علم مصر

**SYD** · 29-04-2011 01:25 PM

السلام عليكم ورحمة الله وبركاته
اخواني الأعزاء
اعضاء نايل موتورز
كنت عايز اعرف رأيكم هل انتوا كمان زيي ولا انا بس الي شوفت كدة
بعد ثورة 25 يناير لاحظت كمية اعلام لا حصر لها بجميع الاشكال والأحجام
وعلي كل حاجة في الدنيا
طبعا دة شئ جميل
واليومين الي فاتوا وجدت علم بلدنا الجميل والمفروض انه مقدس علي علب واكياس المناديل
انا شخصيا اشتريت منتجين من شركتين مختلفتين وكانت كل شركة حاطة العلم علي كيس المناديل
انا كنت مضطر اشتري لآن كافتريا الشغل عندي ماعندهاش غيره ومفيش قدامي بدائل
تفتكر حضرتك كيس المناديل بعد لما يخلص هعمل فيه ايه؟؟؟ هبوسه واحطه علي راسي من فوق ولا !!!!!!!
ارجوكم يا جميع شركات مصر بلاش تدخلوا شعار بلدنا الحبيبة في موضوعات تسويقكم
انتوا بدل ما بتكرموا العلم انت بتبهدلوا العلم
اعتقد علم بلدي وشعار بلدي غلاوته من غلاوة بلدي ومايصحش يتبهدل اكتر من كدة
وكفاية بقي استغلال لأي حاجة في مقابل تسويق منتجي
والله المستعان

**misoalex** · 29-04-2011 09:34 PM

ههههههههههههههههههههههه

اشرب عصير الثوره
YouTube - ‫ط¹ظ…ط±ظˆ ظ‚ط·ط§ظ…ط´ ط§ظ„ط«ظˆط±ظ‡‬&lrm;

عادى كله بيتمحك فى الثوره

**فادى محمد** · 29-04-2011 10:09 PM

انتوا ماسمعتوش عن رنجه الثوره ولا فسيخ الحريه وماشفتوش محلات فتحت واسمها 25 يناير؟؟ كله استغلال لماسي الشعوب .

**Mahmode** · 30-04-2011 12:34 AM

كلو بيستغل الثورة لمصلحتو

**rosebox** · 30-04-2011 12:45 PM

مش عارفه. حاسه انه استغلال حميد او تلقائى للحاله اللى المجتمع عايشها
يعنى لما كان كل هم المجتمع المصرى هو الكوره و الفن و الفنانين كنت تلاقى القهاوى اسمها ابوتريكه و كل حاجه اساميها تعبر عن الكوره و الفن و و كل حاجه اسمها بالانجليزى محدش قال ده استغلال
دلوقتى كل الناس متأثره بالثوره و الحريه و الوطنيه فحتلاقى كل المحلات تستغل ده. يعنى بصراحه انا شايفاها مرايا للمجتمع و اهتماماته و حاسه بالفخر ان ده بقى اهتمامات بلدى و نفسى بقى نشوف ده فى اخلاقنا و شغلنا.

**azmeralda** · 30-04-2011 03:43 PM

هو حلو بس بالعقل طبعا
انا شارية توفى بحبك يا مصر وطبعا كل واحدة ملفوفة فى علم مصر مش هفضل الم ورق التوفى !

**SYD** · 30-04-2011 10:13 PM

يا جماعة احنا مجتمع بيحب الزيطة وبنحب نزيط في الزيطة
يعني 99.9999 من الشعب المصري لازق علي زجاج عربيته 25 يناير علي شكل لوحات (اللون الاحمر معناها نقل والبرتقالي أجرة وقليلاً من الازرق يعني ملاكي) واجمل حاجة تلاقيه واقف صف تاني او ماشي عكسي او لو حد قفل عليه الطريق يشتمه ويشتم البلد (مصر) والي عملوله رخصة
احنا بس يا جماعة متأثرين شوية بأغنية شيرين (دور جواك تلاقاها هي الصحبة وهي الاهل) ومحمد منير (ازاي)
لكن بكل أسف وحسرة مصر هي مصر والمصري هيفضل مصري والله لو حتي القيامة قامت مش بقي ثورة قامت
بكل اسف احنا خسرنا اكتر ما كسبنا
انا شخصيا حصل معايا موقف لا اعتقد انه كان ممكن يحصل معايا قبل الثورة
والأمثلة يا جماعة كتير اوووي
العملية مش بالعلم ولا بالحماس بتاع الاغاني
المشكلة فينا احنا
الي استغلوا الثورة اكتر من الي عملوا الثورة واكثر من الي استفادوا من الثورة
لسة لحد النهاردة البياع بيغش ويكتب علي الموز 4 كبيرة اوووووووووووووووووووووووو ووي والخمسة بتاعة النص صغيرة اوي عشان يغشك وتشوفها 4 مش 4.5 او يجيبلك موز ماينفعش حتي تتزحلق بيه ويقولك هو دة ابو 4
لسة سواقين الميكروباصات عندهم انحرافات اخلاقية وبيقطعوا المسافة
لسة الموظفين بياخدوا رشوة
لسة كل حاجة زي ما هي
الجديد بس ان الاعلام كترت اوووووووووووووووووووووووو ووووووووووووووووووووووووو وي
لدرجة ما بقتش اعرف ان النهاردة في ماتش ولا لا لأني فكل اشارة شايف بياعين بتوع اعلام
والله المستعان