تعالوا بقي النهاردة نركب عداد ال RPM السبورت
عدادات ال rpm موجودة عند كل محلات الكماليات بتبدأ من 80 جنية الي 900 جنيه
الانواع الكويسة بتبدأ من 150 جنيه
انا اشترين العداد من من زميل ليا هنا معانا في المنتدي
لاقيت ان العداد طالع منه 4 اسلاك ........ سلك احمر للكهرباء....و سلك اخضر بتاع مؤشر ال rpm و ده بيتوصل لسالب الموبينة.....و سلك لونه وردي فاتح للنورر بتاع العداد .......و سلك بني للأرضي
روحت لكهربائي عشان يركبهولي بسرعة و أخلص.........قالي مش حينفع عندك....!!!
سألته ليه؟؟ قالي اصل الفيرنا 2 موبينة...كل موبينة علي 2 بوجيه....لو وصلت واحدة حتجيلك نصف القراية.....!!!
قلتله اعمل ايه يعني ...قالي رجعه....!!
بعد اما رجعت البيت قعدت ادور علي النت و في مواقع اجنبية لاقيت ان فيشة العداد فيها سلك جاهز لل rpm ......حتي لو عربيتك الفيرنا هاف اوبشن و مفيهاش rpm
قولت لازم أتأكد فسألت استاذ ashohdy معانا هنا في المنتدي و فعلا اكدلي الموضوع ده
قولت هيا بنا نلعب بقي....
اول حاجة زي ما عملنا في تغير لون العدادات
اول خطوة حنفك العلبة الفيبر اللي ورا الدريكسيون و هي عبارة عن 3 مسامير زي ما موضح في الصورة
اضغط هنا لمشاهدة الصورة بالحجم الطبيعي.
بعد اما نفك المسامير حتبقي عبارة عن جزئين نفكهم عن بعض بايدك لأنهم متركبيين علي بعض عن طريق كلبسات (الموضوع سهل جدا )
تاني حاجة حنفك الفيبرة اللي علي العداد اللي لونها اسود و هي عبارة عن مسمارين... مربوطين فيها فوق زي ما موضح في الصورة و انا مشاور فيها علي المسامير
اضغط هنا لمشاهدة الصورة بالحجم الطبيعي.
بعد اما فكينا المسامير نمسك الفيبرة ديه من تحت و نشدها واحدة واحدة عشان فيها كلبسين من تحت و حتلاقيها طلعت معاك
اضغط هنا لمشاهدة الصورة بالحجم الطبيعي.
كدة حتلاقي العداد في وشك علي طول مربوط ب 4 مسامير.... في كل ركن مسمار زي ما موضح في الصورة
اضغط هنا لمشاهدة الصورة بالحجم الطبيعي.
شد العداد بقي حتلاقيه طالع في ايديك
اضغط هنا لمشاهدة الصورة بالحجم الطبيعي.
حتلاقي بقي في ظهر العداد فيشتين واحدة صغيرة و واحدة كبيرة ...شدهم و اخلعهم ...هما رخمين شوية بس شدهم و متخافش و زي ما موضح في الصورة
اضغط هنا لمشاهدة الصورة بالحجم الطبيعي.
الكلام لحد هنا مفيهوش جديد ......
تعالوا نبص بقي علي الفيشة الكبيرة.......حتلاقوا في سلك لونه رمادي هو ده بتاع ال rpm ...حتلاقوني مشاور عليه في الصورة ديه
حنروح قطعين السلك ده و نوصله بسلك ال rpm اللي في العداد السبورت بتاعنا اللي لونه اخضر
طيب سلك الكهرباء بقي حنجيبه منيين ؟؟ احنا عايزين اما ندور العربية... الكهرباء توصل للعداد.....روحت دورت علي سلك الكهرباء في الفيشة الصغيرة اللي في العداد بتاع العربية و لاقيتها الحمد لله ... و هو عبارة عن سلك لونه برتقاني و انا مشاور عليه في الصورة
حنروح موصليين بيه سلك الكهرباء الاحمر اللي في العداد السبورت بتاعنا
كده بقي ناقص اننا نوصل سلك نور العداد........انا كنت ممكن اوصله بسلك الكهرباء و خلاص.....بس كده العداد حينور الصبح و بليل......!!
روحت فاتح الكابوت و جايب الفيشة بتاعت النور السهاري اللي في الكشاف......و موصل بيها سلك زي ما انا موضح في الصورة
و روحت ممشي السلك في الكبوت و مدخله ورا التابلوه ....زي ما موضح في الصور
حنبص ورا التابلوه عند الدواسات حنلاقي السلك موجود زي ما ان موضح في الصورة
و علي فكرة السلك ده حيفيدني بعد كدة في موضوع شرايط الليدات اللي حكتبه بعد كدة ان شاء الله
كدة بقي نوصل السلك ده بسلك نور العداد بتاعنا اللي هو لونه وردي فاتح
و كدة مش حيبقي فاضل غير السلك الارضي اللي لونه بني...و ده طبعا نوصله بأي حتة في شاسية العربية
ملحوظة: طبعا الاسلاك ديه كلها نحاول نمشيها ورا التابلوة عشان ميبقاش باين غير العداد بس
و كدة يبقي خلصنا خلاص و نبدأ نرجع كل حاجة زي ما هي نركب العدادات في الفيش و نركب الفيبر كله
و تبقي الصورة النهائية كده
يا رب اكون وفقت في الشرح
و ان شاء الله بكرة حكتبلكوا تقرير ازاي نركب شريط الليدات
المفضلات