ازاى تعلى الهوندا من غير تأثير على الثبات ؟

**SAMEH_FOUAD** · 22-04-2011 04:17 AM

ازيكوا يارجالة يارب تكونوا بخير

دلوقتى انتوا كلكوا بتشتكوا من قرب شاسية الهوندا للارض ودة طبعا مقلق على الفتيس والمقصات والشكمان طبعا وسلاح السيارة السفلى

وكل واحد بيوديها لمتخصص عفشة يعلى العربية وتبقى تمام بس الثبات بيقل جامد

طيب ان شاء الله الطريقة دية كلكوا تعملوها هتعلى العربية + الحفاظ على الثبات المعتاد للهوندا

دلوقتى المطلوب منكوا :

1- تغير السوست اللى فى العربية بسوست 12 لفة بدل من 11 او 10 حسب نوع العربية

زى اللى فى الصورة دية

2- هتحط العلاية الكاوتش الاصلية اللى بتيجى اصلا مع المساعد زى اللى فى الصورة دية

3- قبل ماتركب تتاكد ان المساعدين عندكوا بيعملوا بكفاءة

4 - يتم تغير كاوتش الميزان وبيجى طقم على مسمارين كل مسمار فية اربعة بيعمل 70 جنية

كدة العفشة الامامية انتهت

نيجى بقى للعفشة الخلفية :

1 - هتشيل السوست الخلفية وتجيب سوست 10 لفات لان اغلب اللى عندكوا 8 لفات بس واتاكدوا قبل ماتغيروها

2-هتجيب صدادة اصلية يابانى تمنها 30 جنية للواحدة ودة شكلها اى واحدة من دول مش هتأثر على الارتفاع بس اى تحميل على العربية مش هتوطى الا عند حد معين وبعد كدة انسى

3 - بردة تتاكد من حالة المساعدين ويجب تغير جلب المقصات اذا كانت تستدعى ذلك لانها ليها عامل كبير اوى فى ارتفاع وثبات السيارة + الكشف على الشداد العلوى وشداد الميزان الموجود خلف علبة الشكمان

4 - اخيرا بقى الكاوتش ياجماعة الجنوط المناسبة للسيارة دية فى شواراعنا الجميلة مش اقل من مقاس 14 للجنط ويكون مقاسة كالتالى 60-195 R14

وهتبقى صورة التركيب هكذا

وبكدة ان شاء الله النتيجة هتكون عدم انخفاض السيارة سواء فى الامام او الخلف , الحفاظ على الثبات وعدم تأثرة بالارتفاع , وعدم التأثير ايضا على السيارة فى مطبات الهواء , واى حمولة هتركب فى الخلف هتنزل لحد معين فقط وهو ارتفاع الصدادة

واى سؤال انا فى الخدمة ويارب الموضوع يكون عجبكوا

وهذا الموضوع من اجتهادى الخاص واهدية الى اخوانى وطبعا نايل موتورز

**tamertito88** · 22-04-2011 05:48 AM

الله ينور يا سمسم
دايما في تميز

بس سؤال هو ليه السوست العرضية اتلغت في الجيل ال 4 ؟؟؟؟

ايه عيوبها يا سمسم عشان انا عليت العربية والكاوتشات قلبت لجوة زي ما قلتلك و الطرقعة شكلها مش من الكوبلن يا سمسم

و خايف تكون من السوستة دي و هي السوستة النوع ده يا سمسم ممكن تتكسر مثلا والعربية تقع زي ما المقص بيعمل كده ؟؟؟

**egyptmaro** · 22-04-2011 11:26 AM

الله ينور يا عم سمسم

**M_Nabil** · 22-04-2011 12:34 PM

في ناس بتركب السوست اللى قدام ورا عشان السوستة قدام بتكون أطول وانشاف و كمان سوست الانتجرا 94-00 أطول وانشاف في حدود 2 الى 2.5 سم بس الشكل مبيكونش لطيف نوعاً ما بسبب الارتفاع وبعد الرفرف عن الكاوتش وفي النهاية الثبات بيقل بصورة بسيطة وطبيعية على السرعات وفي المناورات

