اول موضوع ليا بعد الايقاف.. بقيت عامل زي ابراهيم سعيد.. كل شوية اتوقف
العربية كانت عاملة 9800 كم.. قلت فرصة احجزلها صيانة العشرة في الويك اند .. و عرفت ان الصيانة بتبقي في القطامية اسرع و حجم الكفاءة افضل من روكسي...
روحت امبارح الساعة 11 و في الميعاد.. دقيقتين و لقيت الموظف المختص بيستلم العربية بكل همة و نشاط و قاللي آخرك الساعة 2 ! قولتلو ماشي.. مش ورايا حاجة... طلعت الاستراحة لقيت ما شاء الله بشريـــــــــــــــــــة!
استلمت العربية بعد ما اتفرجت علي فيلم خالتي فرنسا و سواق الهانم الساعة 3 و ربع!
ماضايقنيش الانتظار علي قد الاتي:
1- الموتور عندي الوحل انضف : باشا عايزكوا تغسلوا الموتور.. لا و الله اصل المية مقطوعة.. طبعا دخلت الحمام و اتوضيت 100 مرة و المية ما شاء الله زي الفل.. نزلت الورشة تحت لقيت الحنفيات شغالة و كله تمام... مش عارف بقي ده توفير مية و لا توفير جهد.. و اللي غاظني انه قاللي ماعندناش مية.. بس فيه فوم (صابون).. ايه رأيك..؟ كنت عايز اقوله علي اساس ان انا حاشطفها لما اروح؟
2- محمد زكي - الالتزام و الثقة... فين الالتزام بالمواعيد مالقتش بصراحة.. كان معايا 4 ميعادهم الساعة 11
3- الاوضة بتاعة الاستراحة كانوا قافلين التكييف فيها.. فكانت عاملة زي المفرخة .. نزلت قعدت في معرض رينو.. جالي واحد (عامل فيها مهم) لأ اتفضل من هنا.. حاشغلكوا التكييف حاضر.. جه واحد ولع سيجارة قاللوا ممنوع تشرب هنا و هو في ايده سيجارة و الله!
4- و لو انه مش مهم.. بس ليه كيك مولتو مثلا باتنين جنيه و راسكو بجنيه و كل حاجة بضعف السعر؟! احنا مش سياح يعني..!
5- العربية دخلت واحدة و نص - اتنين ... بعد ما انا نزلت و قلتلهم ايه الحكاية؟!
المهم الصيانة اتكلفت 382 جنيه.. اللي يهمني ان العربية كويسة الحمد لله و شكلهم عملوا Check علي فرامل اليد.. و محدش قال اي ملاحظة (عشان انا مركب زينون بره التوكيل )
المفضلات