الموضوع: اخيرا ستلمت الـ m 11

المشاركة الأصلية كتبت بواسطة hima77

القاهرة
الخميس 28/4/2011 الساعة 9.30 مساءاَ


بفضل الله وبمشيئتة وبعد تردد كبير وحيرة اكتر في اتخاذ قرار الشراء تم بحمد الله وفضلة استلام السيارة اسبرانزا m11 .

ملحوظة صغيرة : انا بدأت تفكير في هذة السيارة في سبتمبر 2010 واتخذت قرار الشراء الفعلي وبدات في الاجراءات في 17/4/2011

المعاينة : كنت واخد معايا ورقة صغيرة كاتب فيها نقط اركز عليها في معاينة العربية وفحصها قبل الاستلام طبعا النقط دي جمعتها من خبراء الm 11 في المنتدى ... استمرت المعاينة قبل الاستلام لمدة ساعة تقريبا تم فحص العربية بكل دقة

ملاحظات مبدئية بعد استلام العربية :
1- صوت الموتور هادى جدا .
2- السحب مكنتش متوقعة كدا ابدا ... سحب جيد جدا ( بالمقارنة بكل اكلام اللي اتقال عنها )
3- ارتفاع العربية عن الارض هايل بالنسبة لي تحديدا ( السيارة السابقة هيونداى اكسنت موديل 1999)
4- صوت مزعج جدا جدا ومستمر .... للاسف لازم اربط الحزام . (ولازم اشوف حل للموضوع ده يعد كدا )
5- تقفيل العربية كويس جدا مافيش حاجة مش مظبوطة - خامات التقفيل احسن من المستخدمة في الفيرنا وفي اللانوس بكتير .. بس اقل من الصني (انا بقارن بخامات التقفيل المصري )
6- مساحة العربية الداخلية مقبولة بس كنت متوقع انها تبقي اوسع من كدا خصوصا ان ابعادها 4.35×1.79×1.46 .
7- انوار التابلوه جميلة جدا . درج التابلوه جميل وحلوه لمبة الاضاءه اللي جواه.
8- الكاسيت بسيط وسهل الاستخدام والصوت مقبول لحد كبير ... بس مش عارف هما فين ال8 سماعات ؟
9- العفشة جيده جدا هي ناشفة طبعا بالمقارنة بالهيونداي اكسنت بس مش ناشفة زي عفشة النيسان صني ( للعلم خلال الفترة من سبتمبر 2010 حتي تاريخة انا بركب عربيتين صني 2010 واكسنت 2010 بتوع اخواتى )
10- استلمت مع العربية مثلث عاكس والكوريك وطقم عدة بسيط .. بس مافيش شنطة اسعافات ولا وصلة usb بتاعة الكاسيت ونسيت خالص اسال عليها .. هاسال المعرض وانا باخد باقى ورق العربية علشان الترخيص .

عيوب من وجه نظري :
1- عجله القيادة سيئة جدا ... كان من الممكن تكون افضل من كدا بكتير . علي الاقل زي بتاعة a 620 .
2- مافيش مسند يد جانبى للسائق
3- الصوت الزنان بتاع الحزام ده عيب اساسى وخصوصا بالنسبة لواحد مابيربطش الحزام خالص
4- لسه بقي لما نمشي بيها شوية اكيد هاتظهر حاجات تانية

كان لي استفسار عند ملاك العربية : لمبة الموتور لما تنور ده معناه ايه ؟؟ لانها نورت عندي وانا راجع من المعرض بعد ماستلمتها
ومكنتش عارف دي لمبة ايه بس لما قريت الكتالوج ولاقيتها لمبه الموتور نزلت جري ودورت العربية علشان اتاكد ان كانت لسه منورة ولا لأ ومشيت بيها حوالى 5 كيلومتر بس مانورتش تاني ؟؟ ياريت الاقي اجابة

اخيراً اشكر كل اعضاء المنتدي المحترمين علي المعلومات المفيدة جدا جدا اللي فادتنى كتييييييييييييير اوي لحد ما ربنا هداني في اتخاذ قرار الشراء الف شكر لكل ملاك الm11 علي كل معلومة قولتها عن العربية

