السلام عليكم اخوانى الاحباء
ان شاء الله انا هستلم m11 على اخر الاسبوع بس لسه اجراءات البنك بتخلص وعلى فكر انا اخترت اللون الفيرانى بعد مداولات كبيرة مع المدام بتاعتى
كنت عاوز نصايحكم ليا ساعة الاستلام يعنى اركز على ايه فى فحصى للعربية واهتم بايه لانى سمعت من بعض الناس ان فيه معارض بتشيل من العربية حاجات وتحط مكانها حاجات زى الكاسيت مثلا والولاعة فهل الكلام ده صحيح ولا لأ؟
هستنى ردوكم ونصايحكم ليا وشاكر ليكم مقدما
مبارك عليك
اعطاك الله خيرها
وكفاك شر ابو الفتوح و اتباعه
اولاً:الف مبروك مقدماً,وربنا يباركلك فيها ويكفيك شرها.اقتباس:
المشاركة الأصلية كتبت بواسطة khaled_Saga
ثانياً:وحضرتك بتستلم ياريت تكتب الملاحظات فى ورقه علشان تشيك على العربية وبتركيز.
ثالثاً:1-اللون وتخلى بالك من أى خدوش اونقر وأى تعريج فى صاج العربية,وتركز على النواكل وتشوف هى ثابته فى مكانها تمام وقصدى على النواكل الموجوده فى الشبكه او الشنطه الخ,وتشوف الجلد الخاص باالأبواب يكون راكب تمام مفيش حاجة مخلوعة من مكانها او متركبة بطريقة مش سليمة.
2-تفتح كابوت الموتور, وتراجع على الموتور يعنى تلاحظ اى زيوت على الموتور او اى شىء غريب يشد انتباهك يكون مش طبيعى بلنسبة لعربية زيرو.
اسمع صوت الموتور ولاحظ اى صوت غريب او تخبيط او رعشه زيادة عن الحد.ودور واطفى مرتين ثلاته .
3-من الداخل تراجع على انوار العدادات وعلى انوار الكاسيت والتكيف تشغله والعربية دايره, ومفاتيح الأبواب لأن بها انوار ايضاً,كما تراجع على الأنوار التوضيحية فى العدادات,يعنى زى علامة الأيرباج لازم تنور وعلامة الحزام والebs الخ,راجع على الأوكر الداخلية للأبواب,بمعنى انها تكون ثابته ومفيهاش حاجة مكسورة,بالأضافة الى فرش الأبواب وترجع الكراسى الأماميه للوراء وللامام وتشوف تثبتها يعنى تكون مثبته تمام فى مكانها,وكذلك الكنبه ترجع عليها اذا كانت بتطوى,وراجع على سقف السيارة من الداخل وتثبته وكذلك انوار الصالون.راجع على نور الطبلوه,وعلى الطفاية الأمامية والولاعة,والطفاية الخلفية.
4-راجع على الكاسيت من حيث تشغيله يعنى جرب اسطوانه والأمبيثرى,والراديو,بالأضا فة لمراجعة كل السماعات والتويترات,يعنى اذنك مع كل سماعة,وانت بتضبط الصوت,يعنى ترحل الصوت للسماعتين اليمين ثم تحول الى الشمال وهكذا,وتعلى الصوت الى أخره حتى لوكان هناك اى اهتزازات اورجه فى السماعات.
5-تراجع على حركة الكهرباء لزجاج الأبواب الأربعة,يعنى فى بطىء فى الحركة,الزجاج مش طالع فى المجرى الخاص به بأنسيابيه ومبينحرف وهو طالع او نازل,وتسمع صوت ماكينة الزجاج لأنه ساعات بيبقى فى اصوات تنم على ان فى عيب فى ماكينة الزجاج مثل خبط بسيط اثناء نزول او رفع الزجاج.ايضاً تقفل الباب وتشوف فى صوت للزجاج زانت بتقفل الباب وده معناه ان تقفيل الباب مش تمام.
6-تراجع على كهربة المرايات وتشوف يمين وشمال وفوق وتحت,وشوف اى اسلاك نزله من تحت الطبلوه.
7-راجع على الأنوار الخارجيه للفوانيس الأمامية والخلفية واستوب الفرامل.وحالة الفوانيس من اى خدوش.
8-راجع على شنطة العربية من الداخل وارفع فرش الشنطه وشوف اللحامات الداخلية للشنطه لو لاحظت اى شىء مش طبيعى فى اللحامات متخدش العربية,هى طبعاً زيرو ولكن الأمر ميسلمش,دى تقفيل مصرى.
طبعاً تستلم الكوريك واى متعلقات خاصة بلعربية زى مفاتيع العجل وخلافه يعنى اسأل اى حد قديم استلم الأم 11 عن متعلقات العربيه ,واذا كان الخمسة عجلات بجنوط يبقى لازم الأستبن يكون بجنط ايضاً.
القى نظره على عتب العربية علشان احيناً بيبقى مخبوط من السواقين اللذين ينقلون السيارة من التوكيل الى المعارض.
وأخيراً الف مبروك ويارب اكون حاولت اذكرك ببعض الأشياء المهمة.
