الموضوع: تعديلات داخلية لمحرك فيات 128 1300

السلام عليكم

الحمد لله ان في حد اهتم بالموضوع
و خصوصا المهندس kaza شكلك هتنفعني كتير .. مهندس و ليك في التعديلات .. دانتا لقطة يا راجل .. كنت فين من زمان

HotRide
يعني مجرد توسيع الصبابات يعمل فرق كبير ؟؟ من غير توسيع مجاري الهوا ولا حاجة ؟؟ نجرب

kaza
افكار التعديلات كلها من موقعين .. The FIAT Forum - For Talk On All Things FIAT و Turbo 124 dot com
و اكبر تعديل شاغلني هو زيادة سعة المحرك الى 1500
بيستخدموا كرنك ريجاتا 1500 بس لازم بيل معدل مخصوص يكون اقصر
و طبعا ده مش متوفر
واحد ميكانيكي مره قالي ممكن تصب بساتم .... هل ممكن افصل بساتم على المقاس اللي انا عايره
او ممكن ادور على بستم من اي نوع تاني يكون بنفس المقاس اللي عايزه؟؟

بخصوص زاوية الصباب لاقيت برضه كلام بخصوص النقطة دي
30 على الحافة و 45 داخلي و انحف الساق بمعدل الخمس... ده الخراط المفروض فاهم في النقطة دي؟؟
طيب و توسيع و صقل مجاري الهوا .. برضه الخراط ممكن يعملها ؟؟

بالنسبة للتعديلات اللي بيقترحها الاخوة مهي عندي .. كربراتير ويبر اتنين باب و اسبراتير الكتروني
كل اللي كنت هعمله خارجيا تعديل في الشكمان

طيب سؤال بالمناسبة
هل في فرق بين البوبينات و بعضها
لاني سمعت ان بتاعت الـ32 بتدي كهربا اكتر و بالتالي حرق افضل ... ولا مفيش فرق؟؟

متابع مع باقي الاعضاء و في انتظار اقتراحات اخرى
و السلام عليكم

المشاركة الأصلية كتبت بواسطة ziabassem

في البداية أحب اعتذر لصاحب الموضوع إذا كان الحوار ابتعد عن موضوعه :zb_sor1[1]:.. بس ممكن من خلال الاستفسارات نفيد ناس تانية .

يا باشا موضوعك المهم الكل يستفيد ... انتو كمان فكرتوني بحاجة مهمة
بكات الكربراتير
ايه اكبر مقاس ممكن يركب من غير ما يدخن او يهدر بنزين على الفاضي و يحسن الآداء ؟؟ طبعا في الباببين .. الباب الاول الاساسي و الباب التاني مع الكبس

المشاركة الأصلية كتبت بواسطة haytham4ever

السلام عليكم

الحمد لله ان في حد اهتم بالموضوع
و خصوصا المهندس kaza شكلك هتنفعني كتير .. مهندس و ليك في التعديلات .. دانتا لقطة يا راجل .. كنت فين من زمان

hotride
يعني مجرد توسيع الصبابات يعمل فرق كبير ؟؟ من غير توسيع مجاري الهوا ولا حاجة ؟؟ نجرب


لا طبعا مش الفارق اللي في دماغك بس هيزيد العزم والقدرة الحصانية الي حد ما بس طبعا توسيع مجارى الخليط لها فضل اتكبر في زيادة العزم والارتفاع بالدوران علي النقلات الصغري لحدود 6500 و7000 لفة وبالتالي الارتفاع بالسرعة والتسارع وانا كنت شبهت الموضوع دة ببساطة قبل كدة بس مش فاكر فين الا وهو الحقنة العادية او السرنجة ..حاول تسحب بيها مياة بسرعة والابرة راكبة وقارن الفرق لما تشيل الابرة وتحاول مرة تانية وشوف الفرق في سرعة امتلاء الحقنة ةالجهد اللازم لسحب المكبس
الكلام دة هو نفسة اللي بيحصل في السلندر بالضبط وبالتالي كل ما كانت ممانعة دخول الخليط اقل هيملأ فراغ السلندر بالخليط بصورة افضل وبالتالي شحنة ابر تساوي انفجار اقوي وقدرة اعلي
كذلك الشغل المبذول من المحرك لتحريك البساتم الاخري سواء في العادم او في السحب بيعمل فقد في القدرة لتشغيل البساتم الاخري وبالتالي كل ما اخفف الحمل حاقلل فقد القدرة وبالتالي زيادة في القدرة الاجمالية الخالصة
من هنا نلاقي ان المحركات متعددة الصبابات بتدي طاقة اعلي نظرا لقلة الممانعة فيها والكلام ده لحد ما لكن في ظروف الدوران علي لفات عالية بيصل ظاهرة الا وهي تسطح الصبابات وبالبلدي ان لحظيا ونتيجة سرعة الدوران بالنسبة للزمن بيكون صمام الحر والعادم مفتوحين الاتنين وبالتالي بيبدا هدر جزء من الخليط مع العادم وبيضعف الخليط والشحنة ودة بنحسة لما اقرص علي العربية والاقي ان صوت الموتور بيعلي بس بدون فائدة ودة لية قصة اخري وهي التوقيت المتبدل لعمل الصبابات او الفي في تك
وجعت دماغك بكل الدش دة نيجي لموضوع التوسيع ..بيحكمة شكل غرفة الحريق والمسافة بين الصبابات وبالاخص في مواتير الفيات ذات الكامة الواحدة زي ما سبق وقلت في نفس الموضوع..بس هتلاقي فرق هيبسطك في الموتور وخلي بالك من الاشتغالات لان كتير بيتكلم وانت عارف احنا الفراعين لا نقبل الراي الاخر وكلنا دكاترة

