مش عارف اعمل ايه مع الناموس مش عارف انام يا جماعة جربت كذا حاجة :
1- ريد السائل
2- مضرب الكهرباء
مش بحب ريحة البيرسول بيخنقنى وعندى اطفال صغار
ياريت اللى يعرف حل كويس يدلنى عليه
عرض للطباعة
مش عارف اعمل ايه مع الناموس مش عارف انام يا جماعة جربت كذا حاجة :
1- ريد السائل
2- مضرب الكهرباء
مش بحب ريحة البيرسول بيخنقنى وعندى اطفال صغار
ياريت اللى يعرف حل كويس يدلنى عليه
والله انا جربت 3 حلول والتلاتة كويسين :
ريد اكوا اكتيف بدون رائحة: ولان عندى طفل بخاف عليه برده من رائحة البيرسول.
بخور اولعه فى غرفة النوم قبل ما ادخله ينام بنص ساعة وافتح الشباك يهوى شوية.
الاهم بقى هو سلك حاطه على الدرفة الخشب.عشان لو حتى فتحت الشباك ميدخلش حاجة .
ريد السائل ممتاز وملهوش ريحة بس لازم تشغله قبل النوم بساعة تقريبا او اكتر علشان يعمل مفعول ولازم بابا الاوضة يبقى مفتوح
انت جربته محستش بتاثيره ؟؟
انا كنت جايبه وكان كويس جدا ودلوقتي رجعت للاقراص لان حسيته بيخلص بسرعة :)
وفعلا الناموس الايام دي هايج بطريقة مريعة مش عارف فيه ايه
الناموسيه أرخص و أامن
و اجدع ناموسيه مش هتكلف 50 جنيه
شكل الناموسية القماش:
فى منها مدور من فوق بطوق معدن والقماش نازل منها لتحت عامل زى جيبونة فستان فرح العروسه او القمع كده
بتتثبت فى السقف او اى حاجه عاليه وتحوط بيها على السرير وكويسة برضه
الشعب يريد ابادة الناموس
:)
:))
ريد السائل ممتاز خلصت قزازة واشتريت واحده من يومين ب 15 جنيه يدوب تكفي شهر
طيب كان فيه زمان شتلات لشجره إسمها نيم
بتطرد الناموس
حد يعرف تأثيرها قوى وألا أيه
وتتجاب منين
والله يا جماعة انا شايف ان موضوع الريحة بتاعة البيروسول دى نفسى ووهم فقط
اولا الريحة دى ريحة معطر مضاف الية مش ريحة الرزاز
ثانيا المضر فى الموضوع دة هو الرزاز نفسة مش الريحة يعنى بلاش ترش فوقك وتخلى الرزاز ينزل عليك او ييجى فى عينك او على جلدك
======================
افضل حل للناموس بعد تجربة كل الطرق هو الرش
هات راجون كويس جدا جدا وريحتة مقبولة
طريقة الاستعمال - رش الحجرة قبل موعد النوم على الاقل بربع ساعة ثم غلق الحجرة
بعد كدة لو بتنام وباب الحجرة مفتوح هتعكس العملية يعنى ترش باقى الشقة وتدخل الحجرة اللى رشيتها من ربع ساعة وتقفل عليك ربع ساعة كمان وافتح باب الحجرة
وادعيلى بقى - يومين تلاتة من غير ناموس
الا لو بتفتح باب الشقة كتير او الشباك او يكون فى منفذ يدخل منة الناموس
الناموس بيبقى لازق فى باب الشقة من برة واول ما تفتح يروح داخل على طول
سيبك من ريد اكوا دة صحيح من غير ريحة بس مفعولة مش قوى - ثانيا لو استعملتة هتتبع نفس الطريقة لان المضر مش الريحة المضر هو الرزاز - كمان الريحة دى هى اللى بتدوخ الناموس وتقتلة اذا الرزاز مجاش عليها يعنى ابو ريحة فايدتة اكبر
الغيظ من الناموس وقرفه بيولد احساس الإنتقام
ولذلك جبت مضرب ناموس احسن من الرش
واللذة بقه انك تجرى ورا ام الناموسة او الدبانة وتقتلها وتحرقها وتسمع صوت الطرقعة وتستمخ :)
ثم تهدأ وتحس بالقتل اللذيذ زى الفيلم بالظبط :))
ودى هتبقى هواية عندك واهو تمرن جسمك قبل النوم ومش عايز اقولك ابويا بيعمل ايه قبل ماينام
الحضرى بيبقى فى البيت عندنا :D
والمضرب جايبه ب 23 جنيه بس وبيتشحن كهربا وفيه كشاف كمان من تحت
هو شبه ده كده
http://imageschip.com/image-88DC_4D2DE02E.jpg
الجهاز السائل ده احسن حل
أحسن حاجة للوقاية (خير من العلاج) تركب سلك علي شبابيك الشقة كلها وإزاز البلكونات ومتفتحش باب الشقة كتير او تركبله باب سلك هو كمان
بعد كده بقي مش عارف...بس اذا ركبت سلك..مضرب الناموس هيكون حل عملي عشان مش هتلاقي في الشقة غير ناموسة او اتنين من فتح باب الشقة مثلا بس...وممكن متلاقيش خالص
أنا عندي سلك علي الشبابيك والحمد لله ولا ناموسة ولا ذبابة وإذا دخلوا....هههههههه مش بيطلعوا تاني عينك ما تشوف إلا النور...القبر بيلمهم علي طول بأي وسيلة بجري وراهم وأجيبهم والحمد لله إلا بعض الحالات النادرة جدا
وبالتوفيق
يا باشا و عن تجربه , ممكن تحط جمبك و حضرتك نايم على المخده فرعين نعناع اخضر
جربت الصواعق واجهزة الازالو مفيش فايدة
