الكاسيت والسماعات والموبايل اتسرقو
النهاردة الصبح عربيتي اتسرق منها الكاسيت والسماعات والموبايل (كنت ناسيه في العربية). أنا بس باكتب عشان أفك عن نفسي واحذركو لحسن الموضوع زاد أوي. المهم إن دي مش أول مرة. أنا اتسرقت قبل كدة في المعادي (كاسيت وسماعات) وفضلت عايش من غير كاسيت فترة ولسا مركب الكاسيت والسماعات دول من أقل من شهرين!! يعني ملحقتش أتهنا بيهم. واللي مضايقني جدا البوليس, رحت أعمل محضر في القسم, البوليس منتهى البرود وبيتكلم بطريقه موضحة جدا إنهم مش حيتحركو ولا حيهببو أي حاجة. يعني أبسط حاجة يرفعو بصمات. بالذات إن جاري شاف العربية وهيا بتتسرق وعارف نوع العربية اللي نزل منها الحرامي ولونها (أفيو حمرا فاقع) والحرامي واد رفيع وشكلو نضيف مش بلطجي يعني. ودا الجديد. إن اللي بيسرقو دلوقتي شكلهم نضاف وراكبين عربيات. يلا الحمد لله على كل حال وان شاء الله الحرامي يصرف الفلوس دي على عينيه ويارب يطبقو الشريعة الإسلامية ويقطعو إيدين الحرامية لحسن كترو جدااااااااا.