انا عندي مشكله مزمنه في تكييف العربيه كورولا 97 كنت عامل ليها الموضوع ده
http://www.nilemotors.net/Nile/214679-a.html

امبارح الخميس كان عندي مشوار شغل في القاهره قولت اخلصه واروح لاحمد تكييف بتاع ارض اللواء كتير من الناس شكرت فيه في المنتدي

طالع الصبح حوالي الساعه 7 الاقي المطر زي منكون في يناير و العربيات علي الزراعي بتجري بشكل صعب مع المطر بس الحمد لله وصلت بدون مشاكل خلصت شغلي بعد الظهر قولت اعدي علي احمد تكييف كلمته لقيته في الورشه التانيه بتاعت اخوه في شارع احمد عرابي روحت له كانت الساعه تقريبا 2 الظهر

الراجل الحقيقه محترم عرفته اني جاي له مخصوص من المحله علي السمعه اللي عاملها علي نايل وكشف علي العربيه انا كنت بقول ربنا يستر وميكونش كباس المهم لقا خرطوم الضغط العالي محتاج تغيير و كمات كام فعصه محترمه فى المواسيير

الشغل اللي عمله

تغيير الخرطوم بتاع الضغط العالي
اربع لحامات مع تغيير مواسير اماكن الفعصات
شحن فريون 406 (انا عندي مكتوب علي الكمبروسور R12)

المهم و الصبي بتاعه بيلحم المواسير في ارض اللواء كنت باظبط في العربيه الاقي الكاسيت مش شغال و ساعات الصوت يبقي وحش جدا و الموديلاتور بتصلع صوت سئ جدا علي الراديو انا بدأت اتقفل

جينا نجرب بعد ما عملنا الشغل الاقي حاجات غريبه ادور العربيه عادي جدا اجي اشغل التكييف يشتغل ومروحته تدور بس العربيه تهيس و ومروحه الرادياتير تبطل مع اني بأزود بنزين شكينا في تعديله كنت عاملها لتشغيل مروحه سربنتينه التكييف الخارجيه مع مروحه الرادياتير و قالي ان ممكن الكهربائي يكون عامل حاجه مش مظبوطه و اني اراجعها معاه (اتفلت زياده)

كانت الساعه بقت حوالي سبعه قولت بارك الله فيما رزق انا اروح وربنا يستر ونصحني اني مأشغلش التكييف غير لما احل المشكله

دورت ويدوب اتحركت اجي اشغل النور العادي مفيش مش شايف حاجه نزلت ابص الاقي النور ضعييف جدا (خلاص بأه )انا حسيت ان العربيه اتبدلت انا جاي بيها الصبح زي الفل ومشغل النور كمان علشان المطر و الشبوره

و انا علي الطريق لقيت الكاسيت الحمد لله اشتغل قولت كويس بس احاول اشغل النور العادي يفصل ادوس فرامل نور العدادات يضعف

قولت بس وجدتها البطاريه جابت اخرها و كملت الطريق المظلم بنسبه 70% بنور الاشاره فقط حتي الفرامل اكتششفت انها كانت بتنور نورها ضعييف جدا

و صلت الحمد لله حوالي 9:30 علي الكهربائي قولت له عايزين نكتب شهاده وفاه البطاريه وحكيت له اللي حصل قالي الاول نقيس شحن الدينامو و نجرب بطاريه تانيه قيسنا شحن الدينامو ضعييف و قيسنا البطاريه كويسه يعني دينامو !!!!!!!!!!!!!
نجرب ببطاريه مشحونه من عنده العربيه مبرجله برضه من اول تشغيل !!!!!!!!!!!!!

الراجل عمل تجربه لتقويه الارضي والمفاجأه ان كل حاجه اتظبطت

قالي ان المطر عمل رطوبه ضعف الارضي شغلت النور و التكييف والكاسيت وعشت كله تمام بعد ما كنت جهزت نفسي لتغيير بطاريه 400 او 500 جندي طلعت تقويه ارضي بقروش الحمد لله

-بالنسبه للتكييف هو تحت التجربه للتقييم راجع اصل المشكله في الموضوع السابق
- احمد نفسه محترم و تعامله كويس جدا (يارب يكون الشغل كويس زي المعامله)
-المصاريف
130 جنيه شحن فريون 406
140 جنيه خرطوم وسط بالكبس (بيتهيألي كتير اوي انا اتفاجأت)
40 جنيه اربع لحامات مواسير
40 جنيه مصنعيه
---------------------
الاجمالي 350 جنيه