جميع المبيدات الحشرية سواء معطرة او بدون وحتى الريد السائل او الاقراص حتى لو بدون ريحة اكيد مضرة
اصل بالعقل كدة حاجة بتقتل الناموسة او تطردها اكيد ليها تأثير سلبي على الانسان تراكمي
انا عن نفسي اولادي بتجيلهم ازمة نفس من اي حاجة
لقيت ان أأمن حل هو السلك على ضرف الشبابيك
بتجيب النجار بيرفع لك الزجاج ويركب بداله سلك ويعمل ضرفة فوقيه للزجاج
جايز السلك فتحاته واسعة او الشبابيك اتفتحت قبل االمغرب والناموس دخل ومبيت في الشقة
يبقى مفيش قدامك الا الناموسية بس بتعمل حر فظيع لكن مع وجود التكييف كويسة
انا شوفتها في التوحيد والنور
الناموسية أحسن حل , ممكن تلاقيها بتتباع فى العتبة أو الموسكى
بالنسبة للتركيب بتعملها مسمارين فى الحيطه من ناحيه شباك السرير , و تجيب اى خيط يكون جامد و يتربط فى طرف الناموسيه من ناحيه و فى المسمار من الناحيه التانيه , طبعاً انت بتظبط طول الخيط و الأرتفاع بحيث ان الناموسيه تبقى مغطيه السرير كله من جميع الأجناب و مفيش مكان يدخل منه الناموس
بالنسبه بقى لإحساس النوم جوه الناموسيه ما أقولكش
ده الحل الوحيد اللى بيبقى فعال بنسبة 100%
و لما بتصحى من النوم بتلم الناموسيه و تخليها تبقى نازله ورا السرير و ساعه النوم تفردها تانى على السرير , يعنى بالنسبه للمنظر الجمالى و الشكل العام بتبقى مقبولة عادى
زى ما الأعضاء قالو
الناموسيه أفضل و أرخص و أامن 100 %
و فى الغالب انت بتشترى القماش من عند بتوع القماش و دا حسب المنطقة اللى انت فيها بس العتبه فيها أكيد
و القماش اسمه توللى للناموسيات بيبقى مشبك و قريب من بتاع الستائر بتاعة زمان و غالبا فتحاته ضيقة بحيث متعديش الناموس
و السنه اللى فاتت كان المتر بحوالى 3 جنيه
و الناموسيه بتاخد على حسب عرض السرير كام ( انا عندى سرير 160 سم تقريبا كانت واخده 12 متر مش متاكد بالضبط )
و الافضل تروح الاول عند حد من اللى بيفصل الستاير ( شعبى ) مش بتوع الديكور و تقوله عايز ناموسيه لسرير عرضه كذا .... تكلف كام متر و هو هيدلك على عدد الامتار وافضل مكان للشراء
و التعليق كما اوضع العضو الفاضل
بس انا عامل عندى فى غرفة النوم حاجه لذيذه و شيك قوى و هحاول اصورهالك
اللى عمل لى ستاير البيت قولت له اعملى بلتكانه فوق السرير كأنى هركب ستارة خلف السرير و طبعا بلتكانه بنفس ديكور ستار الغرفه
و بعد كده رحت للراجل اللى بيفصل الناموسيات ( و هو بتاع ستاير بس شعبيه يعنى تقليديه مش ديكور ) و قلت له عندى سرير عرضه كذا و تعمللى التعليق بتاعها زى الستارة بالضبط علشان تركب فى البلتكانه اللى فوق السرير
و بالتالى بعد الصحيان بيتم ترتيب الناموسيه لتصبح مثل الستارة بالضبط
بطريقة دكتور احمد هتكون اشيكك من الناموسيات الجاهزة بتاع السوق
دى صورة السرير و الناموسيه مرفوعة ( و احنا صاحيين )
http://i54.tinypic.com/2mnorpi.jpg
و دى صورة ستائر الشباك
http://i53.tinypic.com/33z6vzr.jpg
و دى صورة الناموسيه وقت النوم و لو ملاحظين صورة الستاير فى الوش على الشباك و نفس البلتكانه على الشباك زى اللى فوق السرير
http://i54.tinypic.com/2h87052.jpg
و دى صورة اختراع ليه شخصيا علشان الناموسيه و هى مفروده متخبطش فى الرجلين اثناء النوم
و هى عبارة عن مستطيل خشب له رجلين بيتحط بين المرتبه و ضهر السرير ناحيه الرجلين و طلبت عمله من نجار معرفه
http://i54.tinypic.com/28lgbc8.jpg
و دا منظر قماش الناموسيه
http://i51.tinypic.com/if4bci.jpg
و دى صورة سرير آخر
http://i54.tinypic.com/34huzow.jpg
و بذلك لا نستخدم أى مواد كيميائيه لمقاومة الناموس و هذه الطريقة موفره و آمنه و عيبها الوحيد فى الكسل فى وضع الناموسيه و ترتيبها بعد القيام من النوم
و طبيعى فى عدم وجود تكييف او مروحة قويه ان تشعر بالحر فى الصيف
أتمنى اكون افدتكم
شكرا جزيلا دكتور احمد
الناموسية هيا احسن حاجة .. انا عندي والدي و والدتي عندهم جيوب انفية فا مينفعش يبقى في ريحة رش في البيت .. بس الناموسية مريحة جدا .. كفاية انك تبقى ضامن ان مفيش ولا نموسة هتدخلك .. العيب الوحيد ان باقي البيت هيتملى ناموس عشان انت هتكسل تقتلة ... انا لما بسهر شوية قدام الكمبيوتر او التلفزيون بتعزب من كمية الناموس