الف مليون مبروك يا هيما عليك ربنا يديلك خيرها ويكفيك شرها

انا زيك مستلمتش وصلة يو اس بى ولا شنطة اسعافات ومحطتش فى دماغى مش مهمين لان اليو اس بى تقدر تشتريها ب 2 جنيه والاسعافات هتاخدها لما ترخص

حد يقولنا ازاى نبطل صوت الجرس ابن الزنانة ده مش معقول كل امشى خطوة البس الحزام اكيد له حل حد عنده حل؟؟؟؟

انا معرفش حاجة عن لمبة الموتور للاسف الحمد لله مفيش لمض نورت معايا بس ظاهرلى حاجتين كده صوت تكتكة بسيط ناحية العجل الامامى مع المطبات والفرامل بس احيانا مش دائم وصوت صفارة او صوصوة جاى من جوة الكابوت زى مايكون سير بيلين او حاجة زى كده وبسال عن الموضوع ده يارب حد يفيدنى

مليون مبروك عليك تانى مرة وياريت لو اى ملاحظات تقولنا وتابع موضوعى عن العربية عشان نفيد بعضنا

المشاركة الأصلية كتبت بواسطة khaled_Saga

الف مليون مبروك يا هيما عليك ربنا يديلك خيرها ويكفيك شرها

انا زيك مستلمتش وصلة يو اس بى ولا شنطة اسعافات ومحطتش فى دماغى مش مهمين لان اليو اس بى تقدر تشتريها ب 2 جنيه والاسعافات هتاخدها لما ترخص

حد يقولنا ازاى نبطل صوت الجرس ابن الزنانة ده مش معقول كل امشى خطوة البس الحزام اكيد له حل حد عنده حل؟؟؟؟

انا معرفش حاجة عن لمبة الموتور للاسف الحمد لله مفيش لمض نورت معايا بس ظاهرلى حاجتين كده صوت تكتكة بسيط ناحية العجل الامامى مع المطبات والفرامل بس احيانا مش دائم وصوت صفارة او صوصوة جاى من جوة الكابوت زى مايكون سير بيلين او حاجة زى كده وبسال عن الموضوع ده يارب حد يفيدنى

مليون مبروك عليك تانى مرة وياريت لو اى ملاحظات تقولنا وتابع موضوعى عن العربية عشان نفيد بعضنا

الله يبارك فيكم يا رجالة
ان شاء الله هنتابع مع بعض يا خالد علشان الفايدة تعم على الكل ... ربنا يباركلنا فيهم يا رب ونشوف منهم كل الخير

مبروك يا رجالة الام وربنا يباركلكو فيها انشاء الله وبالنسبة لصوت الحزام في تحت كرسي السوق كابل بفيشة كدة فك الفيشة دي الصوت مش هيشتغل تااااااااني....
وبالنسبة عشان لمبة الموتور اللي نورت دي ممكن تكون بسبب البنزين كان فيه وساخة مثلا او حاجة زي كدة...واي استفسار تحت امرك..

المشاركة الأصلية كتبت بواسطة samehsalem

مبروك يا رجالة الام وربنا يباركلكو فيها ان شاء الله وبالنسبة لصوت الحزام في تحت كرسي السوق كابل بفيشة كدة فك الفيشة دي الصوت مش هيشتغل تااااااااني....
وبالنسبة عشان لمبة الموتور اللي نورت دي ممكن تكون بسبب البنزين كان فيه وساخة مثلا او حاجة زي كدة...واي استفسار تحت امرك..

الله يبارك فيك يا باشا ... ايوه كدا هما دول رجالة الام اول حاجة هاعملها الصبح اشوف الكابل ده وافصل الفيشة
بالنسبة للمبة الموتور بنسبة كبيرة كلام حضرتك مظبوط لاني استلمت العربية من المعرض ولمبة البنزين منورة

والف شكر يا باشا طمنتى

الف مبروك ياهيما وربنا يديك خيرها ويكفيك شرها ويباركلك فيها دايما ويبعد عنكم العين انت وخالد ويبعدها عننا احنا كمان لما نجيبها بعدكم بمشيئة الله

انا مبسوط من التفاعل بين اعضاء المنتدى والروح الجميلة والتهانى المتبادلة

وواضح كمان ان الام 11 بدأت تنتشر الى حد ما وان شاء الله دايما تبقى العربية محل ثقة ملاكها وراغبينها

عقبالك ان شاء الله يا احمد يا حلمى لما تستلم واكون انا اول واحد بهنيك