اخوكم احمد من قسم الشيفروله بس للاسف معرفتش اجي المقابله
انا لقيت الراجل ده غلط وحط موضوعه في قسم الشكاوي يعني عربيته اتخبطت في التوكيل وليه استفسارات فمحدش طبعا هيعرف يرد عليه غركوا
http://www.nilemotors.net/Nile/21521...post3873444470
عرض للطباعة
اخوكم احمد من قسم الشيفروله بس للاسف معرفتش اجي المقابله
انا لقيت الراجل ده غلط وحط موضوعه في قسم الشكاوي يعني عربيته اتخبطت في التوكيل وليه استفسارات فمحدش طبعا هيعرف يرد عليه غركوا
http://www.nilemotors.net/Nile/21521...post3873444470
انا بصراحة قريت مشاركته
لاحول ولا قوة الا بالله
ياترى بعد الثورة حناخد حقنا بدرعنا ولا بالقانون
سلام قولا من رب رحيم
اللهم استرها معنا واعف عنا وعافنا
لا اله الا الله ..... ربنا يعوضه عنها ان شاء الله ويأجره في مصيبته ويخلفه خيرا منها
بس مش المفروض انهم يغيروا العربية كلها ولا ايه ؟؟
وغير كده لو المقاضاه هاتجيبلوه حقه .. ميسكتش عليها طبعا وربنا يصبره ويرزقه خيرا ان شاء الله
حسبي الله ونعم الوكيل
ربنا يعينه .. بس بصراحة هو حاطط موضوعه في مكان خطأ لأن قسم الشكاوي ده مش للعربيات ده لمشاكل المنتدي فقط
علي العموم ربنا يعينه و ان شاء الله كله يبقي تمام
شكرا ليكم يا جماعه ولشعوركم النبيل
طبعا كل شئ قضاء وقدر
بس انا حبيت اعرض عليكم الي حصل اولا عشان كل واحد ياخد بالو علي سيارتك
لاننا بناخد طبعا بالاسباب ورغم انها اتخبطت بالتوكيل والي كان سايقها احد الفنيين بالداخل
ورغم كدا لازم كل واحد يكون جنب سيارته لان وقفتك جنب سيارتك حتي لو داخل التوكيل تمنع اي عامل او فني سايقها انو يستهتر بيها ويعملك اعتبار وياخد بالو وهوه بينقلها طول ما انت واقف جنبو
وكمان عشان نعرف هما هيعملو معايا ايه
مع العلم حتي اليوم السياره في التوكيل مخلصتش
وده معناه ان الخبطه مش سهله
انا بعت الشكوي للسعودي جروب مودرن موترز عشان اعرف هما هيملو ايه
والتوكيل قلي انو هيبعت حد عشان يعاين
وهوافيكم بلي هيحصل
ادعولي انا رايح لهم بكره
بجد قلبى معاك
ربنا يعوض عليك خير
بصراحة خطا لا يغتفر , وخصوص العربية لسه جديدة وانت ملحقتش تفرح بيها
هو نصيبك وقدرك , كانت ممكن تتخبط وهى واقفة تحت البيت ,
النصيب والقدر مكتوب جوة التوكيل او بره
بس انا بتكلم على النصيب ,
بس فعلا معاك حق فى الاهمال اللى بيحصل احيانا من بعض الفنيين , اللى ممكن يسئ لسمعة المكان
ان شاء الله يرجعوها احسن من الاول وتاخد حقك باذن الله
وبحى حضرتك على سردك بايضاح لمشكلتك وباسلوب هادئ بدون اى تجريحات , مع ان اعلم كم الغضب اللى جواك وحاسس بيك اكيد وانت بتكتب كل حرف والله
وان شاء الله تتحل على خير وقلبى معاك
السلام عليك أخى الكريم،
الحكاية زى ما استشفيت إن عربيتك إتخبطت جامد فى التوكيل عن طريق فنى ، من رأيى اذا ما كنتش راضى عن التصليح (طبعا مجانا) إلحق زور محامى يرفع قضية على التوكيل نفسه.
