما شاء الله تكييفها جبار.
    الزرار المدور الثالث: بتحدد أتجاه هواء التكييف يعنى عايز الهواء الساقع على صدرك بس، ولا على صدرك ورجليك، وكذلك الأمر بالنسبة للهواء الساخن.
    كمان هتلاقى زرارين مستطيلين الأول مكتوب عليه a/c وهو ده زرار التكييف يعنى لما تشغله اللمبة تنور والتكييف يشتغل، لو مدوستش عليه يبقى إنت كده مشغل مروحة، والثانى عشان تشغل الهيتر بتاع الزجاج الورانى لو فيه شبورة ولا حاجة.
    ---------------------------------------------------------------------------
    سؤال من العضو :semsem8100

    الريموت وقع على الارض بس وقع من أيدى وأنا وأقف بشترى حاجه وقعه عاديه مش جامده زى أى مفتاح ممكن يقع من أيدك أو من جيبك وأنت بتطلع أى حاجه يعنى مش أرتطام جامد بالارض أو من مكان مرتفع وبعدها على طول فتحت الشنطه منه مرتين وبعد جيت أفتح العربيه حلف ماهو شغال فكيته وشلت البطاريه وركبتها تانى قلت يمكن البطاريه معلقه برده مفيش غيرت البطاريه بوحده نفس الفولت بس مش سانيو زى اللى راكبه كانت باناسونيك وبرده مش شغال لا شنطه ولا أبواب ولا أى حاجه يعنى مش معقول الريموت يقع على الارض وقعه خفيفه يقوم يبوظ وعلى فكره اللمبه بتاعه الانذار شغاله عادى بعد ما بقفل بالمفتاح .. برجاء الافاده وهل يمكن أصلاحه بالتوكيل ولا كده باظ ويتكلف كام العربيه يدوب عامله 6500 كيلو .. برجاء الافاده ولكم جزيل الشكر ،،

    الاجابة من العضو :peaceman

    هقولك علي حاجه جربها و ان شاء الله هتنفع .. بس تقولنا علي النتيجة علي طول .. اوك
    روح دلوقتي افصل كابلات بطارية العربية نفسها و ركبها تاني و ان شاء الله الريموت هيشتغل
    الفكرة تكمن في اعادة توليف الريموت على جهاز الانذار لأنه يظهر ان التوليفة حصل فيها حاجه لما الريموت وقع منك فنعملها اعادة ضبط مصنع بفصل البطارية
    ---------------------------------------------------------------------------
    سؤال من العضو mido90

    ارجو من الاخوة لو احد يعرف سعر رش الاكصدام الامامى نظافة فقط وذلك فى السبع او ترشيح احد الصنايعية الممتازين العربية صنى 2010

    الاجابة من العضو :ezzatkhalifa

    أنا سألت قبل كده على رش الاكصدام فى السبع فكان الرد 200 جنيه بس انا متهيالى ان ده من غير الضريبة ( 10%)
    ---------------------------------------------------------------------------
    سؤال من العضو SeaShark

    أعمل ايه؟
    الريموت كننترول مبقاش بيعمل اي حاجة
    بصراحة هو انا من ساعة ما جبت العربية و الريموت ساعات يعلق و ساعات لازم ادوس جامد علي الزراير عشان تستجيب

    الاجابة من العضو نفسه

    كنت مغير البطارية و جربت افصل كابل بطارية العربية اكتر من دقيقة و برضه منفعش
    واعد المهندس يبص علي الفيوزات كلها لقاها سليمة
    عمل ريسيت للسوفتويير بطريقة غريبة كده اعد يحط المفتاح و يشيله من الكونتاك ييجي 20 مرة لحد ما اتعمل ريستارت و بعد كده اشتغل عادي
    بالنسبة للطريقة هو كان بيدخل المفتاح و يخرجه بس بدون ما يدور لحد ما اللمض اللي في الكونتاكت نورت
    ---------------------------------------------------------------------------
    سؤال من العضو mahranoo

    برجاء الافاده - ماذا يتم فى حاله فصل الكابل عن البطاريه الجنب الموجب هل سيفصل الكاسيت ويحتاج الى كود لاعاده التشغيل مرة اخرى ام لا - السيارة صنى 2006 - اى اكس اتوماتيك

