استلمت ام 11 الحمد لله واليكم التقرير المبدأى وبعض الملاحظات
السلام عليكم ورحمة الله وبركاته
اخوانى الاعزاء بفضل الله استلمت العربية يوم الخميس اللى فات اللون الفيرانى اللى طلع جامد جدا غير ماكنت متخيل وكان يوم متعب جدا جدا انما الحمد لله المهم انى رجعت بيها البيت بخير لانى جايبها من مدينة نصر عند النادى الاهلى كده ورجعت بيها لحد بنها.
عملت طبعا اللى قولتولى عليه وفحصت كل حاجة بعناية والحمد لله كله تمام التمام وممضتش على اقرار الاستلام الا بعد ما عاينت ومسلمتش اقرار الاستلام بتاع البنك للمعرض (اللى بموجبه بستلم العربية) الا بعد ما خلصت كل حاجة وواضح فعلا ان كل معارض العربيات حلانجية ولوع بس انا قرفته بردو هههههههههههه.
حبيبت اعمل تقرير بسيط ومبدأى عن العربية الجميلة عشان كلنا نستفيد ونفيد بعض - انا هبدأ بسرد المميزات والعيوب خلال فترة اول 200 كم مشيت بيهم بالعربية خلال اليومين اللى فاتوا ويليها بعض الملاحظات اللى لاحظتها خلال اليومين بردو وان كان حد يقدر يفيدنى فى ملاحظاتى يتفضل ويرد عليا.
.... العيوب ....
1. العفشة ناشفة شوية مش رياضية اوى وده اللى انا سمعته عن عربيات اسبيرانزا من قبل ما اشتريها ويمكن خصوصا فى الام 11 عشان جنوطها 16 بس عامة الموضوع مش مقلق خالص بالنسبة ليا لانى ميهمنيش اوى نعومة العفشة لان العربية اللى كانت معايا جولييت موديل 98 فطبعا واخد عالخبط والرزع (بس طبعا الام 11 مش خبط ورزع) انما هتحس بس بالمطبات الا حد ما. فيه ناس قالتلى حط فى العجل نيتروجين بدل الهوا عشان تخف نشوفية العفشة شوية انا لسه مجربتش بس متأكد انه اكيد هيفرق لانى جربت قبل كده فى الجولييت بس عيبه انه بيخفف العربية اوى وبيخليها تجرى.
.... المميزات ....
1. العربية سحبها ماشاء الله مرضى لغاية بالنسبة لفترة اول الف كيلو يعنى انا كنت متخيلها هتبقى سحبها تقيل شوية زى ما سمعت وان الاداء بيتحسن مع مرور الوقت فالحمد لله مبدأيا السحب كويس وان شاء الله يبقى ممتاز بعد ما نمشى بيها شوية
2. العربية عالية عن الارض عشان جنوطها كبيرة ودى طبعا نقطة كويسة اوى فى صالح العربية خصوصا ان طرق مصر زى الهباب وان كان العلو ده مسبب عليا صعوبة فى التعود عليها حاسس انى لسه مش واخد على ابعادها خصوصا علو العربية من ورا يعنى المراية اللى فى النص مش يادوب بشوف فيها اللى راس وجزء من صدر اللى جاى من ورايا ولو انى طويل اصلى فى الجولييت كنت بشوف العربية كلها ههههههههه بس اكيد هتعود.
3. فرامل العربية ممتازة وعن تجربة لسه طازة حصلت معايا قبل ما اكتب الموضوع ده بربع ساعة. سواقة الحريم وما ادراكم بسواقة الحريم ههههههههه وانا جاى فى السكة واحدة ست كانت ماشية على اليمين وانا عالشمال تقريبا حد ادامها وقف فجأة قامت رامية ناحيتى ووقفت انا فرملت اوى العربية ماشاء الله اسعفتنى ووقفت علاطول ومتزحلقتش انا معرفش الاى بى اس اشتغل كده ولا لأ لانى لسه مش على دراية كافية بشغله انما الحمد لله العربية اسعفتنى فى اول موقف واول اختبار.
4. الكاسيت جيد جدا وعامل صوت حلو فى العربية اوى واحلى ميزة فيه اليو اس بى عشان تقدر تحط فلاشة وتسمع زى ما انت عاوز.
5. شنطة العربية زى العسل ووسعها مرضى جدا واحلى حاجة انها بتتفتح من جوة العربية ومن الريموت ده غير المفتاح.
