ممكن صور السوبر صالون الهاى لاين 2011
من جوه ومن بره
عرض للطباعة
ممكن صور السوبر صالون الهاى لاين 2011
من جوه ومن بره
السلام عليكم
اخي الكريم
هتلاقي الصور في اللينك ده
هي من بره بس الاختلاف .... من جوه هي هي السوبر صالون
http://www.nilemotors.net/Nile/197128-2011.html
اقعد بالعافية :bye2:
شكراًَ يا باشا
طيب الوان ايه المتوفرة؟؟
معلش سؤال برا الموضوع....بس انا خدت بالى ان حضرتك نويت ان شاء اللة-و ربنا يوفقك-بس عندى استفسار عن الاسعار.....قريت هنا خبر زيادتها.
هل فى تاكيد او نفى للكلم دة؟؟؟؟؟
انا لسه جاى دلوقت من اوتو المهندسين اللى فى شارع سوريا
واتفرجت على الهاى لاين وكان لونها موف
وبصراحة تحففففة خصوصاًَ الفرش البيج
وسعرها لسه زى ما هو 101000
بس المندوب قاللى انها هتغلى 25/4
طيب.....ربنا يطمنك يارررررب
انا كدة كدة باكلم على ال ex
بس كدة اكيييد ما غليتش ان شاء اللة....
هاسأل و اقولكم ان شاء اللة .....
اللة يعافيك.....
لسة قافل مع السبع حالا.....قاللى مانيوال ex من غير ABS عاملة 86
بقولوا يعنى كلة غيلى 1000؟؟؟!!!!! قاللى ايوة :(:(:(
بوص أخر خبر من معرض السبع أن العربيات هتغلى بداية من 1 / 5
ونصيحة مني للأعضاء اللي ناويين يشتروا أنهم على الاقل يحجزوا العربية دلوقتي وبعدين ينقوا الالوان ويخلصوا الورق براحتهم . لأن مدام في أشاعات وكلام ورغي كتير عن أن الاسعار هتغلى يبقه في أحتمال كبير أنها تغلى .
المعرض قالي أنها هتغلى 2000 جنيه
طيب يا جماعة استأذتكوا....ممكن حد يقولى عناوين اماكن معتمدة و موثوق فيها اروح اسأل فيها بكرة ان شاء اللة و اخد عرض سعر للبنك.....ياريت لو ناحية مدينة نصر.....
من ناحية مدينة نصر عندك اتو ايجيبت عند مدرسة المنهل , ولو تروحلهم تقولهم انك من النايل موتورز من طرف احمد مصطفى وتسال على استاذ عبد الخالق هناك او استاذ عادل سعيد مدير المعرض , وهما حيظبطولك الدنيا
وفى كمان فى مدينة نصر عند الساعة فى الطريق اللى فيه الرقابة الادارية , يونايتد جروب ده موزع معتمد
وعندك فى نفس الطريق قدام بعد ما تطلع الكوبرى تلف اول لفة , اول ما تلف فى شارع يمين صغير ادخل فيه فى اوله فيه السبع , بردوا ده موزع معتمد
واللى يريحك في كل دول اعتمد معاه
تحياتى
وبخصوص اللى عايز يتفرج على السوبر صالون
ده الموقع الرسمى لنيسان وفيه صور للصنى السوبر صالون
Nissan SUNNY : Overview
فى كل حاجة
أزيك يا حسين أخبارك أيه؟؟ يارب تكون بخير وكويس وشكراً لأنك فاكرني وفاكر تسأل عليا.
بوص أنا الحمد لله استلمت العربية من السبع موتورز يوم السبت بس أنا مضايق شوية بسبب شوية حاجات حصلت معايا ولسه لحد دلوقتي مرخصتش العربية .
بالتفصيل : ( معرض السبع معرض محترم ولما بمشي في الشارع بشوف بنسبة 99% من عربيات نيسان بتكون من السبع) بس اللي حصل معايا زهقني بجد وخلاني اتخنق . أنا كنت طالب العربية لونها دهبي مع كسوة بيج والكلام ده من يوم 4 / 4 وبعدين الراجل اللي شغال في المعرض قال ليا كلها يومين وتستلم العربية وعلى كده يا حسين . كل لما أتصل بيه يقول ليا يومين وتستلموا العربية كل لما أتصل بيه بعد ما اليومين يعدوا يقول ليا يومين وتستلم العربية . فين وفين أتصلت بيه يوم الخميس اللي فات قال ليا مبروك العربية وصلت وحضرتك تقدر تيجي يوم السبت ده تستلمها وترخص على طووول . قولت كويس تمام أوي .