    الاجابة من العضو ahmed.tv

    اعتقد طالما موديل قديم مش حيطلب منك اى كود للكاسيت
    والكود اللى بيتطلب ده للاغلب العربيات الحديثة الموديلات اللى فى 2010 وبالاخص اللى رقم الشاسيه بتعها معدى ال30الاف
    ---------------------------------------------------------------------------
    سؤال من العضو : neromohamed

    ارجو المساعدة يوجد اهتزاز حفيف لما بكون علي ال D و العربية واقفة و بتقل لو جبتها علي ال N
    و كمان ال rpm بيقل من 750 الي 650 لما اغير من N الي D
    هل ده طبيعى ولا فىة مشكلة ؟؟؟
    مع العلم السيارة 2011
    1200 كم

    الاجابة من العضو : amir

    طبيعي يا فندم العربيه عايزه تتحرك لقدام و الفرامل هي اللي ماسكاها
    و برضو الار بي ام طبيعي
    الف مبروك العربيه
    ---------------------------------------------------------------------------
    سؤال من العضو : beckeryahia

    نيسان صني 2008 بحس انها بتلعب من ورا في المطبات ... اية السبب؟؟

    الاجابة من العضو : ahmed.tv

    ظبط الزوايا , بس يكون عند واحد محترف
    ---------------------------------------------------------------------------
    سؤال من العضو : essamfarid

    العربية اللي معايا نيسان صني 2002 ، cc 1300 امبارح و بعد مشوار 300 كم العربية ابتدت تقطع و تطفي و انا ماشي ، و كل مادوس بنزين تقطع و متسحبش ، وقفت و دوس بنزين الار بي ام بيرفع للرد زون عادي لكن في المشي مبتسحبش خالص و اخيرا لمبة التشيك نورت ، ارجوا الافادة عن العيب مع العلم اني لسة مغير بوجيهات و زيوت

    الاجابة من العضو :essamfarid

    انا وديت العربية مودرن علشان قريب من طريق بورسعيد و الحقيقة الناس كانوا كويسين ، وصلت التوكيل الساعة 10 بالليل تقريبا ، و الامن استلم العربية ، تاني يوم كلموني و اخدو بيانات الرخصة ، المهم العربية على الساعة 2 كانت خلصت و استلمتها و كان العيب في حساس الهواء Mass Air Flow meter و قالي البوابات محتاجة تتضبط و البوجيهات تتغير المهم ظبت الكلام و كل حاجة رجعت زي الاول ، كان كابوس فظيع
    المهم التكلفة برضة كانت معقولة مش زي الناس مبتقول عن التوكيلات ، لو تحسب الوقت اللى بيضيع عند الميكانيكي و العيوب التانية اللي بعملهالك في العربية علشان ترجعله و كلمه " لا يا باشا الحاجات دي تلاقيه في المتقطع بس " و تفضل تدفع فلوس و العربية تبوظ
    المهم الحمد لله كله كان تمام
    اتكلفت حساس حوالي 600 و كشف و بوجيهات 150 يعني كلة قول 800
    المهم ان العربية تمام و انا كمان ماشي مطمن
    ---------------------------------------------------------------------------
    سؤال من العضو : egypt0777

    ممكن بس اعرف معنى مصطلح التحجير -- يعنى دواسة الفرامل مش بتجمع معاك بتهرب يعنى ولا بدوس على الدواسة الفرامل تقيلة تحت رجلك

    الاجابة من العضو :ahmedalaa

    بالفعل التحجير جي من اسمه انك تدوس الدواسة الخاصة بالفرامل فلا تتحرك او تتحرك مسافة قصيرة جدا مع عدم فعالية الفرملة بشكل عام في إيقاف السيارة. وعادة ده بيكون في مشكلة في السيرفو الخاص بالفرامل او خرطوم الفاكيوم الخاص بالسيرفو.
    بشكل مبسط علشان يصلك إحساس التحجير بطل المحرك ودوس على دواسة الفرامل كذا مرة لحد لما تلاقي ان مشوار الفرامل قصير جدا جدا والدواسة لا تستجيب للضغط
    اما ان الدواسة بتهرب فده معناه تهريب في حكم دائرة الزيت الهيدروليكي الخاص بالفرامل وده ممكن يكون بسبب عدم إحكام مسامير تفريغ مساتر العجل من الهواء او تسريب في احد خراطيم زيت الفرامل او خطوط زيت الفرامل, او تهريب من احد مساتر العجل او الماستر العمومي
    والتهريب ان الدواسة تندفع بشدة لنهاية المشوار مع الضغط الشديد او المتوسط بدون تأثير فعال على فرملة السيارة.
    -------------------------------------------------------------------------------
    السؤال من العضو Eng:mohamed