وستر الله طريقكم
فعلا انا بلاحظ ان الفنيين بيسوقوا العربيات جوه مراكز الصيانه باستهتار كبير جدا والواحد فعلا بيحط ايده علي قلبه وربنا يسترها معانا جميعا
الموضوع ده للاسف موجود فى معظم مراكز خدمة مصر
الفنى عامل بالعربية موكرباص و عمال يحمل بيها جو التوكيل
ده سببه حاجة واحدة -- طبعا مش جهل -- ده حقد و غل و نفسنة -- وتلاقى ضميره لون جزمته -- اسود
اللهم استرها معنا ومع غيرنا
السلام عليكم ورحمه الله
انا طبعا حبيت اطمنكم علي الرغم اني مش مطمن اصلا
طبعا رحت علي الساعه 2 ظهرا لقيت السياره من غير الشنطه والاكسدام وقالولي انهم في الرش
وقالولي بص شوف اهم هناك وفعلا رحت وشفتهم لقيتم لسه طلعين من الرش
مش حكدب عيكم وقول ليكم انهم مرشوشين فابريكا .ابدا هوه رش مش اد كده كان فيه ديفوهات وكانه مش مرشوش في الفرن
وبصراحه رغم ان الشنطه جايبنها جديده يعني مافيهاش سمكره بس البويا ما كنتش علي قدر المستوي الي نقول فيه رش توكيل
وطبعا فرق كبير باين ما بين الفابريكا ورش التوكيل لان رش التوكيل كان فيه بعض الديفوهات الناتجه عن الشوائب في الجو دايمان بتظهر في حالات رش السياره خارج الفرن او رشها في فرن ضعيف التهويه والفلتره
طبعا الشنطه اترشت والاكسدام والرفرف الخلفي الشمال حتي غطاء التنك وحتي بدايه الباب
طبعا حسبي الله ونعم الوكيل
الي غظني باه ونرفزني وخلاني اخرج عن شعوري مقاوحه الصنايعيه الي فكرين نفسهم هيفهمو اكتر من مهندس
بصراحه هما عمرهم ما هيفهمو اكتر من مهندس ولو حتي لسه متخرجش وده طبيعي
ولقيت السياره كلها خشنه من بره وطبعا انا عارف هيه خشنه كده ليه لاني لان ده طبيعه شغلي كمهندس ميكانيكا
طبعا السياره كلها خشنه لانه لازم لما يرش الجزء الخلفي لازم ولا بد يغطي كامل السياره عشان الهبو او ما يسمي علميا ب
over spray بتاع البويا متلزقش علي باقي جسم السياره وتعمل الخشونه دي
طبعا انا قلت للصنيعي انت لا يمكن تكون غطيتها ابل ما ترش والا ما كنش جسم السياره بقه خشن كده
طبعا الصنيعي اتجنن واول ما بدا يوتر قلتلو انت ملكش كلام معايا انا كلامي مع المهندس هوه الي يفهم كلامي كويس لو انت مش فاهمو
من هنا لهنا لقيتهم بيحولو يلمعو السياره بالشمع او الواكس اولا وطبعا مش هيعمل حاجه فاضطرو يلمعوها بالبولش ومعجون التلميع وذلك يدويا لان هذا المعجون انا اعلم جيدا انه بياكل طبقه من السطح ليسبب لمعتها
طبعا كنت متضايق جدا والناس كاني بقول حاجه غريبه عليهم
/ي/عني سياره استلام 7/4/2011 المعها بالمنظر ده ..ده في حد زاته كان تاعبني كمان اضافه الي الخبطه والشغل الي اتعمل لانه طبعا قلل من قيمه السياره
بس اقتنعت مفيش حاجه شغلها زي المصنع 100% في حاجات مقاربه مش مطابقه
بس عشان انا عايز امشي وعندي شغل لازم انجزه قبلت بالوضع لاني وصلت في النهايه اني همسك واحد فيهم اضربه بالزات الصنيعي البوياجي الي فاكر نفسو دكتور وشغلو كلو ديفوهات
طبعا مودرن موتر القاهره كلموني واخبرتهم اني غير راضي عن ما حدث
وانا اعتقد انهم كانو مقدرين عدم رضائي عن ما حدث
المهم كنت طالب شويه شغل اكسسوارات بالسياره بحوالي 1000 جنيه نقريبا فرش جلد وسنسور خلفي ووحده رفه