بارك الله فيك وشكرا على مجهودك الطيب ودى معلومة هتفيد كل الى بيشترى عربية زيرو
ربنا يباركلك فيها انشاءالله ويديلك خيرها ويكفيك شرها
انشاءالله ياأستاذ khaled تتبسط من العربيه جداً جداً جداً
بس أعمل حسابك انك ماتعديش الـ rpm3 أول 1000 كيلو وماتشغلش التكييف غير بعد ما تعدي الـ 1000 كيلو برضوا وما تستعجلش على سحب العربيه علشان بعد الـ 1000 والله هتحس انك راكب عربيه محترمه وهى فعلاً محترمه وربنا يبارك لنا جميعاً
تحياتى
سمي الله وانت بتبدأ و بعدين بص علي العربية من برة ....
- اتأكد ان مفيش حكات ولا خدوش ولا بقع في الدهانافتح و اقفل البيبان واتأكد انها بتفتح بسهولة وانها لما بتتقفل بتقفل في مكانها مش مريحة
- الشنطة و الكبوت نفس الموضوع زي البيبان
- الفوانيس تكون راكبة في مكانها مش مرحلة ولا معووجة
- كاوتشات الازاز داير ما يدور لالاربع بيبان و قدام و ورا
- مفيش عجل مهوي
- الاستبن نفس الجنط و نفس العجل
- العدة موجودة
- الطفاية موجودة
- الاسعافات و المثلث
- و بعدين سمي و ادخل اقعد جوة
- دور العربية بتدور من مرة واحدة بدون اصوات تخبيط
- و تبطل و تدور تاني
- كل زرايرك شغالة
- و تشوف انوار العربية داير ما يدور
- فتحة التانك
- مكن الازاز طالع نازل و تتأكد انه كله بينزل من ضغطة واحدةو كمان ما يكونش بيتحرك قدام و ورا و هوه طالع بس او نازل بس " يعني و انت بتنزل مثلا الازاز اللي جنبك ما يفضلش لوح الازاز يميل قدام و بعدين ورا لان كده يبقي في حاجة حشراه"
- اللوك بتاع الازاز و زرار السنتر اللي في دراع باب السائق
- التابلوه راكب عدل و لا قابب يمين ولا شمال
- مفيش فراغات اوسع من ناحية عن التانية
- الكراسي بتتحرك كويس
- ظهر الكنبة بينزل كويس
- مخادع الكراسي اللي قدام بيتحرك قدام و ورا
- الشماسات اللي في السقف و المراية اللي في اليمين سليمة
- انوار الصالون الامامية كلها سليمة و بتنور مع الباب ولما تطفي الزرار بتطفي
- انوار الراكب الخلفي يمين و شمال سليمة
- التكييف باوضاعه كلها
- درج التابلوه بيفتح و يقفل
- الدرج العلوي اللي في النص سليم
- الجلد بتاع جراب الفتيس وفرامل اليد سليم و راكب كويس
- طفاية السجاير اللي في ضهر الكونسول للركاب الخلفيين
- طفاي السجاير اللي ما بين الركاب الامامين
- الولاعة شغالة
- الكلاكس
- المساحات
- سنسور المطر
- سنسور النور
- شغل كل حاجة في الكاسيت بس خد معاك cd و يا ريت يكوت قران كبداية
- مفيش انذارات في التابلوة علي اي حاجة لا قدر الله
- و اتأكد قوي ان العداد مش عامل 50 كيلو و ده حتي كتير لو كنت من القاهرة
كده تسمي و تنطلق بقي ..... و ربنا يكفيك شر الطريق ... و شر حاسد اذا حسد علشان بجد العربية بتجيب عين جامدة التنين .... ربنا يحفظك ان شاء الله
اخونى الاحباء اشكركم كلكم على اهتمامكم ان امحبتش ارد على واحد واحد لانى مش عارف اشكر مين ولا مين فحبيت اعمم الشكر
دعواتكم ليا ان يكون ربنا هدانى للاختيار الصحيح ويطلع كلام الناس غلط وتكون العربية كويسة انا توكلت على الله واكيد مش هيخذلنى وان شاء الله اقولكم الاخبار لما استلم
ربنا يوفقك ياخالد باشا للاختيار الصحيح ويباركلك فى السيارة الى هتختارها ان شاء الله وفى انتظارك علشان تطمنا عملت اية
مبروك مقدماً ياباشا، العربية جميلة جداً
وأن شاء اللّه هتعجبك
وطبعاً مفيش نصائح ممكن تتقال وانت بتستلم اكتر من القالوة اخواتنا فى المنتدى
بس النصيحة الوحيدة ال أحب اضيفها لك ، انك تراجع على كل القالوة الاخوة، قبل توقيعك على ورق الاستلام والمعاينة، وكتابة اسمك على جواب الملكية الموجة للمرور،
لان فى الغالب، المعارض بتخليك توقع وبعد كدة يقولك عاين زى منت عاوز
ولو طلع حاجة ، مبيتفعش يرجع العربية
يا جماعة انا معنديش airbag هو ده عادي و لا ايه :)
مفيهاش اساسااقتباس:
المشاركة الأصلية كتبت بواسطة hany_ali