    أنا لما بدوس فرامل..و أنا ماشي...بسمع صوت تطبيل عالي وملحوظ...(طب.طب.طب.طب.طب.طب.طب ) تقريبا الصوت كده..
    الفرق بينهم نص الثانيه...و بيظهر في أي وقت..وتحديدا بعد فرمله إشتغل فيها ال abs
    يا ترى المشكله دي من إيه؟؟؟؟
    مع العلم إنها كانت بتبان قبل مغير التيل القدماني...
    العربيه عامله 42 الف..
    و مغير التيل من عشر ألاف كم..
    هل يكون التيل خلص؟؟؟؟!!!!!!!
    ولا ريجه في الطنابير...مع العم إن دواسة فرامل العربيه فيها رعشه خفيفه مع الضغط على الفرامل على 100كم\س

    الاجابة بعد الحل من نفس العضو

    أنا عملت الصيانه الحمد لله..طلعت مشكلة التطبيل دي ..بعد تشغيل ال abs...
    و كانت صوت التيل والطنابير.وتم صنفرتهم و أخد الهوا..ورجلشة الفرامل..و إتحلت المشكله..

    ---------------------------------------------------------------------------

    ومنتظرين باقى اضافات الاعضاء من حلول المشاكل ليصبح مرجع لينا

    وتقبلوا تحياتى
    اخوكم فى الله
    احمد مصطفى

    تم تثبيت الموضوع لتعميم الفائدة

    مشرف عام 2

    محرر فى دعم اتخاذ القرار بوزارة الاعلام
    قليل المشاركة فى الموضوعات والرسائل الخاصة لانشغالى بالعمل
    برجاء الاتصال بى : 01288814049


  2. #2

    الصورة الرمزية Ahmed.TV

    رقم العضوية : 18439

    تاريخ التسجيل : 09Sep2008

    المشاركات : 8,548

    النوع : ذكر

    الاقامة : حدائق الاهرام

    السيارة: بولو 99

    السيارة[2]: تيدا 2009

    دراجة بخارية: honda

    الحالة : Ahmed.TV غير متواجد حالياً

    افتراضي -

    مشاركة لاستكمال ما يجد من مشكلات وحلول

    تحياتى
    احمد مصطفى
    منسق نيسان

    محرر فى دعم اتخاذ القرار بوزارة الاعلام
    قليل المشاركة فى الموضوعات والرسائل الخاصة لانشغالى بالعمل
    برجاء الاتصال بى : 01288814049


  3. #3

    الصورة الرمزية BassamHafez

    رقم العضوية : 36347

    تاريخ التسجيل : 23Mar2009

    المشاركات : 2,249

    النوع : ذكر

    الاقامة : القطاميه

    السيارة: n/a

    السيارة[2]: نيسان

    دراجة بخارية: n/a

    الحالة : BassamHafez غير متواجد حالياً

    افتراضي -

    الله ينور يا ابو حميد

    انا كان عندي رعشه في الدريكسيون مع الفرامل وبعد الكشف في التوكيل طلع العيب من الطنابير وتم تغييرهم في الضمان