وأعتقد ياسمسم في رقم 4 مقاسات الكوتش كنت تقصد 195/55/15 واللى بيحب كاوتش عريض اكثر ممكن يركب 205/50/15

**SAMEH_FOUAD** · 22-04-2011 01:16 PM

المشاركة الأصلية كتبت بواسطة m_nabil

في ناس بتركب السوست اللى قدام ورا عشان السوستة قدام بتكون أطول وانشاف و كمان سوست الانتجرا 94-00 أطول وانشاف في حدود 2 الى 2.5 سم بس الشكل مبيكونش لطيف نوعاً ما بسبب الارتفاع وبعد الرفرف عن الكاوتش وفي النهاية الثبات بيقل بصورة بسيطة وطبيعية على السرعات وفي المناورات

وأعتقد ياسمسم في رقم 4 مقاسات الكوتش كنت تقصد 195/55/15 واللى بيحب كاوتش عريض اكثر ممكن يركب 205/50/15

محمد باشا اية الاخبار يارب تكون بخير وان شاء الله نشوفك فى المقابلة

دلوقتى بالنسبة لتعديل السوست فبتتعمل عادى بس بتتقص شوية عشان وضعية السوستة نفسها غير الامامية وبعدين اى لعب فى السوستة بيأثر على صلابتها , وبالنسبة لسوست الانتجرا فهية اصلا قليلة جدا وبتخلى شكل العربية زى مانت قولت وحش اوى وناشفة جدا

بالنسبة لمقاس الكاوتش لأ انا قولت ان اول مقاس لازم يركب للكاوتش هو مقاس ال 14 عشان يقدر يعلى العربية شوية وبلاش 13 دة لانة بيوطى العربية جدا وبيخلى العربية ثباتها ضعيف نسبيا , حتى لاحظ هتلاقينى كاتب مش اقل من 14 يعنى عندك 15 و16 بس ماتزودش عن كدة بأى حال من الاحوال , بس ياباشا دة اللى اقصدة

**tarekzein** · 22-04-2011 01:56 PM

آه ياريت نخلى كل أسئلة تعليه الهوندا هنا

فى نفس الموضوع

عشان يبقى مرجع شامل

ـــــــــــــــــــــــــ ـــــــــ

وياسمسم

صحيح قسم هوندا مشاركاته قليله

بس منظمه وشامله بترد على كل الأسئله

وهوه ده المطلوب

المختصر المفيد

**M_Nabil** · 22-04-2011 11:26 PM

المشاركة الأصلية كتبت بواسطة semsem kane

محمد باشا اية الاخبار يارب تكون بخير وان شاء الله نشوفك فى المقابلة

دلوقتى بالنسبة لتعديل السوست فبتتعمل عادى بس بتتقص شوية عشان وضعية السوستة نفسها غير الامامية وبعدين اى لعب فى السوستة بيأثر على صلابتها , وبالنسبة لسوست الانتجرا فهية اصلا قليلة جدا وبتخلى شكل العربية زى مانت قولت وحش اوى وناشفة جدا

بالنسبة لمقاس الكاوتش لأ انا قولت ان اول مقاس لازم يركب للكاوتش هو مقاس ال 14 عشان يقدر يعلى العربية شوية وبلاش 13 دة لانة بيوطى العربية جدا وبيخلى العربية ثباتها ضعيف نسبيا , حتى لاحظ هتلاقينى كاتب مش اقل من 14 يعنى عندك 15 و16 بس ماتزودش عن كدة بأى حال من الاحوال , بس ياباشا دة اللى اقصدة

سامح بك أخبارك؟ الحمد لله بخير ان شاء الله هحاول أكون موجود بكره في المقابلة

المهم أنا كنت أقصد المقاس الثانى المكتوب اللى هو 195/55/14 هو شغال وكل حاجه بس هيديك زيادة في قراءة عداد السرعة حوالى 3 كم

المقاسات المظبوطة اللى أعرفها بتكون كتالى

185/70/13 ده الاستوك بتاع الـ Si و Vti

195/60/14

195/55/15ده بتاع الـ SiR

205/50/15

205/45/16