لمبه التابلوة اتحرقت

**sherif309** · 19-04-2011 11:55 AM

يا ناس افيدونى لمبه التابلوة اتحرقت ومش لاقى غيرها ملفيييت ودورت مش لاقيها خالص عشان عليها غطا ازرق بيدى لون مختلف عن لون المبه
وحتى مقاسها مش لاقى زيها لو حبيت اغير انوار التابلوة اعمل ايه واجيب لمض منين وانسب لون ايه

**nonnos5** · 19-04-2011 03:16 PM

اولا اكتب تفاصيل عربيتك النوع والموديل
تانيا هوه لمبات التابلوه للانسر غالبا بتبقى حجمين واحدة صغيرة بيتقال عليها سفايا
وللاسف دى مش هتلاقى منها غير صينى وانت لما هتشتريها هتاخد الغطاء الازرق اللى
على اللمبة القديمة وتركبه عليها
واللمبة التانية بتبقى اكبر شوية وبتبقى نفس اللمبة بتاع اللوحات المعدنية اللى فى الشنطة
ودى موجود منها المانى هيا بتعيش اكتر من الصينى بس بتسخن شوية
انما السخونة دى مش بتاثر على حاجة واحتفظ بالجلد الازرق اللى على اللمبة القديمة علشان ده
مش هتلاقى زيه ابدا ده بستحمل الحرارة اللى خارجة من اللمبة وبيوزع الاضاءة بشكل متساوى

**sherif309** · 20-04-2011 12:59 AM

شكرا اوى على الرد والاهتمام انا عربيتى لانسر 2003 بومه واللمبه الى اتحرقت هيا لمبه العداد , فيه فى العدادات ثلاث احجام للمبات لمبات الاوتوماتيك ودى صغيرة جدا وبدون غطاء ازرق ولمبات العلامات التحذيريه ودة متوسطه الحجم وبردو من غير غطاء ازرق اما اللمبات الكبيرة الحجم وهما اربعه ودول بتوع المؤشرات وهما دول الى عليهم غطاء ازرق وللاسف واحدة اتحرقت منهم ولما حاولت اشيل الغطاء الازرق كان لازق من السخونه بدرجه شديدة ومتفكش ابدا - المهم انا ربنا عطرنى فى واحد ادانى غطين زرق بتوع لمبات كانت محروقه بس المشكله عندى فى مقاس اللمبه نفسها لانى دلوقتى مركب واحدة تقريبا قريبه من المقاس دة وعليها الغطا بس مش مغطيها للاخر ودة مخليها منورة نور محمر شويه وطبعا دة عملى ازمه فى العدادات
بالنسبه للمبات اللوحات المعدنيه على الشنطه انا مفكتهاش بس متهيالى دى شمامه طويله زى بتاعت الصالون ودى متنفعش للعدادات

كان فى اخ فى موضوع قبل كدة بيقول انه مغير اللمبات دى لاحمر زى السيراتو فيا ريت اعرف ازاى لاقاها او القيها فين وهل هتنفع ولا لاء

بكرة ان شاء الله هحاول ارفعلك صور اللمبه الى اتحرقت عندى بدون الغطا الازرق

**محمد فضالي** · 20-04-2011 01:20 AM

بص ياباشا انت تفك اللمبة من الكعب الأسود بتاعها وتنزل بيها على شارع المحطة بالجيزة أو شارع باب اللوق وتسأل عند الناس بتوع الالكترونيات ان شاء الله حتلاقي عندهم لمبات مقاربة للي راكبه فيها

أنا كان عندي الموضوع ده حصل بس مع لمبة الانتظار اشتريتها وركبتها وهي شغالة زي الفل
اللي يغيظك بقى في الموضوع ده كله ان اللمض دي موجودة في التوكيل بس سعرها يتراوح من 15 جنية الى 25 جنية + 10 % ضريبة مبيعات

حاجة تغيظ مش كده

**nonnos5** · 20-04-2011 04:13 PM

بص ياباشا لو مضايقك موضوع الجزء اللى مش متغطى بالغطاء الازرق من اللمبة
عندى ليك حل بس بصراحة ما جربتوش فى البومة علشان مش عاوز العب فى العداد موقتا
بس انا عامله فى الكريستاله فكيت اللمبات بتاع نور العدادات ولزقت عليهم لازق احمر شفاف
اللى هوه بيتلزق على الفوانيس الخلفية ده من عند بتوع الاكسسوارات
ولزقت كويس على اللمبات وبقت اضاءة العدادات حمراء وجميلة
بس للاسف هتقابلك مشكلة ان اللمبة اللى انت شاريها الاخيرة دى مش اصلية
واللمبات اللى مش اصلية بتسخن اكتر من الاصلية فهتلاقى التابلوه اضاءة حمراء كويسه
بس بعد فترة مش طويلة هتلاقى اضاءة اللمبة اللى مش اصلية دى بهتت
علشان سخنت وسيحت الازق الاحمر وبقى اسود

**ahmed_eng2001** · 20-04-2011 04:26 PM

المشاركة الأصلية كتبت بواسطة msf10129

بص ياباشا انت تفك اللمبة من الكعب الأسود بتاعها وتنزل بيها على شارع المحطة بالجيزة أو شارع باب اللوق وتسأل عند الناس بتوع الالكترونيات ان شاء الله حتلاقي عندهم لمبات مقاربة للي راكبه فيها

أنا كان عندي الموضوع ده حصل بس مع لمبة الانتظار اشتريتها وركبتها وهي شغالة زي الفل
اللي يغيظك بقى في الموضوع ده كله ان اللمض دي موجودة في التوكيل بس سعرها يتراوح من 15 جنية الى 25 جنية + 10 % ضريبة مبيعات

حاجة تغيظ مش كده

انا عاوز اضيف حاجة على كلام حضرتك , ان اللمبات مش دايما موجودة فى التوكيل , لمبتين اتحرقوا فى التابلوه و لما رحت اغيرهم قالولى السعر الى حضرتك قلته ده بس قالولى تعالى اسأل تانى كمان اسبوعين احتمال تكون جات !!!!

**sherif309** · 21-04-2011 08:40 PM

فى ناس قالتلى ممكن القيها فى الحرفيين بتتباع ب10 جنيه بلغطا الازررق الى عليها
مش عرف الكلام دة مضبوط ولا ايه

وبعدين ايه رايكو فى موضوع تغيير ورقه العدادات دى انا شايف اها جميله بس غاليه موووت
مفيش حد عندة حلول تانيه؟

**Ralliart** · 22-04-2011 08:33 PM

روح التوكيل وهما هيغيروها بس متروحش لبتاع قطع غيار روح الورشة نفسها وهما هيركبوها لانهم لما بيبقى عندهم حاجة ناقصة مبيبيعوهاش من غير تركيب

**sherif309** · 22-04-2011 11:31 PM

بشرى الى كل من اتحرقت لمبه التابلوة بتاعته فى البومه
انهاردة انا نزلت الحرفيين وبعد عناء وصلت لواحد بيبيع المبات بالدوايا ب10 جنيه ودة طبعا بعد فصال من 30 الى 10 وطبعا مفيش غيرة بيعمل الحوار دة لان كل الناس بتعتبر خلع المبه من العدادات دى جريمه