  4. #4

    الصورة الرمزية BassamHafez

    رقم العضوية : 36347

    تاريخ التسجيل : 23Mar2009

    المشاركات : 2,249

    النوع : ذكر

    الاقامة : القطاميه

    السيارة: n/a

    السيارة[2]: نيسان

    دراجة بخارية: n/a

    الحالة : BassamHafez غير متواجد حالياً

    افتراضي -

    اقتباس المشاركة الأصلية كتبت بواسطة ahmed.tv مشاهدة المشاركة
    تمام يا بسام الله ينور هو ده الشغل يا جميل , حستاذن بس تحط اللينك اوستفسارك كام ايه , عشان اجمع السؤال بالاجابة , وابعته للادارة تضيفه فى بداية الموضوع
    لينك الموضوع اهو

    http://www.nilemotors.net/Nile/202254-a.html


  5. #5

    الصورة الرمزية Ahmed.TV

    رقم العضوية : 18439

    تاريخ التسجيل : 09Sep2008

    المشاركات : 8,548

    النوع : ذكر

    الاقامة : حدائق الاهرام

    السيارة: بولو 99

    السيارة[2]: تيدا 2009

    دراجة بخارية: honda

    الحالة : Ahmed.TV غير متواجد حالياً

    افتراضي -

    سؤال للعضو SGH

    سيارة نيسان صنى 2003 حديثا وجدت اضاءة علامة الحرك التحذيرية فى الطابلوة و دة حصل بعد ما غيرت البوجيهات والزيت و فلتر.الموضوع بيحصل بعد فترة من المشى حوالى ربع ساعة وبيستمر . العلامة معناها OBD Indicator تعنى وجود مشكلة فى المحرك اونظام انبعات الغازات. بتروح لما ابطل و اشغل تانى فهل من حل للموضوع دة علما انى بصيت على الشكمان لقيتة اسود.

    الاجابة بعد الحل من نفس العضو :

    الحمد لله الموضوع اتحل
    بدلت البوجيهات الngk ببوجيهات ngk برضة بس رقم تانى
    ومعمولة لعربيات نبسان (Nissan Genuine Parts) و مصنوع فى اليابان
    ورقم البوجية للافادة (NGK BKR6E)


    ===================

    وياريت باقى الاعضاء تهتم بالموضوع ده وتعمل كدا وتحطلنا عرض المشكلة وحلها عشان الكل يستفاد ونعرف نرد عليهم ونساعدهم فى حل اى مشكلة بتواجهم

    تحياتى

    محرر فى دعم اتخاذ القرار بوزارة الاعلام
    قليل المشاركة فى الموضوعات والرسائل الخاصة لانشغالى بالعمل
    برجاء الاتصال بى : 01288814049


  6. #6

    الصورة الرمزية Ahmed.TV

    رقم العضوية : 18439

    تاريخ التسجيل : 09Sep2008

    المشاركات : 8,548

    النوع : ذكر

    الاقامة : حدائق الاهرام

    السيارة: بولو 99

    السيارة[2]: تيدا 2009

    دراجة بخارية: honda

    الحالة : Ahmed.TV غير متواجد حالياً

    افتراضي -

    ياجماعة الموضوع ده هنا عشان نحط فيه سبب المشكلة وحلها

    وليس طرح فيه اسئلة عن مشاكل ميكانيكية

    اى مشكلة عند اى عضو يطرحها فى القسم عادى كاى موضوع .. عشان يضمن مشاركة الاعضاء ومشاهدة موضوعه

    والوقوف جنبه لحل مشكلته

    وبعد حل المشكلة برجاء اضافة الحل هنا لمساعدة الاعضاء اللى بيمروا بنفس المشكلة ومساعدتهم

    تحياتى

    منسق القسم

    محرر فى دعم اتخاذ القرار بوزارة الاعلام
    قليل المشاركة فى الموضوعات والرسائل الخاصة لانشغالى بالعمل
    برجاء الاتصال بى : 01288814049


  7. #7

    الصورة الرمزية Bishoy.Girgis

    رقم العضوية : 30571

    تاريخ التسجيل : 20Jan2009

    المشاركات : 5,542

    النوع : ذكر

    الاقامة : EGYPT

    السيارة: Toyota Corolla 1996

    السيارة[2]: Nissan Sunny 2OO9

    دراجة بخارية: I Don't Like It

    الحالة : Bishoy.Girgis غير متواجد حالياً

    افتراضي -

    سؤال من العضو peaceman

    صوت تركات و مرتكزة من الناحية الشمال للطابلوه ؟

    الاجابة من العضو peaceman

    وجد المهندس انه يوجد بوش في الدركسيون و المفروض ان الدركسيون يكون مظبوط علي 35 ملي لكن وجد بوش اكبر من الطبيعي
    بعد الفحص و تظبيط البوش اصبح الوضع طبيعي جدا و لا يوجد اي تركات و اصبحت العربية ناعمة جدا و الموضوع طلع كل البعد عن المساعدين