فوجئت يوم الجمعة بالليل بالراجل بيتصل بيا بيقولي يا فندم معلش العربية اللي جت لونها فيراني مش دهبي ولو حضرتك عايز اللون الدهبي هتدفع 2000 جنية زيادة وهتستنى كمان يومين عشان العربيات غليت . دمي أتحرق يا حسين والله حسيت أن الراجل حوارات منين بيقولي العربية وصلت ومنين يقولي دي فيراني وبعدين انا مالي ومال العربيات تغلى ولا لأ . أنا حاجز العربية من يوم 2 / 4 وأخترت اللون يوم 4 / 4 وعرض الاسعار اللي هو عمله بسعر العربية قبل ما تغلى . المهم روحت يوم السبت شوفت العربية الفيراني وبصراحه عجبني اللون وعجب أخويا كمان اللون وقالي توكل على الله ده لون جديد ويستحمل البهدلة شوية . كملت الاجراءات يوم السبت واستلمت العربية بقوله عايز ارخض بيقولي لأ حضرتك هتستنى يومين كده لحد ما الورق يوصل بتاعها عشان لسه موصلش لحد دلوقتي . وقالي هنتصل بيك يوم الاحد عشان نقولك أول لما الورق يوصل ونتابع معاك .
بوص يا حسين لا بيتصلوا ولا بيسألوا في الواحد وعدى الاحد وأدي الاتنين اهو محدش أتصل وأضريت اروح ليهم اشوف أيه أخرة الموضوع ده قالي حضرتك تعالى بكرة أستلم ورق الترخيص .
خلاصة الموضوع : مفيش أهتمام بالعملاء خالص . أنتا اللي بتقعد تتصل وتسأل على معاد العربية هتستلمها امتى وانتا اللي بتابع معاهم كل شوية على الموبايل ويا ردوا يا مردوش وحتى لما بتصل على التليفون الارضى محدش بيرد . والورق بتاع الترخيص محدش سأل فيا ولا عبرني وأضريت أروح عشان أتابع الورق هاخده امتى . المواعيد اللي بيدوها للعملاء أي كلام في أي كلام كل ما تقول ليهم حاجه يقولوا ليك يومين وتستلم يومين وتاخد الورق والواقع غير كده . لما أشوف بكرة ايه اللي هيحصل .
انا وعدت اني أعمل تقرير أستلام للعربية هنا بس لما بس أستلم الورق والامور كلها تستقر .
بالمناسبة الهدايا بتاعتهم أي كلام ( ميدالية مفاتيح تعبانه / دواسات العربية موكيت تنفع دواسة للحمام / الشماسة مفتحتش الكيس بتاعها لحد دلوقتي عشان مصدمش / في الاخر فواحة تعبانه وحطين عليها دعاء السفر عشان محدش يرميها ) أه ودفتر الكوبونات اللي أصلاً في أعتقادي أنهم في التوكيل بيزودوا على فلوس الصيانة خمسين جنية عشان لما تديهم الكوبون يخصموا الخمسين جنيه الزيادة بما أنهم عارفين انك تبع السبع فأكيد عاملين حسابهم على 50 جنية اللي هتتخصم .
وبعدين أنا سمعت أن صيانة 1000 كيلو مجاناً هل ده صحيح ولا لأ؟ سؤال تاني: سعر تركيب السينسور كام في التوكيل؟؟؟
قولي رأيك يا حسين أيه وياريت لو الاعضاء تشارك برأيها كمان ولو حد مر بتجارب زي دي يقول لينا لو سمحتوا .
شكراً ليك يا حسين وشكراً للجميع ودمتم سالمين وبخير
أدعولي
ابو حميد ... ربنا يطمنا عليك انا بخير الحمد لله رب العالمين
ومش عايزك تضايق ولا تزعل نفسك .... كله خير ان شاء الله .. وفي التأخير خير برده
وانا في الاول كنت هاجيب من السبع برده واخدت عرض السعر وكل حاجة ... بس قدر ربنا اني أتاخر علشان اجيب من اوتو ايجيبت
وتقريبا المعاملة كانت بالمثل ... بس معايا كانت بمكالمات كتيييييييييييييييير اوي ... كل يوم 2-3 مكالمات .... مش عارف السبب ايه ... طبعا بعد اقناع شديد بتغير العربية اللي دماغي باي عربية واقفه عندهم
يعني مثلا كنت عايز مانويل ABs ... قالي في مانويل عادي وانت هاتحتاج الABS في المانويل ليه؟ ده للاوتوماتيك بس
ونفس الكلام للون اللي كنت عايزه.