kaza
افكار التعديلات كلها من موقعين .. the fiat forum - for talk on all things fiat و turbo 124 dot com
و اكبر تعديل شاغلني هو زيادة سعة المحرك الى 1500
بيستخدموا كرنك ريجاتا 1500 بس لازم بيل معدل مخصوص يكون اقصر
و طبعا ده مش متوفر


لا طبعا كرنك الريجاتا والتمبرا والريتمو سعات 1300 و1500و1600 تقريبا قياستهم واحدة في البيلات والكراسي والاختلاف بينحصر في طول حدبة البيل اوالركبة سواء بالطول او القصر وبالتالي البيلات واحده
نفس الكلام في محرك الفيات 2000 وال1600 بالضبط
لكن موتور 28 ال1100 بيختلف تماما وبالتالي مش هيركب القطع البديلة ودي بتعرفها علي حسب علمي من قطر البساتم بيكون في الريجاتا والتمبرا والريتمو 86.4 مم والمواتير ال2كامة 84مم اما ال28 فبيكون 80.5 مم وبالتالي صعب جدا ده غير ان مكان السلندرات محكوم بفتحات مرور الزيت والمياة من البلوك لراس السلندر والعودة هتعوق التوسيع حدا
واحد ميكانيكي مره قالي ممكن تصب بساتم .... هل ممكن افصل بساتم على المقاس اللي انا عايره
او ممكن ادور على بستم من اي نوع تاني يكون بنفس المقاس اللي عايزه؟؟
ممكن بس هتدوخ ..كنت شفت مواتير معدلة باقطار 85 مم بدلا من ال84مم في محرك 2000 ورفع السعة لاكتر من 2050 سي سي بس الكلام دة في ايطاليا ماعتقدش انة متوافر في مصر

بخصوص زاوية الصباب لاقيت برضه كلام بخصوص النقطة دي
30 على الحافة و 45 داخلي و انحف الساق بمعدل الخمس... ده الخراط المفروض فاهم في النقطة دي؟؟
لا الخراط مش فاهم النقطة دي لانة بيتعامل مع الصباب بالاسيات وعي زاوية 45 درجة لاحكام الصباب علي الكرسي وانة يكون فية تلامس بين الصباب والكرسي في حدود 0.5مم ويكون بارز من قرص الصمام 1مم عن سطح غرفة الحريق
ولازم اللي يقوم بالعمل دة مهندس محترف تشغيل معادن او خراط ماهر وطبعا حدث ولا حرج الة خراطة جيدة بدون بوش

طيب و توسيع و صقل مجاري الهوا .. برضه الخراط ممكن يعملها ؟؟

ممكن بس محتاج ادوات خاصة واسلحة او اقلام معمولة من كربيد التنجستن والكربوراندم وذات سرعات دوران عالية 12000 او18000 لفة\د واقرب تشبية لها ماكينة حفر الاسنان عند دكتور الاسنان

بالنسبة للتعديلات اللي بيقترحها الاخوة مهي عندي .. كربراتير ويبر اتنين باب و اسبراتير الكتروني
كل اللي كنت هعمله خارجيا تعديل في الشكمان

تمام دي تعديلات متوفرة واقتصادية ممكن تضيف لها تنحيف ساق الصمام في المسافة اللي مابتتحركش داخل دليل الصمام وزوايا قرص الصمام كما سبق ووضحت بالاضافة لتنحيف الاجزاء الداخلية للموتور وتماثل اوزانها زي البيلات وحدبات طرطشة واتزان الكرنك وترس الفولام والبساتم الحاجات دي بتفرق جامد بس علي حساب نعومة الاداء ..هتحس انك راب كراكة او وابور حرث .زلكن دوس بنزين وشوف اية اللي بيحصل
ده طبعا بالاضافة الي نظام تصريف للعادم بدون ممانعة علشان الضغط الخلفي للعادم بمعني اني باغير الشكمان والفرن ومن الاخر انسب حاجة هي تفصيل فرن اوهيدر بمواسير منفصلة بطول 60 سم ثم تجميع كل ماسورتين مع بعض 1و4 لوحدهم و2و3 لوحدهم بطول 40 سم ثم التجميع في ماسورة واحدة بقطر 5سم علي الاقل والعلب تكون مناسنة لسعة الموتور ودي قصة تانية