    http://www.nilemotors.net/Nile/223960-a.html


  8. #8

    الصورة الرمزية FBIAhmed

    رقم العضوية : 43360

    تاريخ التسجيل : 11Jul2009

    المشاركات : 1,495

    النوع : ذكر

    الاقامة : egypt cairo

    السيارة: nissan sunny manual 2011

    السيارة[2]: skoda felicia 1997

    الحالة : FBIAhmed غير متواجد حالياً

    افتراضي -

    المشكله: تنشيع زيت فتيس على جسم الفتيس نفسه ما بين حلتين الفتيس

    الحل: فك الفتيس من السياره ثم فك عدد 9 مسامير بالفتيس نفسه و فصل حلتين الفتيس ثم التنظيف بينهم جيدا و اضافه السيلكون ما بين حلتين الفتيس و ربطهم مره اخرى و تركيب الفتيس في السياره


  9. #9

    الصورة الرمزية د.أحمد السعيد

    رقم العضوية : 60554

    تاريخ التسجيل : 31Jan2010

    المشاركات : 2,471

    النوع : ذكر

    الاقامة : KAFR EL SHEIKH & MANSOURA

    السيارة: SUNNYنبيتىEx automatic 2010

    السيارة[2]: NUBIRA 2001 AUTO BLACK

    دراجة بخارية: لا

    الحالة : د.أحمد السعيد غير متواجد حالياً


  10. #10

    الصورة الرمزية goudamahdy

    رقم العضوية : 103886

    تاريخ التسجيل : 16Jun2011

    المشاركات : 304

    النوع : ذكر

    الاقامة : Fayoum

    السيارة: نيسان صني 2011

    السيارة[2]: هيونداي اكسنت

    دراجة بخارية: لا يوجد

    الحالة : goudamahdy غير متواجد حالياً

    افتراضي -

    hasad">

    السيارة : نيسان صني 2011 مانيوال abs
    السلام عليكم ورحمة الله وبركاته

    أولا شكرا لإدارة هذا المنتدى الرائع علي تثبيت هذا الموضوع الأكثر من رائع لأخونا المبدع م. احمد مصطفى
    أنا موضوعي كتبت فيه التكلفة بتاع الموضوع زيادة يا ريت تنال اعجابكم

    المشكلة :

    ترشيح زيت من مكان الفتيس بعد صيانة ال 5000 مباشرة .
    الحل :
    كشفت عليها عند الميكانيكي قالي ان المشكلة في حتة جلدة في الكوبلن اسمها الاولسيه بتاع الكوبلن.وكلمتهم في السبع بتاع المعادي وقولتلهم ع المشكلة وغيرولي الجلدة دي هناك ببلاش . ما اخدتش وقت خالص.



    المشكلة :
    الفانوس القدامي شمال بيفصل .
    الحل :
    كان فيه قفلة ف الذراع بتاع الاشارات وفكوه ف السبع وصلحوه .....مجانا.


    المشكلة :
    خبطة في العجل القدامي مع المطبات.

    الحل :
    فكو علبة الدريكسيون وربطوا الصامولة بتاعتها كويس ..... الخبطة راحت والدريكسيون تقل شوية بس عادي......مجانا

    والسلام عليكم ورحمة الله وبركاته



 
صفحة 1 من 7 1 2 3 4 5 6 ... الأخيرةالأخيرة

المواضيع المتشابهه

  1. مشاركات: 17
    آخر مشاركة: 17-07-2014, 02:31 PM
  2. برجاء من محبى قسم نيسان الدخول واختيار لقب لقسم نيسان والتفاعل
    بواسطة Bishoy.Girgis في المنتدى نيـــــــــسان
    مشاركات: 68
    آخر مشاركة: 03-03-2011, 01:09 AM
  3. شماسات نايل موتورز بلوجو نيسان لقسم نيسان
    بواسطة Ahmed.TV في المنتدى نيـــــــــسان
    مشاركات: 38
    آخر مشاركة: 18-09-2010, 08:05 PM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2