,وبالنسبة للسبع .. دفتر الكوبونات ده اللي عامله قيمة ... انا كنت عايز العربية ارخض 1000 ولا اخد الدفتر ده مثلا
والهدايا بتفرق من معرض للتاني وبيوزنوها.
وصيانة الالف فعلا مجانا ... كمصنعية بس .. لكن الزيت والفلتر علي حسابك.
بالنسبة للسينسور ... كان في عرض في مودرن (سينسور + وحدات رفع = 440 جنية )
بس انت وصلت لأيه في الاخر ؟؟
وللفلوس الزياده ديه ....انا شايف انك متدفعهاش علشام مش غلطتك ... ولو هاتدفعها يبقي في مكان تاني غيرهم حتي لو هتتأخر.
ربنا ييسرلك الخير وتستلم بكل خير ان شاء الله
اقعد بالعافية :bye2:
اولا الف مليون مبروك الاستلام على خير وعقبال الانفينتى باذن الله
بص موضوع غلو الاسعار ونقص العربية عامل قلق جامد ولخبطة فى جميع المعارض الفترة دى مش فى السبع بس والله على كل الموزعين المعتمدين كلهم
بس بصراحة احييك على تمسك بالعرض القديم وكويس انك اخترت اللون الفيرانى ده , لون شيك جداااا بسم الله ماشاء الله
موضوع الورق العربية المصنع بيبعتها وبعد كدا بيبعت الورق بتعها تانى يوم , وبعد كدا بيتختم من الادارة فى السبع , يعنى بتاخد حوالى يومين فعلا ,لانه مينفعش يديك العربية من الارض الا لما يكون الورق جاهز وتطلع على المرور على طول ومفروض ان في مندوب هناك بيخلص معاك الورق بتاع العربية , ده اللى اعرفه واللى متبع فى اتوايجبت ومفروض يكون متبع فى كل الموزعين المعتمدين
وبخصوص الهدايا , هى دى الهدايا اللى بيقدموها بتكون هدايا بسيطة تقديرا للعميل , ومش وحشة بردوا لان لان الهدايا دى بتوزعوها باقى الموزعين بردوا , وتقريبا هما اللى مع حسين وشكلهم معقول وشيك , وممكن تفرق الهدايا من موزع لموزع فى مثلا ستارة زيادة , او سنسور باركن , وممكن موزع تانى ميديش حاجة خالص اصلا
موضوع كوبانات الخصم , بالعكس دى الحاجة الوحيدة اللى بتميز السبع عن باقى الموزعين فيها و عشان ليه تبعه موضوع مركز الصيانة , فكوبون الخصم فعلا عملى وبيتعمل بيه , واسعار المصنعيات ثابتة مفهاش لعب ومتسعرة من نيسان , حتلاقى مصنعية السبع زى مصنعية مودرن وممكن فى اختلاف بسيط بينهم يكاد لا يذكر , والكوبون الخصم اللى بتاخده بيتعمل بيه وبيعملولك الخصم فعلا
وفى ناس مش بيفرق معاهم وفى ناس بيفرق بس هو مش وحش ابدا لانه خالى بالك اكنك اخدت خصم 1000 جنيه على العربية
وبخصوص صيانة الالف فعلا مجانية من ناحية المصناعيات لكن بتحاسب على الزيت والفلتر بس
وبخصوص عرض السنسور حتلاقيه يا استاذ محمد فى موردن ب440 جنيه وتركيبه 55 جنيه وحدة رفع بترفع زجاج زجاج تايوانى
ومعاها سنسور ركن , ولسبع مش بتركبه ولا عندها اكسسورات , ووقت لما تحب تركبه قولى وانا اوصى الناس عليك واحاول اجبلك خصم فيه لو قدرت فى مودرن اوبورواش
الف مبروك مرة تانية , وربنا يعطيك خيرها ويكيفك شرها
تحياتى ليك
أنا مش هقول الاعضاء لأ خالص .... أنا هقول أخواتي حسين وأحمد بجد ربنا ميحرمنيش منكم أبداً أبداً ولا من ردودكم السريعة وشرحكم الوافي . يارب يبارك ليكم ويحفظكم ويوفقكم في حياتكم ويكتب ليكم الخير في كل حاجه .
