الموضوع: ماهو أفضل مكان لرفع السيارة و فحصها عند شراء صني مستعملة في القاهرة

السلام عليكم
اخي الكريم .... كيف حالك
ربنا ييسرلك الخير وتلاقي اللي بتدور عليه بكل خير ان شاء الله
اعتقد ان افضل مكان للكشف علي اي عربية التوكيل بتاعها لعده اسباب
انهم مش شغالين الا فيها وشافوا عيوووووب الدنيا في العربيات اللي بتجيلهم ولا قدر الله لو فيها خبطات ومرشوشه هايعرفوا برده
ولو حاجة بايظة هايعرفوها ولو هاتغيرها هتبقي بالاصلي بتاعها وهكذا
بس لما تروح اسال علشان تقريبا في انواع للكشف (كشف عادي وكشف شامل .....)وطبعا الشامل احسن حاجة ومعلش هاتدفع فيه فلوس بس هاتبقي مطمن وانت واخدها ان شاء الله
وانا عندي اقتراح علشان مش اي حد هيوافق انك تاخد عربيته للتوكيل
انت ممكن تاخد معاك ميكانيكي مثلا ياخدله بتاع 50 جنيه ولا حاجة .... والعربية اللي تستريحلها وحالتها محترمة اوي .... ديه اللي تاخدها التوكيل
وياريت لو حد تعرفه عايز يبيعها .... هاتبقي مطمن اكتر ان شاء الله
وربنا يرزقك وييسرلك الخير ويهديك الي سواء السبيل ان شاء الله
أقعد بالف عافية

المشاركة الأصلية كتبت بواسطة edrak

الأستاذ حسين و الأستاذ بيشوي
أنا شاكر جدا لكما حسن الرد، و النصيحة الجميلة، و سعيد إني أكون عضو جديد معاكم في قسم النيسان.
و زيادة طمع مني..
هل تنصحون بتوكيل معين؟ أنا أعتقد إن أقرب توكيل لي هيكون السبع فرع زهراء المعادي

الشكر لله ..... ربنا يعزك ويبارك في عمرك .... احنا تحت امرك في اي وقت
وادام اقرب للسبع .... يبقي الف خير وبركة ... السبع محترم جدا ماشاء الله
بس حاول تحجز قبليها حتي ولو بيوم علشان تبقي واخد ميعاد للحجز ويكشفوا براحتهم
وربنا ييسرلك كل خير ان شاء الله

اهم حاجة تاخد حد مبدئيا يكون بيفهم فى العربيات ويفضل يكون ميكانيكى طبعا , يكون بتاعك انت عشان مش يبيعك

وتانى حاجة , خاليك فى العربية اللى يكون صاحبها متابع فى التوكيل كل صيانته , وطبعا ده مثبت فى دفتر الضمان

وحيكون مثبت فى التوكيل لما تروح تسال على العربية , زى ما بتسال علىا لعروسة

وتتفق معاه انك تاخد العربية وتعمل كشف على العربية فى التوكيل , عشان تتطمن على العربية

الكشف العادى تقريبا فى حدود من 150 الى 200 جنيه على ما اعتقد , وده بيبصلك على العربية من تحت , وبيبص على الماتور , وعلى مدى كفائته , وتقدر تعرف ايه اللى ممكن تغيره فى اقرب صيانة , وايه اللى بايظ فيها

الكشف التانى الشامل , بيبصلك على كل حاجة فتوفتة فى العربية من عفشة وماتور وكل حاجة فى العربية جوة وبره وده اغلى شوية تقريبا بيدخل فى حوالى 500 جنيه

وعلى العموم وانت هناك اسال على كل حاجة

بس نصيحة , السوق مالوش كبير , والكل بيضحك على بعضه عشان يبيع ويخلص , فاشترى دماغك ب200 جنيه زيادة بس تطمن على العربية , بدل ما تتدبس فى مبلغ وقدره

العربية اللى توديها على التوكيل اللى تكون فى الاوكيه , وقدرت تتطمن ليها بنسبة مثلا 70 % على الاقل

ومتصدقش لو شيخ بيبعلك العربية وبيحلف لك ميت يمين

انا عربيتى اتعمل معايا كدا وقالولى كانى ومانى وحلفولى , وفى الاخر لقيت الاكصدام مرشوش , وانا ماخدتش بالى ابداااا الا بعد الشراء بشهر تقريبا

ربنا يوفقك , وبالتوفيق , وابقا طمنا عليك

تحياتى