Wd40 الاسطورة الفاشلة

**keko** · 30-04-2011 07:51 AM

الموضوع ده انا عامله اصلا لانى استغربت جدا بقالى فترة طويلة بسمع عن wd40 اللى بيشيل اى حاجة وبيظبط كل حاجة وكل اللى يقول عنده مشكلة يقولوله هات wd40 لحد ما قلت خلاص نجرب الاسطورة دى رحت عند واحد مضمون علشان يكون اصلى وحطيته فى الشنطة وخلاص

بعد فترة كان عندى بقعة شحم وزيت على السقف بقالها مده افتكرت طبعا الاسطورة قمت مطلعة وراشش ومسحت مفيش اى حاجة طلعت !! قلت يا واد يمكن بياخد وقت بقيت ارش واسيبه شوية كويسين برضه مفيش المهم بعد محاولات مستميتة زهقت رحت جايب شوية جاز ومسحت بيهم البقعة طلعت فى ثوانى !!!!

انا قلت يا واد دا اسطورة وانا اللى مش فاهم

بعد فترة كان عندى مسمار مصدى ومش راضى يحل قمت مطلع الاسطورة ومغرق المسمار وهات يا فك مفيش رشيت يمكن ربع العبوة عليه ودا فى الطراوة اخر ما زهقت قمت جايب نقطتين زيت باكم حطيتهم على المسمار قام حالل صارووووخ !!!

انا قلت يا واد دا اسطورة وانا اللى مش فاهم

بعد فترة كان عندى اثار لزق بتاع ستيكر على الازاز ومحتاج يتشال قلت اكيد بقه دا الاستخدام الامثل للاسطورة رحت راشش كويس وماسك سلاح قطر واشيل يمين شمال مفيش امل اخر ما زهقت عملتها بمية دافية وسلاح القطر خدت مجهود بس راحت والمية اديتنى نتيجة احسن من الاسطورة !!

انا قلت يا واد دا اسطورة وانا اللى مش فاهم

بعد فترة قلت اجربه على مفصلات الببات اللى كانت بتعمل عندى مزيكة حسب الله مع الفتح والقفل قمت جايب الاسطورة وقعدت ارش ارش والنتيجة كانت مبهرة "زئ زئ " او "ائ ائ" وطبعا حل المشكلة كان شوية زيت موتور وشكرا !!!

طيب بعد كل ده ممكن افهم ايه استخدام الاسطورة wd40 غير حرقة الدم !!!

**dr.hazem** · 30-04-2011 08:01 AM

اضح انك رحت لحد وادالك واحده مضروبه
او انك مكنتش بترج العبوة قبل متستخدمها
لان الدبليو دي اسطوره فعلا وحاجه فوق الوصف بالتجربه مش من كلام الناس
ده انا فاكر والدي لما كان بيستخدمه من اكتر من 15 سنه
انا وعيت عالعربيات والدبليو دي كان موجود لحد اما بقا عندي عربيتي واستخدمته

مفصلات البيبان في البيت بستخدمه عليها وحاجه تفتح النفس
فأكيد في عندك حاجه غلط

تحياتي

**A.Saad** · 30-04-2011 08:04 AM

فيه انجليزى وفيه صينى وفيه تقليد ليه كتير
اتاكد انه الانجليزى

**haroun707** · 30-04-2011 08:23 AM

احب اقول لحضرتك ان اللى اشتريته ده

مضــــــــــــــــــــــر وووووووووووووووووب

**keko** · 30-04-2011 08:28 AM

المشاركة الأصلية كتبت بواسطة hm414

اضح انك رحت لحد وادالك واحده مضروبه
او انك مكنتش بترج العبوة قبل متستخدمها
لان الدبليو دي اسطوره فعلا وحاجه فوق الوصف بالتجربه مش من كلام الناس
ده انا فاكر والدي لما كان بيستخدمه من اكتر من 15 سنه
انا وعيت عالعربيات والدبليو دي كان موجود لحد اما بقا عندي عربيتي واستخدمته

مفصلات البيبان في البيت بستخدمه عليها وحاجه تفتح النفس
فأكيد في عندك حاجه غلط

تحياتي

مانا وضحت انى اشتريته من تاجر ثقة جدا

المشاركة الأصلية كتبت بواسطة a.saad

فيه انجليزى وفيه صينى وفيه تقليد ليه كتير
اتاكد انه الانجليزى

هوا غالبا كان انجليزى او امريكى واستيراد حمدى قنديل

المشاركة الأصلية كتبت بواسطة mikology

انا بستخدمه فى الببان و النتيجه روعه

امااااااال فى ايه غلط معايا !!!!!!!1

**mikology** · 30-04-2011 08:32 AM

مش عارف بص لو تحب تجرب اللى معايا انا تحت امرك

**kar!m** · 30-04-2011 11:37 AM

يا راجل حرام عليك .. ده انا بستخدمة فى كل حاجة خصوصا الصدا.

على رأى واحد .. من كتر حبى فيه قربت استخدمه معطر للجسم (Body Spray)

**BLOODY_STONE** · 30-04-2011 11:46 AM

ههههههههههههههههه معلش معلش
... يمكن اللي مع حضرتك مضروب لأنه فعلا اسطورة و كل الحاجات اللي حضرتك بتقول عليها دي حصلتلي و اخرها كان لزق عالعربية ... رشيته و اللزق ساح ووع لوحده من غير ما المسه ... اتأكد ان النوع اللي مع حضرتك انجليزي...

**m7mda7md** · 30-04-2011 04:16 PM

انا مش مصدق عنيا ههههههههه...انا عمري ما استخدمت الاسبراي ده بس سبحان الله...ايه التناقض الرهيب ده !!...انا حاسس ان الشباب بيهرجوا معاك و هيقولولك ف الآخر ان ده برنامج الكاميرا الخفيه و هيعترفوا بفشله هههههههههههههه