بجد أنا سعيد بردودكم الجميلة والشرح الوافي . بس ليا تعليق صغير يا أحمد : هو فعلاً زي ما حسين قال ساعات بعض المعارض يقعدوا يزنوا على الواحد عشان ياخد العربية الموجودة بأي لون كانت وأي مواصفات وسبحان الله في الاول والاخر نصيب واللي كاتبه ربنا ليك هو اللي هتاخده . الفكرة أن يمكن برضو (بحس بيهم أو بحط نفسي مكانهم) هما مسؤوليتهم التسويق والبيع ويمكن هما بيعملوا كده عشان دي طبيعة شغلهم وبرضو في الاول والاخر القرار بيكون ليك . بس عندي نقطتين مهمين هما اللي خنقوني أول حاجه بأفتراض أن اللون اللي كان موجود ومتوافر لون وحش مثلاً ومش عجبني خالص ساعتها كان لازم عليا يعني هدفع 2000 جنية زي ما هو قال؟؟؟ أنا كنت حاطط في دماغي أني هعمل مشكلة كبيرة بسبب الموضوع بتاع الفلوس ده عشان انا حاسس أنه بيستعبط الواحد وبيستهبل وحاسس ان التقصير في النقطة دي كان من المعرض ذات نفسه أنه محجزش العربية بدري من المصنع فتقريباً الزيادة هتطبق على العربيات اللي جايه بعد كده .
النقطة التانيه : فين المتابعة منهم للعملاء لما هما بيدوا مواعيد ان الاستلام بعد يومين وميحصلش ليه ميتصلوش بالعميل يعرفوه ويحطوه في الصورة عشان يكون عارف . أفرض العميل هيسافر او مرتب أموره على مواعيد معينه ساعتها الوضع يكون عامل أزاي ؟؟؟ وبعدين المعلومات اللي أنتا قولتها يا احمد عن فترة اليومين والورق أنا أول مرة اعرفها منك . فرأيك يا حسين انتا واحمد مش المفروض كانوا قالوا ليا على المعلومات دي وفهموني الدنيا فيها أيه ؟؟ انا مقدرش أخد أجازة من الشغل بمزاجي ولازم اكون مبلغ قبلها فنظام اللعب ده وتسكيت العميل بأي كلام مش لذيذ خالص .
أما بالنسبة للهدايا فصدقني هي مش فارقة معايا أوي والحمد لله يارب على كل حال والحمد لله على نعمك وفضلك علينا .. يا جماعة أنا كل لما بشوف حد بيركب مواصلات او كده في الجو الحر ده والزحمة دي . أقول الحمد لله أنه يسر لينا العربيات دي
قولوا الحمد لله ..
أما بالنسبة للأكسسوارات فخلينا نتكلم الاول عن الكسوة أنا عايز أركب كسوة جلد لون بيج . هل في أي أقتراحات أو حد معين أروح ليه ؟؟ أنا ساكن في المعادي وبصراحه انا عايز حاجه عادية يعني كسوة جلد كويسة وتستحمل مش لازم حاجه مميزة و رياضية أوي
اولا مفيش شكر على واجب احنا اخوة وتحت امرك فى اى خدمة بجد , ولو كنت اعرف حد فى السبع كنت ظبطلك الدنيا والله
بس انت عندك حق فى موضوع التعامل , بس حقولك على حاجة بحكم ان اتعاملت مع كذا مندوب مبيعات , هما مش بيقدروا يتصلوا بيك لسبب لان مش عندهم معلومات وصلوا ليها عشان يبلغولك فببينظروا لغاية ما يوصلهم معلومات , فممكن تكون المعلومة اتاخرت عشان كدا مش عارف يكلمك , بس بردوا ده مش حجة طبعااا
فى اتو ايجيبت فرع مدينة نصر , بصراحة وده تعاملى معاهم ناس قمة فى التعامل مع العملاء بجد
وموضوع الورق ده عرفته منهم عشان هما موزعين معتمدين فقالولى موضوع قصة الورق ده , وطبعا اكيد اغلب الموزعين المعتمدين بيشتغلوا بنفس الطريقة , العربية بتيجى تانى يوم بيجى الورق وبيتختم من الشركة تبعهم وبتطلع ترخص بعد يومين
وممكن تكون العربية واقفة فى المعرض وحظك موجودة ويكون المصنع بعت ورقها بس مش ي\حيسلمهالك وتخرج بيها وتيجى تانى يوم ترخص او بعدها بفترة وبراحتك , بيخاوفوا ليحصل حاجة للعربية ولما تيجى ترخص لو العربية حصلها حاجة حيكون صعب الترخيص ,
