س و ج عن شيفرولية سبارك

**fawzyyyy** · 27-04-2011 06:15 PM

ماركة العربية ايه؟
شيفروليه يا فندم
سبارك او سبارك لايت عشان في سبارك تانية اغلي اسمها نيو سبارك

هي موجودة من امتي في مصر ؟؟
من 2007

طيب تصنيعها فين و تقفيلها فين؟؟
متصنعة و متقفلة بالكامل في كوريا

طيب و ايه الميزة في كدة ؟؟
اتفرج عليها حتلاقي تقفيلها ممتاز و لو عرفت تطلع فيها عيوب مش حيبقي اكتر من 5%

هي كام سلندر ؟؟
4 سلندر

كام سي سي ؟؟
995 سي سي

يعني 1000 سي سي يعني مش فارقة ؟؟
لأ تفرق في الترخيص حتدفع اقل حوالي 150 جنيه

طيب و هي علي كدة بقي بتجري ؟؟
والله بتجري و ممكن تقفل عدادها كمان

طيب و ايه اخبار ثباتها ؟؟؟
اكيد بتتريق….هي اصلا كلها 2 متر * 2 متر
طبعا هي لحد 130 كم و بعد كدة خطر طبعا

هي بتسحب بنزين قد ايه ؟؟
هي اقتصادية جدا بصراحة بتعمل حوالي 240 كم بالتكيف جوة القاهرة و 290 كم من غير تكييف جوة القاهرة لكل صفيحة طبعا

بتحطلها بنزين ايه ؟؟
بنزين 92 و ساعات 90

يعني مينفعش بنزين 80 ؟؟
انت اصلا مش حتحتاج توفر لأنها ما شاء الله موفرة في البنزين فخليك في النضيف احسن

طيب تعالي نتكلم علي تكيفها عامل ايه بيبرد ولا اي كلام ؟؟
والله تكيفها معقول و جميل
يعني لو في عز الحر العربية بتحتاج حوالي 10 دقايق عشان التكييف يأثر

طيب بيأثر علي العربية في السحب يعني ؟؟
طبعا بيأثر علي السحب بس صدقني مش لدرجة انه يزعجك

طيب هو بييجي معاها كماليات ؟؟ مثلا الزجاج ؟؟
كهرباء يا فندم بس ورا زجاج عادي

طيب الباور ؟؟
زي الفل و خفيف ما شاء الله

مفيش كماليات تانية ؟؟
الباور و التكيف و الزجاج و كاسيت و سماعتين قدام و سنتر لوك و مراية يمين كهرباء

اشمعني المراية اليمين ؟؟
غالبا عشان هي البعيدة عنك

طيب شنطتها مساحتها كويسة ؟؟
معقولة الي حد ما
بتشيل حوالي 4 شنط هاند باج
و صحيح انا نسيت اقوللك انها ممكن تتفتح من جوه
و في مساحة زجاج خلفية علي الشنطة

طيب و صاجها عامل ايه ؟؟
زي كل الجديد طبعا صاج خفيف بس مش وحش

طيب انت قولت ان فيها كاسيت ؟؟ كاسيت شرايط ولا سي دي ؟؟؟
انا قولت كاسيت مش سي دي ....... يعني شرايط يا فندم

طيب جودته كويسة ؟؟ يعني صوته حلو ؟؟
لأ وحش

وحش اوي يعني ؟؟
لأ ممكن تستحمله بس الافضل تغيره و تزود سماعات ورا

بس العدادات بتاعتها في النص ؟؟ متهيألي مش حلوة ؟؟
والله هي اذواق

ما انا عارف بس متهيألي العربيات الصيني هي اللي فيها العدادات في النص بس ؟؟
لأ طبعا عندك الماتريكس و السيتروين سي 4
و النيسان اكس تريل

هي حلوة بصراحة بس يا اخي صغيرة اوي اوي ؟؟؟
هي فعلا صغيرة بس انت عايز كام واحد يركب فيها
انت ممكن تركب 3 ورا علي الكنبة و مش حتبقي ضيقة

طيب هو الكابوت صغير كدة ليه ؟؟
بصراحة هو الميزة انه مصغر العربية و ده حينفعك في الركنة
لكن عيبه الوحيد انك لو فتحته حتلاقي ان كل حاجة قريبة من بعض و ده عيبه بقي في الحوادت لا قدر الله

الكابوت بس ما هو الشنطة كمان عيبها في الحوادث ؟؟
طبعا بس العيب ده في كل عربيات الهاتش باك كلهم الخبطة في الشنطة مؤثرة طبعا في العربية

طيب انا سمعت ان العربية مفيهاش عداد حرارة ؟؟؟هو الكلام ده صحيح ؟؟
ايوة صحيح

يعني العربية تولع و انا مش عارف ؟؟
لأ طبعا التابلوه اللي قدامك فيه لمبة بتنور اول ما العربية تفكر انها حتسخن و اضاءة اللمبة بتزيد تدريجيا

مش عارف ليه مش مطمن للمبة ديه ؟؟؟
علي فكرة معظم العربيات الهاتش باك الجديدة مفيهاش عداد حرارة و فيها اللمبة ديه زي البيكانتو و الاكسنت

بس العربية ديه حاسس انها مش موجودة كتير ؟؟؟
هي كانت الاول نادرة و ده لأن سعرها كان غالي اول ما نزلت و ماكنش فيها باور
غير كدة كانت قطع غيارها قليلة

يالهوي يعني قطع غيار العربية قليلة فعلا ؟؟؟
لا طبعا دلوقتي انتشرت

اشمعني دلوقتي؟؟
عشان منصور عمل حركة صايعة جدا انه في الصيف اللي فات نزل سعرها جامد و وصلت ل 50000 الف جنيه
و ساعتها ناس بدأت تشتري العربية و اما بدأت العربية تنتشر رفع سعر العربية تاني
و بدأت الناس تستعلم عن العربية اللي بدأت تنتشر ديه و طبعا الناس بدأت تشكر فيها بعد اما جربتها
علشان كدة قطع غيارها انتشرت في السوق اول ما زادت مبيعاتها

طيب قولي بقي ايه اخبار ما بعد البيع ؟؟
قصدك ايه

يعني ايه اخبار منصور ؟؟
زيه زي غبور
يعني زي التوكيلات المصرية كلها

طيب سعر قطع غيارها ؟؟
قطع غيارها سعرها معقول و موجودة في التوكيل و بره التوكيل بس مشكلتها حاجة واحدة

ايه هي المشكلة ؟؟
انها مبتنزلش غير كوري

طيب ديه متهيألي حاجة حلوة ؟؟
لأ طبعا اما بيبقي في منها كوري و تايواني و صيني بيبقي في اختلاف في الاسعار
و ده طبعا بيريح المستهلك و يختار اللي يناسبه

معلش عندي سؤال اخير ؟؟ مفيش اي مشاكل ظهرت في العربية ديه لحد دلوقتي ؟؟
و الله ماسمعت اي عيوب او مشاكل عامة
لكن اكيد في مشاكل او عيوب بس فردية

تم اضافة الموضوع الى اهم مواضيع الاسبارك
مشرف 20ب