زائد صيانه الالف وزيت اف1 بتاع العشره الاف كيلو
المهم عملولي خصم 300 جنيه في هذه الاشياء
وطمات صيانه ال5 و ال10 وال 15 مجاني المصنعيات فقط
طبعا انا عارف ان ده ميعوضنيش ابدا تمت الي حدث من اول قيمه السياره الي انخفضت واصبحت رشه بره وحتي السياره الي انا اجرتها كام يوم عشان اخلص مشاويري في الفتره من 20 الي 27 ابريل
كاجرتهاش كل المده 3 ايام بس ... بس في الحقيقه التعويض ده في نظري لا يساوي ماحدث
بس انا مش ناقص اعد ااجر في سيارات وامضي شيكات ضمان استلم عربيتك وربنا يعوض عليك
بس انا حبيت اقولكم ان لما سالت لقيت في حل تالت حبيت اقولكم عليكم
وهوه انهم يخدم السياره ويعطوك واحده جديده بس يحسب عليك مصاريف استعمال في الفتره الي استخدمت السياره فيها من بدايه الترخيص
بس الموضوع ياخد وقت بتاع شهرين او تلاته وده حصل مع واحد صيدلي زميل واحد قريبي
وسلموه واحده بعد ما دفع مصاريف استخدام حمالي 2000جنيه
بص فضل الفتره دي من غير سياره
وبصراحه مكنش عندي قدره اجلس كل ده بدون سياره
عرض ما حدث للاستفاده
اللهم ابعد عنكم كل سوء ويعافيكم دائما
بصراحة انا عندى تصبر يا باشمهندس وكنت تعمل موضوع دفع فرق الاستعمال وتاخد واحدة جديدة اذا كان ينفع
لو حتدفع 2000 جنيه , بس حتاخد عربية فبريكة جوة وبره , لان خالى بالك , رش الشنطة والاكصدام حيقلل من تمنها كتير
ده غير على كلام حضرتك انها مش مرشوشة كويس
اذا كان لسه فى الامكانية تعمل الموضوع ده لسه , فاعمله افضل , واستحمل واصبر معلش , بس حيون فى مصلحة لحضرتك فى النهاية
انت معاك حق يا استاذ احمد بس انا لما حسبتها لقيت اني ممكن اصبر شهرين او تلاته من غير سياره \وفي حاله اني اجرت وحده او كنسلت مشاويري عشان معاييش سياره ده في حد ذاته خساره
يعني ممكن تعدي 5 الاف جنيه سوائ خساره او تاجير سياره في تلك الفتره علاوه عن قيمه الاستخدام
يعني جمله الخساره لو انا سبتاهلهم وبدلتها بواحده جديده ممكن توصل 7 الاف جنيه مش اقل
طيب ما انا هبيع العربيه بعد 6 او حتي 10 سنين والله اعلم
هل يبقل قيمتها عند البيع 7 الاف جنيه عن مثيلتها الي مش رشه مع العلم ان جو الاسكندريه وظروف البلد الي ممكن ونتا واقف تتخبط ممكن تهد الي انت وفرتو وترش السياره كلها عشان عوامل الجو ولا حتي شويه خبطات متفرقه
انا توكلت علي الله وقلت اطلع من جو ان العربيه مخبوطه وفي النهايه كلو نصيب
لاني بصراحه افضل اني اتعايش مع الوضع خصوصا بعد ما حسبتها الحسبه ديه وده طبعا لاني مش ناوي اغير السياره كمان سنه ولا اتنين دنا مش هغير ابل خمس سنوات والله اعلم
انشاء الله يعافينا ويعافيكم ويبعد عنكم السوء
طب حاول تاخد منهم ما يثبت ان العربية اتخبطت عندهم , واتعملت عندهم
عشان النقطة دى مهمة جدا وحتنفعك بردوا , فى حالة لو ظهر اى عيب اخر وحابوا يتملصوا
لازم تستلم عربيه جديده
اثبت على موقفك
و الحمد لله على كل شئ
أخي الفاضل محمد .. حفظك الله ورعاك وبارك فيك .. الحمد لله على كل حال وقدر الله وما شاء فعل . ومش مهم العربية اهم حاجه سلامتك
الحمد لله على قضاء الله .
