الموضوع: اعتداء ضابط جيش على سيارتى وعلى اهلى "حسبى الله ونعم الوكيل"

المشاركة الأصلية كتبت بواسطة blazer

السلام عليكم ورحمه الله وبركاته
هحكيلكم اللى حصل
انا راكنت عربيتى امام مدخل العماره الخاصه بى
وصليت العشاء ورحت مشوار
نص ساعه ولاقيت اختى بتكلمنى وبتقولى تعالا حالا
رجعت طبعا علطول واتحكى لى الاتى
الضابط دا اخته اتصلت بيه
راح جاى ومعاه عربيتين جيش محملين جنود وسلاح ونزلهم و وقفوا تحت العماره
وسب دين وشتيمه وقله ادب وراحوا شايلين عربيتى ورامينها فى الشارع
ودا نص شكوى انا قدمتها

بس انا شلت منها البيانات اللى انا اخدتها
اخدنا ارقام سيارات الجيش المعنديه واسمه بالكامل

قدمت شكوى بس انا من حرقه دمى قولت اقول لاخواتى فى المنتدى واسمع نصيحتهم

الشكوى والدتى اللى قدمتها عشان انا مكنتش شاهد الواقعه

بتاريخ الاحد الموافق 24/4/2011 الساعه 22:30 فوجئنا بالسيد الرائد بصحبه مجموعه من أفراد القوات المسلحه بإحضار (2)عربه مدرعه جيش لوحات معدنيه أرقام ومعه جنود وسلاح الى منزلنا والذى يسكن اهله فى نفس العماره .

قامت الجنود بالنزول من السيارتين وهم يحملون اسلحتهم الناريه بشكل تهديدى وارهابى لسكان المنطقه واخذ الرائد يصيح بأعلى صوته أمام مرأى ومسمع جميع السكان " اى واحد هيفتح بقه هياخد بالجزمه و هضربه بالرصاص وملوش ديه " وعندما اخبره السكان بانه لا يصح للجيش الذى يحمى الشعب ان يفعل هذا وان ما قاله يخالف الاعراف والمبادى والاخلاق العسكريه, أمسك بسترته الميرى وقال الفاظ نابيه منها على سبيل المثال : دين أم الجيش ميلزمنيش مع اطلاق السباب للمواطنين , وقد غادرت القوه المدرعه بعد حوالى 15-20 دقيقه تقريبا من حضورها .

وكل هذا بسبب ان ابنى قام بركن سيارتنا الخاصه امام المنزل وشقيقة الرائد ياسر تريد ان تركن سيارتها الخاصه فإتصلت به فقام الجنود بإخلاء سيارتنا فى منتصف الشارع بالقوه وقام بالسب والتهديد وقال لنا" ابنك أقدر اوديه ورا الشمس ولا اهله يعرفوا ليه طريق " حيث ان ابنى لم يكن موجود فى المنزل ولكن تحت التهديد الصارخ تعاطف اهل الشارع للموقف وذهبنا الى السريه (28) نيابات الساعه الثانيه بعد منتصف اليل ولكن لم يكن هناك احد

شوف يا باشا انا كنت في الجيش ايام خدمتي مجند في مركز قياده رفيع المستوي و اقدر افيدك ان شاء الله و يا ريت تكون علي تواصل معايا عشان انا دمي اتحرق ذي ما يكون الموضوع ده حصل معايا شخصيا .
اولا ... تشوف الوحده الي فيها الافندي دا و تشتكيه لقائد الوحده بتاعته بموجب شكوي خطيه .
ثانيا ... تكتب شكوي تانيه بأسم السيد اللواء مدير اداره شئون ضباط ق م و ترفق بيها الشكوي المقدمه لقائده وحده ( الافندي ) .
ثالثا ... و تكتب نفس الشكوي بأسماء كلا من ( السيد اللواء مدير اداره تفتيش ق م - السيد اللواء مدير اداره تدريب ق م ) و اهم حااااجه بقي ( مذكره شكوي بكامل التفاصيل و مرفق بها الشكاوي السابقه ) و دي بأسماء
السيد اللواء امين عام ق م - و السيد الفريق رئيس اركان حرب ق م - و السيد المشير القائد العام للقوات المسلحه وزير الدفاع و الانتاج الحربي .
و في الشكوتين بتوع الساده القاده ( رئيس الاركان - و وزير الدفاع ) تذكر الاتي
في اخر الشكوي تتذيل ب ( تم عرض شكوانا لسيادتكم واثقين في عدالتكم و انصافكم و تخوفا من تكرار الاعتداء السافر من الضابط المذكور نظرا لتكرار تواجده بمقر اقامتنا لظروف تواجد شقيقته بنفس العقار و كذلك حرصي ( الضمير عائد علي الست الوالده ) علي عدم استغلال الموضوع كماده اعلاميه في وسائل الاعلام الخبري و الفضائي حرصا علي مصلحه البلاد في تلك الظرف الراهن .
ملحوظه هامه جدا جميع الشكاوي تقدم بأسم السيده الوالده .
و يا ريت تتابع معايا اخر التطورات و ابقي قولي ايه الي حصل يا مااااااان

بص يا باشا لو الموضوع حصل بالترتيب الى حضرتك كاتبة كدة بالظبط دة ظابط عفوا أهبل و عبيط لان سهل جدا جدا شكوتة و حا يتحقق معاة و ممكن جدا يتدور مكتب ((( يعنى يسأل عن الواقعة و يتحقق معاة ))) لو الجيران شهدو بالكلام دة و الظابط الغبى كان جاب عساكر و نزلو بالسلاح لترويع الناس ممكن جدا جدا فى الظروف الراهنة يتسرح من الخدمة عاوز تصطادة صح الزملاء قالو لك عن بعض الاماكن الى ممكن تشتكية فيها و ممكن تبعت على صفحة القوات المسلحة و لو عاوز تسيحلة كلم قناة أون تى فى و الحياة . لو كان عندك فيديو الموضوع مش حا ياخد وقت خالص

ايه قلة الأدب دي
بالله عليك ما تسكت عن حقك علشان يكون عبرة لغيره دي قضية رأي عام مش قضيتك لوحدك وعلى أساسها هيتحدد التصرف مع الحالات المشابهة
ربنا يرحمنا من الأشكال دي طيب الشرطة وبيخشوها علشان يسرقو انما الجيش ده واقف في الصحره داخله علشان يعمل ايه بس

حضرتك ممكن تتقدم ببلاغ فى النيابة العسكرية ضدة دة أوقع حاجة و أقصر الطرق شوف مكان النيابة العسكرية القريب منك و أكتب شكوى