....نيجى للملاحظات اللى انا ملاحظها بعضها فى صالح العربية وبعضها لأ انما عموما اعتقد انها ملاحظات عادية وان كان اى حد له تعليق ياريت يتفضل ويقول رأيه:
1. خامات العربية مش سيئة للغاية زى ما الناس بتقول ولكن فى نفس الوقت مش ممتازة زى العربيات الكورى مثلا والاوروبى لكن انا شايفها مرضية تمام باستثناء بعض المناطق فى التابلوه زى الدرج بتاع الاوراق وكده ده الوحيد اللى انا شايفه خامته اى كلام زى اللعبة وكمان حزام الامان مش اوى انما غير كده كله تمام الحمد لله
2. الكاسيت وانا جاى من المعرض طبعا كنت حاطط سى دى قرآن كان كل فترة كده بيعمل صوت زنة غريبة جاية من جوة الكاسيت زى مايكون السى دى بيحط فى حاجة لكن مكنش الصوت بيعلق انما تانى يوم شغلته اعتقد كان تمام ومبقاش يعمل كده وعامة انا حطيت فلاشة وكله تمام لان حوار الاسطوانات ده اصلا ممل وبيبوظ الاسطوانة وبيتعب الكاسيت
3. من ساعة ماستلمت وانا جاى فى السكة لحد دلوقتى بسمع صوت تكتكة او طرقعة خفيف كده جاى من ناحية العجل زى مايكون فيه حاجة فى المساعد ده بحسه مع الفرامل احيانا او المطبات احيانا او الملفات لكن مش مستمر ومش دايما بسمع هو مش مزعج انما ملحوظ. ياريت لو حد يعرف ايه ده ياريت يقولى وعموما انا كده كده هقولهم عليه فى صيانة الالف عشان ابقى مطمن خالص.
4. هموت وافتح الكابوت معرفش بيتفتح منين لانه ده الحاجة الوحيدة اللى نسيت اعاينها فى المعرض قبل الاستلام خصوصا انى كنت على سفر ومش طايق نفسى ومتأخر وعاوز ارجع بلدى وكمان الجو كان ليل حتى لو كنت فتحته مكنتش هشوف اوى بس عموما صوت العربية كويس واداءها كويس فمفيش حاجة تقلق من الكابوت لكن عاوز افتح ابص عليه حد يقولى بيتفتح منين هموت ومش لاقى مكانه هههههههههههههه.
5. العربية بتاخد حرارتها بسرعة مش قصدى ان حرارتها بتزيد انما تسارع الحرارة فيها سريع من اول ما بتدور لحد ما تثبت على 90 درجة بالظبط لا بتزيد ولا بتقل بس لو مشيت بسرعة والجو هوا طبعا بتقل حاجة خفيفة انما الطبيعى اللى لاحظته انها بتثبت على 90 فهل حد يعرف ان دى حرارة العربية الطبيعية؟
6. ريموت العربية بالمفتاح دمه خفيف وجميل جدا.
7. تابلوه العربية بانواره والكونسول حلوين جدا وتحس انك مالك كل حاجة فى العربية وانت فى مكان القيادة.
8. المرايات الكهربا طبعا لذيذة بس بالنسبة ليا مستغرب المرايات اوى مش متعود عليها حاسس ان المرايات الجانبية وااااااسعة وجايبة الشارع كله من ورايا.
اخر ملاحظة دى بقى لوحدها ان العربية شكلها حلو وبيجيب العين وبيخلى الناس تبص عليها وكفاكم الله شر الحسد وربنا يسترها. انا اخدت اول عين بس الحمد لله مجتش فى العربية جت فى باب الشقة نسيت المفتاح فى الباب من جوة تانى يوم ماجبتها الصبح وكسرنا الباب وكان يوم مقرف وربنا يستر عاللى جاى.
لازم اللى يشترى العربية يدبح ياجماعة عشان العين وعشان ربنا يباركله فيها انا نويت ان شاء الله وبسأل على تمن الدبايح دلوقتى عشان اظبط امورى وادبحلها ان شاء الله خلال اسبوع.
بس كده ده تقريرى المبدأى عن الجميلة ام 11 ربنا يباركلى فيها ويبارك لكل واحد فيكم فى عربيته ويديله خيرها ويكفيه شرها.
فى انتظار ردودكم وتعليقاتكم.
