الموضوع: الحمد لله ..... العربية اللى حيلتى باظت ... باظت ... باظت

بصو بقى . انا عارف انى عكيت . بس ياريت تساعدونى

بصراحة انا متعود اغسل الموتور كل اسبوعين عشان بيضرب زيت بافترى
المهم كل مرة بغسل فيها بعمل الاتى :
بغطى علبة الفيوز - ومكان كتاوت النور ورا النور الامامى يمين لما تفتح كبوت العربية - وبغطى حساس البنزين ورا الموتور يمين ولازق فى الاسبراتير - وكمان بغطى جزء لازق فى الموتور نفسه يمين ماعرفش اية هوة .
الكلام ده عندى فى جنينة البيت عشان ابقى بمزاجى

وبديها جاز ومية وبتبقى مراية

من شوية نزلت اغسل وغطيت كل حاجة ما عدا الجزء اللى لازق فى الموتور يمين ( لو انت واقف قدام كبوت العربية وباصص للموترو هاتلاقية على اليمين )

ادور . مش عايزة تلقط بنزين . ازود بنزين ابدا
سيبتها تنشف وحاولت ادور عند اخواتى على بلاور يطرد هوا عشان انشفها مالاقيتش
وانا ديلوقتى سايبها تنشف وربنا يستر

تعاطفك لوحدة مش كفاية . اتبرع ولو بعلومة . او ادعيلى انها ماتكونش باظت ويقومهالى بالسلامة

والله واشتغلت اشتغلت . والله واشتغلت اشتغلت

الحمد لله رجعت من الشغل . سميت بالله . دور . عصلجت شوية . واشتغلت . صوتها على قوى لدرجة انى كنت هاطفى بس لقيته ابتدا ينزل لغاية اما رجع للاول

الف مليون شكر لمحمد طنانى ولكل من ساعدنى بمعلومة
عايزكو بقى تساعدونى فى موضوع تانى ناوى علية

الموتور بتاعى بايظ
أعراضه : بينطر زيت من الشكمان - دخنه بيضة - بينطر زيت من حوالية - بينقط زيت - الزيت بيقل بمعدل ربع لتر كل 300 كيلو - الصبح لما بدور بيبقى فى صوت تكتكة - بياكل بنزين بافترى ( بمعدل 150 كم فى الصفيحة فو سط البلد من غير تكييف - بالتكييف تقريبا مابيكملش ال 100 كم ) - لما بطفى العربية الموتور بيترج بشدة فى خلال ثوانى ويطفى

الحل :
1 - عمرة
2 - اشترى موتور

طبعا الميكانيكية اختلفو : منهم اللى يقول العمرة احسن عشان يكون الموضوع على عينك يا تاجر وياعالم الموتور اللى هاييجى كويس ولا لا . ومنهم اللى يقول لو فتح على الواسع هات موتور تانى

لو امكن تقولولى على رأيكو