مشكلة فى عفشة الياريس

**محمد يوسف** · 20-04-2011 12:48 PM

السلام عليكم ورحمة الله

عندى مشكلة وحيرة كبيرة أتعشم أن تساعدونى فى اتخاذ قرار صح فيها

من أسبوع كنت باظبط زوايا واربط عفشة فى وطنية سيتى ستارز والصنايعى اللى هناك قاللى العجلة اليمين

قدام قافلة لجوه شوية ومحتاجة زرجينة..أنا طبعا نفضت له وقلت له اظبط على كده عشان مستعجل وابقى أجلك

مرة تانية....وبعدين ربط العفشة وقاللى كانت سايبة شوية (وفعلا أنا كنت حاسس بكده) ربطها وبقت أحسن

شوية....وبالصدفة امبارح وأنا فى السابع عند بتاع الدوكو لقيت جنبه عفشجى شكر لى فيه قوى..قلت له بص

لى ع العفشة لقيته نام تحت العجلة الشمال قدام وقعد يمسك المقصات وغيره وكذلك العجلة التانية وبعدن

لقيت بيقول لى العفشة متربطة ممكن أحرق لك عليها بس من غير لزمة لكن انت عندك البارات فيها بوش

ومحتاجة اما تغيرها أو نكبس لك البيض وتمشى معاك سنتين كمان ونصحنى بالكبس وعدم تغيير البارات

الفابريكة وقاللى لو سبتها علبة الدركسيون حاتبوظ والكاوتش حايتاكل عالى وواطى..الخ

أنا بصراحة خايف ألعب فى العفشة وخايف يفكها ويعمل مشكلة فى تركيبها ومش عارف كلامه صح ولا

بيشتغلنى..وهل كلامه مرتبط بكلام بتاع الزوايا؟

العربية ياريس 2008 أتوماتيك كاملة

أرجوكم فيدونى برأيكم جزاكم الله خيرا

**mg_embabi** · 22-04-2011 05:06 AM

أولا ممكن حضرتك توضح ما هي مشكلة العربية يعني بتعمل معاك إية
بس مبدئيا انا بستبعد الزرجينة لسبب ان الكلمة دية شائعة عند بتوع الزوايا بتوع محطات البنزين
يعني من غير أي حاجة يقولك زرجينة و خالاص عشان يعمل شغل و ده عن تجربة
مستني اعرف مشكلتك الرئيسية

**omaroof** · 23-04-2011 08:25 AM

روح لواحد تانى كويس وشوف نفس الكلام ولا اتغير وفى كل الحالات ماتغيرش حاجات الفبريكه

**Samir Elshahawy** · 23-04-2011 10:17 PM

الاخ الكريم..

بداية موضوع الزرجينة ده مستبعد نهائيا طالما أن العربية مش بتحدف معاك يمين أو شمال و ممكن تتأكد بأنك تجيب متر أو مسطرة طويلة و تقيس المسافة من الكاوتش لحد صاج العربية يمين و شمال و تقارن القرائتين ببعض
لو فيه واحدة أكثر من التانية بفرق كبير (يعني 2 سم أو أكتر ) يبقي كده حاجة من أثنين :
- يا أما المقص واخد خبطة و أتعوج شوية و هنا لازم تغيره
- أو الخبطة أثرت في الشاسية و دي الحالة اللي هاتحتاج زرجينة مع أستخدام لينات

برضه موضوع البارات و البيض و الكلام ده مش مقتنع به ألا لو أنت قولت أيه المشكلة اللي بتشعر بيها أثناء قيادتك للسيارة (غربلة - حدفة - أهتزازات )

و عموما عايز رأيي .. أطلع علي توكيل تويوتا بأبورواش و أعمل الصيانة الدورية و قولهم يكشفوا لك علي العفشة و المقصات و يكتبوا لك تقرير عن حالتهم

لو التوكيل بعيد عليك ممكن تنزل مدينة نصر في الحي الثامن - محطة موبيل ورا مدرسة المنهل هناك صنايعي كويس بيقيس زوايا و هايقولك هي محتاجة أيه بالظبط

