الموضوع: أعمل ايه أنا بقى ؟؟

عندى مشكلة رخمة متعلقة بشغلى
انا عندى مكتب استيراد وتخليص جمركى
وطبعا شغل التخليص الجمركى بنتعامل مع الموظفين بالجمارك
واللى سبقله تعامل مع الفئة دى من الموظفين هيعرف ان 90% أو أكتر منهم مستحيييييييييييييييل بل من رابع المستحيلات انه يمشيلك شغلك الا لما تدفع :( حتى لو شغلك مظبوط وورقك سليم
المهم جينا بعد الثورة قولت للناس اللى شغالة معايا اننا مش هندفع تانى ونستغل حماس الناس فى القضاء على الرشوة ونتفق مع باقى المخلصين انهم مش يدفعوا
وهنا كانت الطامة الكبرى
ملفتش حد عاوز يبطل دفع الا قلييييييل جدا ...الناس اتبرمجت .. يقولك لو مدفعتش شغلى هيقف..طب يا عم ما لو كلنا اتفقنا على مبدا واحد محدش هيعرف يوقفلك شغل..يقولك لا انا مش هينفع ...وطبعا لو واحد فضل يدفع هيخلى كل الناس تدفع
صمتت اننا مش هندفع رشوة تانى وبدأنا نتعامل مع الموظفين
موظف واحد فقط واحد بس اللى قال انه مش هياخد فلوس تانى .. قولنا كويس اهو يبقى بداية.. بس طبعا ازاى ميستفدش مننا ؟؟..بقت طلباته عينية مش نقدية
اما باقى الموظفين رفضوا الموضوع ده تماما ..واتفقوا كلها علينا
فى حاجة اسمها التتمين فى التخليص وهى ان فيه شخص وظيفته انه يقدرلك قيمة البضاعة ..ملوش دعوة بالفاتوة اللى معاك
هو ليه الحق انه يزود فى القيمة
المفروض ان فيه قوانين للموضوع ده ..بس مش بتتنفذ ..وكله بيبقى خاضع للأهواء الشخصية
المتمين دول بقى على قد ما تديلوا يظبطلك السعر...وبم اننا مش بندفع مفيش فاتورة الا ولازم يحسنلى السعر
يعنى هدفع العميل جمارك زيادة وغرامات قيمة :((
ده غير تفاصيل تانية كتييير كل مرجلة فى الشغل لازم اقعد فيها يوم عشان اخلصها
لدرجة ان سمعتى بقت زى الزفت ...كتير من العملا بتوعى سابونى
انا عملت البدع عشان اوقف موضوع الرشاوى ده لدرجة انى طبعت استيكر ولزقتلهم على أبواب مكاتبهم
ولما فاض بيا الكيل روحت اشتيكى لمدير المجمع اللى هو الرئيس بتاعهم ..قالى شوف انت مزعل الناس فى ايه وصالحهم !!!!!!
ملقتش فايدة فى الناس دى ...للأسف رجعت أدفع رشاوى تانى :(

أعمل ايه انا بقى ؟؟؟

المشاركة الأصلية كتبت بواسطة sayed911

والله انا شاب صغير ومعنديش خبرة في تعاملات الحياة ولكن انا ها اقول لحضرتك انا بمشي ازاي ..
انا ها ادخل على الموظف ومعايا معاملتي ..
اتفضل ..
تنح واستغبى ..
يتدي صوتك يعلى .. (بس بأدب ) لا مانع من شوية طرطشة بكلام وتلقيح بالرشاوي مش ها تندفع !!
ولا يمنعه بعض التهديد بأن اللي بيقبل على نفسه مال حرام ربنا مش ها يباركله .. وهدد الموظف انه اذا المعاملة مخلصتش دلوقتي حالا فيه طرق اسمها القانون يجيلي حقي وانا واقف زي ما فيه قانون بيمى الإعتداء على موظف حكومي اثناء تأدية عمله فيه قانون اسمه تعطيل سير العمل بلا وجه حق (مفيش حاجة بالإسم ده طبعا ) بس اهي بتخليهم يتلبشوا .. صدقني تنح معاك تنح انتا اكثر واعمل معاه هندي واثبت على موقفك انا بحيي فعلا فيك الروح الثورية بجد لو كل واحد بيخاف على مصلحة بلده كلنا شغلنا ها يمشي .. توكل على الله وياريت تطلعنا بالمستجد مع حضرتك

المشكلة انهم شايفين الموضوع مش رشوة ..ده حقهم

المشاركة الأصلية كتبت بواسطة xander2010_evo

+111111111 زي ماقال سيد
عيش ف دور اللمبي مع الناس دي ومتخليش حد يأثر علي رأيك وهدههم
وحاول تسجلهم فيديو أو صوت ويفضل فيديو بالموبايل حتي وإستدرجهم الأول لحد مايطلبوا منك الرشوة
وإنتا بعدها قول "لأااااااااااااااا إنتوا يا تمشوا الشغل ده بما يرضي الله لا إما هفضحكم"
وبس ياسيدي هيمشوا زي الألف

انا عملت اللمبى وحزلئوم وكل العبط اللى فى لدنيا
بس كان فى الاول قبل ما اتعرف هناك ...بس لما تبقى بتروح هناك لك يوم مش هتدخل عليهم
ده قب كده واحد قالى روح لفلان عشان انت نسيت تحاسبه

المشاركة الأصلية كتبت بواسطة a7med_pharma

زي مالرجالة قالوا
بص
تعمل تمثيلية .. وصدقني هتجيب
خد معاك واحد صاحبك أو قريبك..ويكون لابس كلاسيك
وخده معاك مرة .. وخليه يعلي صوته .. ويعيش في دور وكيل النيابة أو مستشار ..ويعلي صوته
ويهدد ويوعد..ويقول طيب أنا رايح أقدم فيكم بلاغ للمجلس العسكري..وخلي الكلام يطرطش ويغرق الدنيا
صدقني
المرتشي بيبقا خايف...ولو عليت صوتك على موظف واحد فيهم..وزعقت له بالإسم وصوتك علي
هيخاف
جربها مرة ومش هتندم

المشكلة ان مش أى حد ممكن يدخل المينا لازم تصاريح وحوارات...ودول عالم بجحة ..والمشكلة ان الشغل كله مترتب على بعضه يعنى لو عديت من واحد التانى هيوقفنى عشان خاطره

المشاركة الأصلية كتبت بواسطة mahmoudselim

بصراحة انا معنديش حل لان انت الوحيد القادر علي ايجاد حل ( اهل مكة ادري بشعبها) لان انا ماتعملتش في موضوع الجمارك دا قبل كدا نهائي ومعرفش الموضوع هناك ماشي اذاي. بس. اذا كان ليا اني اقول نصيحة ياريت حضرتك تتقبلها مني بصدر رحب. الا وهي ان بدل ما حضرتك توقف دفع الرشاوي علشان الثورة والتغيير , ياريت حضرتك تعملها بنية مخافة الله عز وجل وأنها حرام جدا وذنبها كبيير قوي وشوف الدنيا هتمشي معاك اذاي بعد كدا ان شاء الله ربنا هيفرجها عليك من وسع .

والله حضرتك انا فكرت كذا مرة انى ابطل الشغلانة دى بسبب الرشوة ..بس فيه شيوخ أحلوها من منطلق انك لو مش دفعت شغلك هيقف ..واكيد انا مش بيبقى مبسوط وهو بيدفع ..وربنا أعلم بالنية ...وربنا يفرجها يارب