تقريرى عن الـ m11 الجميلة
بسم الله الرحمن الرحيم
أولاً . انا اسف جداً على التأخير فى التقرير
نيجى بقى لتقريرى عن العربيه ورأى فيها
انا اشتريتها من معرض سمير ريان اللى قدام نادى المقاولون روحت علشان أجيبها فى نفس اليوم ملقيتش اللون اللى انا عايزة علشان انا كنت عايز لون فيرانى فأضطريت انى احجزها ودفعت الف جنية مرضيوش ياخدو أكتر من كدة مش عارف لية وبعدين استلمتها بعديها بثلاثة أيام رأيى فى المعرض انهم ناس محترمين بس حصل معايا موقف فى المرور مش عارف العيب منهم ولا من التوكيل .
المهم روحت بصيت على العربيه زى ما الأصدقاء اللى فى المنتدى قالولى ومعايا واحد من المعرض برضوا شخص محترم جربنا كل حاجة الكاسيت التكييف الزجاج العدادات العربيه من برة الكاوتش الشنطه النور عالى واطى لو فى اى خرابيش فى الصاج من برة تمام تمام أدونى غطاء وطقم دواسات وميدالية بس كلهم مش قد كدة بس كويس انهم بيدوا حاجة هديه غيرهم مابيعملهاش خدت المفتاح نسختين شيك جداً يلا دور بصراحة ماسمعتش صوت للعربيه صوتها واطى جداً الحمدلله طبعاً مش عايز أقولكو كنت مرعوب أزاى أكنى اول مرة أسوق مش شايف أى حاجة من أبعاد العربية المهم توكلت على الله وقويت قلبى ودوس يامعلم لقيت العربيه بتجرى لوحدها ماشاء الله بجد ياجماعة العربية تحفة الكراسى مريحة جداً العفشه مش ناشفة ومش ناعمه . الباور مش ناعم ومش تقيل بس رائع انا حاسس انو لوكان أخف من كدة هيكون مرعب على السرعات العاليه .
تقفيل العربيه ممتاز جداً جداً من بره ومن جوة . ثبات العربية مش قادر احكم عليه لغاية دلوقتى علشان انا لغاية دلوقت ماعدتش ال 3rpm وبينى وبينكوا لسة باحسس على العربيه .
نيجى بقى ليوم المرور العالمى وأنا فى المعرض قالولى احنا عندنا خدمه اننا ممكن نبعت معاك مندوب من المعرض علشان يخلصلك كل حاجة قولت ومالة علشان ارتاح من الطوابير وقالولى هنبعتلك مع المندوب شهادة ملكية العربيه وورقة المبايعة علشان لسة عايزين يتختموا قولت ومالة بس أدونى ورقه ان انا استلمت العربيه من عندهم سلام سلام .
بعدها بيومين لقيت المندوب بيتصل بيا وبيقولى انى أقابلوا بكرة فى المرور . روحت تانى يوم لقيته مستنينى فى المرور يلا ياعم يلا بشوف شهادة الملكية لقيت مكتوب نوع العربية A113 أتصدمت ايه دة قالى ديى اكيد غلطة من التوكيل طيب انا ممكن أمشيهالك جوا وندى أى حاجة للموظف قولتلوا أزاى ديه زى شهادة ميلاد الطفل ينفع اجيب ولد وتكتبهولى بنت قالى طيب خلاص روح دلوقتى التوكيل خليهم يغيروهالك بالقلم الجاف ويختموهالك وأنا هستناك هنا روحت طاير على التوكيل فى المعادى حكيتلهم الموضوع ووريتهم الشهادة قالولى أكيد دية غلطة بس ماينفعش نعدل فى الشهادة بالقلم أحنا لازم نغيرهالك علشان ماحدش يتلككلك على حاجة بس هاتيجى تستلمها بكرة وطبعاً اليوم أضرب وهضطر أخد يوم أجازة تانى يوم بس بصراحة ناس محترمين وبيخافوا على العملاء نسيت أقولكوا انو كان رقم الموتور ورقم الشاسيه مظبوطين فى الشهادة القديمه
وفعلاً روحت أستلمتها تانى يوم وطلعت على المرور قابلت المندوب خلصلى كل حاجة فى نص ساعه بصراحة ماوقفتش فى طابور وخدت الرخصة وعلقت النمر وتوكلت على الله .
تحياتى لجميع أصدقائى