أو تروح محطة البنزين اللي في أول شارع دمشق قدام نافع هناك برضه ممكن تقيس الزوايا و تعرف المشكلة فين بالظبط

و قولنا يمكن نقدر نساعدك أكتر أو نستفيد من تجربتك

مع خالص تحياتي
م/ سمير الشهاوي

**محمد يوسف** · 23-04-2011 11:44 PM

الأخوة الكرام...أشكركم جميعا لاهتمامكم

هى الحقيقة ماقدرش أقول انها مشكلة رئيسية لكن أنا كنت ملاحظ ان العربية لما بامشى على طريق فيه

تكسير بتترج بيا جامد وبابقى حاسس انى قاعد فى الشارع وده اللى خلانى أروح أربط عفشة..لكن مش

حاسس بأى حدفة فى العربية أو مشاكل فى الدركسيون

بس بصراحة أنا باخد نقر كتير فى الشارع وأنا على سرعة والكاوتش بيدب فيها

هل ممكن البارات تبوش فى 3 سنين مع انى مش مشاويرجى..يعنى فى 3 سنين العربية ماكملتش ال 50 ألف

كيلو ؟

**x_gomgom** · 24-04-2011 12:50 AM

هو انا مش معايا ياريس...بس حابب اضيف معلومه مطب جامد او نقره ممكن تخلف معاك في الزوايا (العربيه تحدف مثلاً)...
موضوع زجينه ده بيحصل في بعض السيارات نتيجه المطبات (كان معايا عربيه بولونيز واخدت مطب محترم خلاني عملت زررجنيه في المقص)....
هو لو مش مظبوطه و محتاج زرجينه دي يحددها حد بتاع زوايا محترم و يستحسن يكون حد ثقه علشان ممكن يكون عايز يعمل شغل وخلاص.....
و أن شاء الله تطلع حاجه بسيطه....
تقبلوا مروري

**Samir Elshahawy** · 24-04-2011 02:10 AM

المشاركة الأصلية كتبت بواسطة m5m

الأخوة الكرام...أشكركم جميعا لاهتمامكم

هى الحقيقة ماقدرش أقول انها مشكلة رئيسية لكن أنا كنت ملاحظ ان العربية لما بامشى على طريق فيه

تكسير بتترج بيا جامد وبابقى حاسس انى قاعد فى الشارع وده اللى خلانى أروح أربط عفشة..لكن مش

حاسس بأى حدفة فى العربية أو مشاكل فى الدركسيون

بس بصراحة أنا باخد نقر كتير فى الشارع وأنا على سرعة والكاوتش بيدب فيها

هل ممكن البارات تبوش فى 3 سنين مع انى مش مشاويرجى..يعنى فى 3 سنين العربية ماكملتش ال 50 ألف

كيلو ؟

كل ده عادي أن العربية تتهز و تترجرج طالما أن الشارع مش مظبوط , لكن لما بتمشي بيها في طريق كويس هل بتلاحظ نفس المشاكل دي

و طالما مافيش حدفة أو غربلة في الطرق الممهدة يبقي خلاص مافيش مشكلة

و علي فكرة ... انا عربيتي عاملة 63000 كم و الحمد لله مافيش أي مشاكل في مقصات و لا بارات أو جلب مع أن أغلب مشاويري سفر و ساعات كتير طرق غير ممهدة و بأخد مطبات مفاجئة علي سرعات عالية جدا كمان

مع خالص تحياتي
م/ سمير الشهاوي

**zegzaag** · 25-04-2011 03:19 PM

بص انا هنصحك نصيحه مع اني مليش فالعفشه اوي لكن عن تجربه يعني

لو فكيت الحاجات الفبريكه العفشه هتتغير عن الاول لو ينفع تعمل صيانه وتصلح يبقى احسن

وعلى حسب كلامك يعني انته معدتش بأي موقف ممكن انك تغير عشانو حاجه فالعفشه ( وانته عارف ان كل واحد فمصر بيقول كلام مختلف عن التاني )