السلام عليكم و رحمة الله و بركاته
امبارح الثلاثاء كان احدث مغامراتى مع ال127 بتاعتنا ( بعد الثلاثاء اللى فات بتاع الدبرياج شفتو اللى جرى لى مع دبرياج ال127 ) رحت الصبح مشوار لبابا و بعدين طلعت على المدرسة و كان معايا و احدة زميلتى و جارتى فى نفس الوقت ( و على فكرة كانت معايا برضه يوم الدبرياج ) المهم وصلنا المدرسة و باركن العربية لقيت دراع الفتيس سقط و مش عارفة اجيب مارش و لا غيار . المهم نزلنا و زقيتها و ركنتها . و قلت حاعمل اية ؟؟؟ المهم رحت لسواق عندنا فى المدرسة و قلت له على المشكلة . جاب واحد سواق معاه ( و قاللى انه كهربائى و ميكانيكى و بيفهم فى المواضيع دى "فول اوبشن من الاخر" ). المهم فك الفتيس و حله و قاللى ان المشكلة فى الحشو و ان فية جلبة فيبر مقطومة و علشان كدة بيضة الفتيس بتقع . و قاللى نجيبها من شارع دمشق . المهم راحوا و ما لاقوهاش . و لما رجعوا قلت له طيب ايه العمل؟ قاللى انا حاركبه زى ما هو و تمشى بيها و لو وقعت شديها لفوق و عادى .
انا عملت زى ما هو قاللى . و علشان اطلع بالعربة بقيت ازقها علشان ما بقتشى تجيب مارشدير (حقيقى نعمة ما بنحسش بيها غير لما تروح ) .
رحت على طول للميكانيكى ( و كان برة و رحت لتلاتة غيرة كلهم يا اما قافلين يا اما برة و حسيت انى منحوسة بجد و روحت بيها كدة. لغايط ما الميكانيكى رجع و رحت له ) .
قلت له على اللى حصل فصبى عنده قال لى نركب لها حلقة معدن مكان الفيبر و دى احسن .
المهم عملها . و الفاجأة بقى انه اول مرة من 3 سنين اعرف ان عربيتنا فيها خمسة غيارات مش اربعة و الصبى ده وراهم لى و عرفتهم و الحمد لله .
المهم انا حبيت اقول لكم على الموضوع ده بس للافادة بان ممكن الواحد يمشى لو دراع الفتيس وقع و المشكلة كانت ايه و حلها ايه . و يا ريت تدعولى ربنا يسلمها علينا و عليكم و يستر طريفنا جميعا .