أنا هكلمك بكل صراحه : أول لما قرأت الموضوع بتاع حضرتك أول مشاركة أقتنعت بحاجه واحده بس ألا وهي أنك لازم تستلم سيارة جديدة مهما قالوا ليك ومهما عملوا في العربية بتاعتك اللي أتخبطت لازم تستلم سيارة جديدة زيرو لعدة اسباب :
1 - لأنك هتديهم درس أنهم يعاملوا عربيات العملاء بصورة أحسن وأفضل
2 - أنهم لازم يجيبوا ناس ميكانيكية وصنايعية فاهمين وخبرة مش أي حد من أي مكان
3 - أن ثمن العربية هيقل كتير - خلينا نكون منطقيين أنتا وانا والكل عارف أنك لو أستلمت عربية زيرو أمبارح وجيت بعتها النهارده هيقل من ثمنها فما بالك لو بعت عربية أترشت وأتغير فيها حاجات كتير ؟؟؟ سيبك من إنك هتبعها يا سيدي على الاقل تبقه راكب عربيتك وانتا مطمئن أن العربية فبريكة وسليمة خصوصاً أنك متضمنش أيه اللي حصل في آلات الجر والعفشة والمنطقة الخلفية كلها للعربية (تغيير الشنطة مش حاجه قليلة)
معلش تعالى على نفسك وأجر عربية عادية زي 128 أو أي حاجه تكون رخيصة لمدة شهرين لحد ما تستلم عربيتك الزيرو او أستلف أي عربية من واحد صحبك ، ومتحسبهاش بالارقام والارباح والخسائر أحسبها أنك أشتريت حاجه بمبلغ ومن حقك أنك الحاجه اللي تملكها مقابل المبلغ ده تكون سليمة وخالية من العيوب . (المهندسين والصنايعية اللي في التوكيل أساتذة كلام فقط عشان الكلام هو الحاجه الوحيدة اللي مش عليها ضريبة فكل واحد هيقولك أي حاجه وفي الاخر مش هتاخد حاجه)
كمان أنا عايز اقولك أن النهارده في واحد أتصل بيا من شركة نيسان أو شركة تبع نيسان عشان تقيم مستوى الخدمة لمراكز الصيانة والبيع والراجل اللي أتصل بيا قعد يرغي معايا كتير جداً وعايز يستفسر عن كل حاجه ورأيي في كل حاجه فأنتا أكيد مليون في المية لو أتصلت بيهم وعملت شكوى أكيد الموضوع بتاعك هيتحل قبل شهرين .
وإذا كان الاستاذة اللي عاملين نفسهم خبراء قالوا ليك أدفع مصاريف أستخدامك العربية من تاريخ شرائك ليها . قول ليهم يا فلاسفة زمانكوا أدفعوا ليا مصاريف ترخيص العربية اللي دفعتها .
وده رقم شركة نيسان ( 16244 ) رجاء أتصل بيهم واشتكي ومتسكتش على حقك وهتلاقي الناس في الشركة هتسمعك وهتصرف وهتحل المشكلة ليك . لأن دي سمعة شركة ولو قولت ليهم أن أخوك صحفي أو تعرف حد صحفي وهتقوله على اللي حصل هيخافوا جداً على سمعة الشركة وهيحلوا ليك المشكلة .
وأخيراً أنا مش عارف إذا كان كلامي منطقي ولا لأ . بس يمكن ده اللي أنا فكرت فيه وانا بقرأ الموضوع بتاعك وردود الاعضاء وصدقني لو قولت ليك انا حاسس بيك فعلاً . وربنا يبارك ليك ويكرمك ويحفظك ويسهل ليك كل حاجه ويرضيك ويكتب ليك الخير حيث كان ويبارك ليك فيه
تحياتي لكم ودمتم سالمين