عايز انقل ملكية عربية ومش عارف

**deee** · 18-04-2011 06:18 PM

السلام عليكم ورحمة الله ...

يا جماعة انا كنت عايز انقل عربية بإسم والدى لإسمى ..
قاللولى هات شهادة بيانات موجهة للشهر العقارى ..
عملت شهادة البيانات موجهة للشهر العقارى ورحت الشهر العقارى اللى فى الجيزة (انا من الهرم)
ورحت وقالى روح الشهر العقارى اللى فى الادارة العامة (مرور بين السرايات) ..
رحت وجاب صورة عقد وكتب البيانات وقالى روح ادفع الف جنيه ف الخزنة ..

ببوص فى العقد لقيته عقد بيع .. بس موضوع مش بيع انا عايز انقل ملكية .. تنازل مش بيع ..
فهل لازم ادفع الالف جنيه دول ولا فيه طريقة تانية اعمل بيها الموضوع ده لأنى احترت وانتوا عارفين المصالح الحكومية عاملة ازاى ..

هل ممكن اعمل توكيل مثلاً عام ويتسجل فى الشهر العقارى ؟؟

انا بعمل بس الموضوع ده لأنى عايز ابيع العربية فطبعاً انا اللى هابيعها وانزل بيها السوق وكده عشان اخلص انا الموضوع بسرعة .

ياريت يا جماعة تفيدونى ...

وشكراً

**heshamzaky** · 18-04-2011 06:21 PM

أعتقد لازوم تبقى ك بيع و شاراء بس 1000 جنية رسوم تسجيل لية العربية دى موديل 2011 و لا أية و كام سى سى لان الموضوع بيتحدد ب عدد السعة اللترية و سنة الصنع

**eldell** · 18-04-2011 06:31 PM

ممكن تعمل توكيل فى الشهر العقارى عادى وتبيع بيه عادى حرام انك تسجل باسمك وبعدين تبيع

**dr.hazem** · 18-04-2011 06:34 PM

خلي والدك يعملك توكيل بالبيع للغير وانتهى الموضوع على كده ولا ألف جنيه ولا ما يحزنون

تحياتي

**eldell** · 18-04-2011 08:00 PM

المشاركة الأصلية كتبت بواسطة deee

الف شكر يا جماعة على الردود بس معلش استحملونى ...

بالنسبة لموديل العربية 2004 والسعة 1100

دلوقتى انا لو خليته يعملى توكيل بالبيع للغير ده بيتم من اى شهر عقارى وايه الاوراق المطلوبة وكده عشان اكون عارف ..

وهل التوكيل ده بيتيح ليا انى اتمم اجراءات الترخيص فى المرور بموجب التوكيل ده ؟؟ لأن الرخصة منتهية

ومعلش سؤال أخير ..
انا دلوقتى عملت شهادة البيانات .. ودفعت ضريبة العربية .. هل دى داخلة من ضمن مصاريف تراخيص العربية لما آجى اجدد ؟؟

وياترى تكاليف التراخيص بتكون فى حدود اد ايه ؟؟

شكراً

يروح والدك اى شهر عقارى والتوكيل ده مش بيحتاج الا للبطاقه بتاعتك والرخصه بتاعت العربيه وبعد مايعملك التوكيل تنزل انت تجدد فى المرور بالتوكيل عادى
ديه الحجات الى انا اعرفها وحصلت معايا

**misoalex** · 20-04-2011 06:16 AM

لو الرخصه ساريه كان يعملك توكيل بالبيع للغير وتجديد الرخصه والتعامل امام جهات المرور بالتوكيل ده تقدر تجدد الرخصه بأسم والدك وتبيع العربيه بأسم والدك برضه

لكن الشهر العقارى حيرفض بالوضع ده لان الرخصه منتهيه

هو مش مطلوب اوراق غير تكون الرخصه ساريه ووالدك معاك او عاملك توكيل والرسوم تقريبا 15 الى 100 جنيه حسب نوع العربيه

لكن بالوضع الحالى روح الشهر العقارى وحاول تعمل توكيل بالبيع للغير والتعامل امام جهات المرور وتجديد الرخصه
انا مره صاحب عربيه كانت الرخصه منتهيه وعملهولى بس دفع هو 100 جنيه رشوه :)))

**aymn2003** · 20-04-2011 10:41 AM

عايز اضيف ان التجديد فى المرور لو كان هيكون فيه فحص مع التجديد لازم عقد ملكية مسجل بالشهر العقارى او والدك لازم يروح بنفسه المرور لان التوكيل فى حالة الفحص لايعمل به فى المرور