وبعدين انا بلوم فعلا معاك السبع فى النقطة دى ان كان مفروض يوضحلك النقطة دى ويقولك عليها , بس وارد الخطا فى اى مكان طبعا معلش اصبر عشان العروسة الغالية ههههههههههههه
وبردوا بخصوص موضوع اللون القديم مفروض عرض السعر ده عشان تحجز بيه العربية حوالى 1000 جنيه , بس لو فى تغير فى الاسعار يبقا مفروض تدفع ملبغ كبير تقريبا بيصل الى 20 الف , عشان السعر ده اللى بيتغير هما مالمش ذنب فيه , لان خالى بالك مفيش لعب فى الاسعار والاسعار مع الموزعين المعتمدين بيكونوا كلها واحدة ومحدش بيقدر يحط سعر زيادة عن التانى
فاى اى تغير فى السوق من نيسان نفسها وزيادة من التوكيل , عشان تلحق وتاخد بالسعر القديم يبقا لازم تدفع ملبغ اكبر , ولازم هما يقولولك الكلام ده ويتصلوا بيك عشان تلحق تقدم ملبغ حجز اكبر , زى ما حصل مع حسين وقت ما حجزنا عربيته وكنت معاه واكيد هو حيكيلك الموضوع ده
بردوا كان حيدفع الف جنيه ولما عرفوا فى اتو ايجبت ان السوق حيتغير الاسعار فيه والعربية حتزيد قالوله الحق وتعالى احجز بمبلغ اكبر , وده اللى عمله
بس موضوع اللون الحمد لله ان الموضوع ده حصل للخير ومن عند ربنا عشان متدخلش فى دومات وصراعات ووجع دماغ , وبعدين خلاص بلاش نحكى فيه واحلم بالخير وجهز للعروسة شوية دلع وحركات بقا
بخصوص موضوع الفرش , وقت ما تستلم وعايز تركب فرش , كلمنى واقابلك تركب فرش للعربية عند جينز كار , وهو عامل الفترة دى خصومات بمناسبة عيد ميلاد المنتدى , وكمان حجبلك خصم كويس لما اروح مع حضرتك ونقابل استاذ احمد مشعل صاحب المحل , وهو حيقوم بالازم وحتركب فرش معتبر وخامات عالية مستورد خامات المانى بتقفيل عالى , وهو مكانه فى مدينة نصر بس للاسف مالوش فرع فى المعادى , وده افضل محل مضمون لتركيب الفرش وبيعطى ضمان 5 سنين على تركيب الفرش وخاماته , وكمان بيتعامل مع المنتدى وبيعمل خصم اضافى اكتر لحاملى استيكر المنتدى
فوقت ما تحب اظبطلك الدنيا معاه
وان شاء الله تستلم على خير , وبحى فيك قناعتك الجميلة دى وربنا يكرمك يجزيك خير
وان شاء الله تكون معانا دايما ومنورنا , ومتخدكش بقا العروسة مننا بعد ما تيجى بالسلامة
تحياتى ليك
على فكرة شكل المعارض كلها كدا
انا حجزت فى طنطا والراجل قاللى موضوع اللون ده مضمنهوش
انا هيجيلى عربيات الاسبوع الجاى واللون اللى يعجبك فيهم خده
انا قلتله على الفيرانى دا مش عارف بقى هييجى ولا ايه
على فكرة يا محمد انا برده بيحصل معايا بداية الي حصل معاك
انا حاجز عند المصرية للسيارات و خلصت موافقة البنك وكل حاجة و رحتلهم اهه بقالي أسبوع
كل يوم هنستلم النهارده من المصنع هنستلم بكرة معلش أحنا أسفين أصل المصنع وقف الأنتاج
كلمت نيسان نفسهم خدمة العملة أكدتلي أن مفيش حاجة من الكلام ده و المصنع شغال و مقفلتش معايا إلا لما بعتت ميل للمصنع وقلتلي اول ما يجلي رد هبلغك
المهم الراجل بتاع المصرية كلمني النهاردة و قالي في عربية واحدة بس الي جت بس لون تاني غير الي انا عاوزة. رفضته فقالي طب خلاص براحتك"بس بعد ما عمل هو وكل الي في المعرض تمثيليات عشان أخدها" بس كدة هتستنى أسبوع كمان عشان المصنع أجازة من الجمعة حتي الأثنين
يا مسهل الحال يا رب