الموضوع: تركيب التكييف في الماروتي.. تقرير حصري مصور.. تابعونا

المعلم شريف خلص التقفيل والتوصيلات الكهربية على الساعه 8 ونص بالليل
وبعد الكهربا مش باقيلنا غير شحن الفريون......


بدأ المعلم شريف بشحن الفريون بمعرفته
وتوكلنا على الله ودورنا العربية وشديت الشفاط لان التكييف بيحتاج كهربا من الدينمو ولازم العربية تكون دايره بطاقه عاليه وبالتالي يا اما ندوس بنزين يا اما الشفاط

بسم الله وشغلنا التكييف....

الجو كان بارد جدا في ذلك الوقت
وده منعني اني اقدر احكم عالاداء,,,
قفلنا العربية ولم المعلم عدته وتوكلت على الله على اني لو في حاجه كده كده معانا ضمان سنه
هههههههههههههههههههههههه

ركبت العربية
هبدأ التقييم بقا....

طبعا انا روحت من الدائري
في البدايه كنت شادد الشفاط على الدرجه التانيه
طبعا هتتساءلو
صوت العربية مش عالي؟؟؟
هقولك اطلاقا لان حمل التكييف مخليها كأنها صلانسيه عادي

التأثير على السحب..
هتكلم على جزئية التسارع اولا
طبعا التكييف في اي عربية بيأثر على التسارع حتى لو كانت طياره
لكن بيأثر قد ايه هو ده المهم
لو الشفاط مش مشدود وانت بتعبي بنزين 80 العربية طبعا هتسقف منك تسقيفه بسيطه وهتبرجل وتترعش ومن ثم هتنطلق
لو هتشد الشفاط وببنزين 80 برضو هتسقف تسقيفه صغننه خالص وهتطلع عادي جدا
تجميع السرعه بطئ بس مش للدرجه اللي خوفوني منها
عادي يعني العربية لازالت بتجري كعادتها...

طيب
نتكلم عن السرعه القصوى
مبدئيا انا معرفش كل واحد كان بيجيب اخره سرعة كام
لكن عن نفسي كنت مبعديش ال 110 في كل الاحوال للامان
عالدائري حاولت اني اشد واجرب هجيب كام
العربية مستريحه جدا لحد سرعة 90 وبتجيبها في وقت مقارب جدا للحاله ما قبل التكييف
من 90 ل 100 هتاخد منك وقت على ماتجيبها وهتحس انك فعلا في حاجه مكلبشه العربية...
اقصى سرعه جبتها كانت 120 لكن انا مبحبذش كده لان مفيش داعي تحط حمل عالموتور عالفاضي,,,

رأيي المتواضع ان انت مش هتاخد كل حاجه واعتقد ان الواحد ممكن يضحي بالفرق البسيط ده اللي احنا مش محتاجينه اصلا في مقابل التكييف

بالمناسبه
مجرد اما تمشي العربية ومفيش زحمه ومفيش وقوف كتير رجع الشفاط لانه ملوش داعي يفضل مرفوع
هوا مهم جدا لو هتكون في زحمه او واقف انما والعربية ماشيه لا داعي له...

نكمل التقييم...
استهلاك البنزين وما ادراك ما استهلاك البنزين
ده مش هقدر اتكلم عنه حاليا لان المكنه لسا مركبتش
لكن مبدئيا
ببنزين 80 كانت العربية بتشربه شرب ومعمريش كان الاستهلاك بالشكل ده لدرجة اني وانا في شوارع طوالي التنكي قرب عالاي في اقل من 280 كيلومتر!!!!!!!
النهارده ملقتش 80 ففولت 92 والفرق ملحوظ في الاستهلاك لكن اصبروا شويه على ما اقدر اخلص التفويله واقولكم عالنتيجه...

الجميل ان ال 92 فرق جامد مع ان قبل كده مكنش عندي فرق بين ال 92 وال 80 لكن ال 92 العربية سحبت بيه احسن وطلعتها كانت اخف....

طيب
نيجي لاهم حاجه...
تقييم التبريد وحرارة المحرك,,,,

اولا كنت محتاج ييجي يوم حر عشان اجربه فيه
لان كل التكييفات كده كده بالليل بتبقى كويسه

امبارح كان يوم حار جدا
وانا مروح
كنت بنصهر من الحراره للاسف!!!
كأنه مش راكب خالص














متتخضوش كده
ههههههههههههههههه
الفريون مكنش مشحون بالكامل ورجعت لشريف النهارده وشحنه والتبريد بقا 100 % وكان معايا النهارده سبعاوي وكنا ماشيين والحمد لله كان ممتاز وده الساعه 2 الظهر النهارده..........
طبعا شريف اتأكد ان مفيش تسريب وقالنا برضو انا معاكم متقلقوش التكييف ده عندي... وطبعا ده تبع الضمان ومخدش حاجه,,,

بالليل مش هتستحمل تحط التكييف على 2
الظهر لازم تحطه على 2 او 3

العربية مساحة الزجاج فيها كبيره جدا
وده بيحط عبئ حراري كبير عالكباس
وكان المقترح حاجه من اتنين
اما تفييم العربية وده ممنوع وانا مروح امبارح الساعه اتنين بالليل واللجان بتوقف الناس وتخليهم يفكو الفاميه وشفتهم بعنيا
او وضع ستائر شبه شفافه وانا بأيد الموضوع ده ولازال الموضوع تحت التجربه....

يعني في الاخير بقولكم ان انا وسبعاوي راضيين ولله الحمد بالنتيجه دي جدا جدا
وهقول حاجه مهمه لاي حد هيركب التكييف....

اولا احنا راكبين ماروتي مش فيراري فمتتخيلش انك هتاخد عربية سوبر تيربو
كده كده عربيتنا مش معموله للسحب...
ثانيا ان عمر التكييف مهيكون زي التويوتا ولا العربيات الكبيره لكن هتكون مبصوط منه جدا خصوصا لو طريقك اغلبه طرق طوالي او لو بتسافر كتير....
ثالثا لو انت طرقك كلها زحمه وقرف ممكن تركبه بس تستحمل ان استهلاك البنزين هيعلى بسبب ان المكنه (او الشفاط) هيعلو العربية شويه...
نيجي لموضوع حرارة المحرك اللي الكل خايف منها
انا جربت العربية ببنزين 80 وبنزين 92
ال80 كانت حرارة العربية بتعدي النص بملي بالظبط مش اكتر من كده ده في اسوأ الظروف والزحمه والقرف
ال92 الحراره موصلتش النص حتى والعربية راكنه واقفه مبتمشيش
فمحدش يخاف من الحراره خالص مالص الحمد لله...

في رأيي التواضع.... التكييف يستحق العناء لمدة يومين متواصلين والتعب والارهاق ولله الحمد والمنه
وخلاصة التقييم:
شغااااااااااااااااااااااا ااااااااااااااااال


اتمنى اني اكون وضحتلكم التجربه كاملة وجاهز لاستفساراتكم واسئلتكم وان شاء الله سبعاوي يخلص شغله يوم الاحد ويكملنا تجربته ورأيه الخاص.......


تحياتي