أولا .. شكر خاص جدا للأستاذ دياب بصراحة راجل قمة فى الرجولة والإحترام الراجل أول لما كلمته وعرف انى فى الإسكندرية جالى مخصوص وكمان حل مشكلة بصراحة لولا ان ربنا جعله سبب ليا انا مكنتش عرفت حليت المشكلة .. طبعا انا كنت فى زيارة لأحد أصدقائي والمكنة وقعت على الأرض وذراع الفرامل الأمامية اتكسر تخيلوا بقى دياب عمل ايه ؟؟ راح جاب الميكانيكى من البيت وفتح المحل وركب الذراع وكانت الساعة تقريبا 12 بالليل يعنى مستحيل ألاقى حد فاتح ... بجد والله الراجل ليه جميل عندى وربنا يقدرنى وأقدر أرده ... ودى أقل حاجة أقدر اعملها ان كل حبايبنا فى المنتدى يعرفوا ان دياب بجد يستحق اكتر من انه يبقى عمدة المنتدى ... وربنا يجعله فى ميزان حسناته ...


ثانيا .. زى ماقلتلكم انى سافرت بالمكنة كان فى بعض ملاحظات عن المشوار ده ..

1- الطريق الصحرواى أفضل من الزراعى كتير جدا وخصوصا ان اغلب الطريق مستقيم ...
2- تحت أى ظرف من الظروف لا تسافر ليلا لأن الرؤية ضعيفة والإنارة فى الطريق تكاد تكون منعدمة ...
3- السفر بالمكنة ممل لوانت مسافر لوحدك .
4- بالنسبة للبنزين هتفول مرة من أول الطريق فى القاهرة ومرة من أول الطريق فى الأسكندرية
5- ملابس الأمان لو مش موجودة متسافرش تحت أى ظرف وخصوصا الخوذة والجوانتى والجاكت .
6- مهم جدا تغيير الزيت والتأكد من كفاءة دورة التبريد وكفاءة الفرامل ( لولا دياب الله يبارك له مكنتش سافرت لأن الفرامل الأمامية أهم من الخلفية وخصوصا وقت التوقف المفاجئ )

فى النهاية أحب أقول لا تسافر بالمكنة وحدك إلا فى حالة الضرورة .