طيب سؤال بالمناسبة
هل في فرق بين البوبينات و بعضها
لاني سمعت ان بتاعت الـ32 بتدي كهربا اكتر و بالتالي حرق افضل ... ولا مفيش فرق؟؟

طبعا فية فرق البوبينة العادية عبارة عن ملف رومكورف اللي درستة في الفيزيا زمان في المدرسة وبتخرج 24000 فولت اما الاليكتروني فبتبدا من 36000 ثم 48000 واخيرا 68000 في عربيات السباق والرالي والمحركات عموما ذات نسب الانضغاط العالية لان كل ما زادت نسبة الانضغاط تزيد طرديا نسبة ممانعة قفز الشرارة بين اطراف شمعة الاحتراق

متابع مع باقي الاعضاء و في انتظار اقتراحات اخرى
و السلام عليكم

وانا تحت امرك وامر رجالة المنتدي في اي معلومة

للاسف كمان انا من فتره كانت العربيه بتشرق ومش بترضى تدور رحت لواحد بتاع كربراتيرات نضفه وكان فيه خرم صغير فى العوامه لحمه وغيرلى البيكات ومن ساعتها العربيه مخنوقه جدااااا روحتله قاللى عادى حتاخد عليها قولتله لا وسعلى بيك السرعه تقريبا ركب بيك 110 او 105 مش فاكر
العربيه بقت اقتصاديه فى البنزين لكن التسارع قل جداااااااا عن الاول ومش عارف اعمل ايه فى موضوع الكربراتير ده
بس لما ركبت فلتر وديفل حسيت بفرق بسيط لكن مش اللى انا عاوزه

لدرجه انى مره عربيه 128 كنت بجرب التسارع معاها والعربيه دى مكانش فيها اى تعديلات ورغم كده طلعت منى بكل سهوله فى الاول والتانى والتالت وانا كان لازم احرق جاااااامد عشان احصلها


ممكن اعمل ايه يخلينى راضى عن اداء العربيه وحاجات اقتصاديه زى محضرتك قولت

يعنى انا فكرت فى تغير نظام الاسبراتير لالكترونى بس مش عارف ايه المناسب لعربيتى واجيبه من موتور ايه عشان يركب عندى على طول واغير الموبينه لالكترونى كمان ولا اعمل ايه

والكربراتير والبوجيهات واسلاك البوجيهات والحاجات دى اعدل فيها ايه
وفيه ناس بتقول ركب كربراتير الريجاتا
وهل نظام العادم عندى كده صح ولا لا ده ديفل زى اللى انا مركبه عندى وشايل كل العلب يعنى ماسوره من الامام حتى الديفل





وانا اسف لصاحب الموضوع لو حطيت استفسارى هنا بس عشان يبقى الموضوع شامل كل التعديلات ويبقى مرجع لاى حد برضه[/QUOTE]

اكيد صاحب الموضوع كره نفسة وانا باعتذر له
نيجي لموضوع الكربراتير..الكربراتير دة قديم وخاص بمحرك ال1100 .. وللاسف مهما وسعت البيكات او عليت مستوي العوامة مش هيدي نتيجة لان قطر انبوب فنشوري الداخلي اللي بيسحب البنزين ويخلطة بالهواء صغير ولن يسمح بتذرية كاملة للبنزية وبالتالي الخليط هيبقي نيئ ومش هيتحرق بالكامل غير ان العربية هتشرق لو غيرت بيك السرعة بواحد اكبر وانبوب السحب او النافورة باكبر
يبقي الحل منيفلود تاني بكربراتير تنائي الابواب وافضل كربراتير مناسب لموتورك كربراتير الشاهين ال1400ممتاز وهيكون اقتصادي كمان
كذلك الحال بالنسبة للاسبراتير ممكن اسبراتير الريجاتا العادي علي البوبينة بتاعتك ودة مش هيكلف غير 70 جنية تمن الاسبراتير وسسب اختياري له ان له كرسيين تحميل لصينية الابلاتين وبالتالي عمر التشغيل اطول وادق في تساوي خلوص الابلاتين تحت ظروف التشغيل المختلفة
اما لو اليكتروني فاحسن حاجة اسبراتير الشاهين ايضا بالمشط والبيك اب يونت وطبعا الشرارة افضل ومش هتيجي ناحيتة تاني المهم احكام تثبيت اقطاب البطارية دة اللي بيحافظ علية