الموضوع: سؤال في البيزنس

بصى يا استاذه نور
توكيل محامى بعمل عقد تأسيس للشركه وتحديد نوعية الشركه ويثبتها فى صحيفه الشركات وبالتالى عمل سجل تجارى وبطاقه ضريبيه وفتح ملف تأمينات للمنشاءه ومن السجل بيتحدد من له صلاحيات الأداره من المساهمين ويفضل لو المكان تمليك يتعمل عقد ايجار من الملاك الأصليين بأسم الشركه حتى لو الملاك هما المساهمين ولو ان الأفضل يبقى ملهوش علاقه بالمساهمين لأعتبارات ربنا ما يحوجكم ليها وطبعا بيعمل للمساهمين عقد مشاركه بيوضح نسبه ارباح كل واحد حسب اجتماع الجمعيه العموميه ونسبه كل مساهم او حصه كل مساهم فى الشركه يعنى النسبه بتتحدد بعدد الأسهم الا أذا كان فى اتفاق بأعطاء نسبه اعلى للمدير المشارك
موضوع المرتب مش هيبقى كويس لأنه هيعلى مصاريف الشركه وخصوصا ان المصاريف بتبقى عاليه نسبيا فى اول سنه شغل
حسابات البنوك يفضل ان يكون فى توقعين مجتمعين بمعنى ان لازم اثنين يمضو على الشيكات اللى هتتصرف من البنك دى بتعمل نوع من الرقابه شويه واى استفسار انا معاكى

موضوع الأسم لازم تقعدو كلكم وتتفقو بهدؤ ومش معنى ان فى واحد بنسبه كبيره يبقى اسلوبه انو يفرض رأيه والا بكدا هيبقى دكتاتور فى اداره الشركه ودا ينبئ بنهايتها قبل بدايتها
ورأى لو بالأمكان ان تكون الحصص متساويه ويتعين مدير للشركه خارجى هيبقى افضل واريح كتير ليكم ولضمان حقوقكم قصاد بعض وضمان عدم الأختلاف وهيبقى الشكل القانونى بتاعها شركه مساهمه ذات مسئوليه محدوده ويبقى المسئول عن الأداره المدير العام المعين بواسطه الجمعيه العموميه ودى بتنعقد سنويا وبيبقى فى جمعيات عاديه وغير عاديه حسب الحاجه وطبعا بتتعاقدو مع مكتب محاسبه يراقب على الأداره ويعد الميزانيه ويساعد فى تقديم الأقرار الضريبى سنويا

وربنا يوفقكم