## إسبويلر جاهز للانسر وستائر كبس لجميع السيارات ##

**إسلام شاهين** · 19-04-2008 01:24 AM

النهارد كنت عند سبير كار ولقيت حاجتين عجبوني قوي :-

أولا الاسبويلر الجاهز اللي بيجي مرشوش من بلاده برقم لون العربية ، وفعلا الاسبويلر جامد جدا والفينش بتاعه تحفه ووزنه خفيف جدا وبصراحه عجبني قوي لدرجة إني اتجننت وحجزت واحد لعربيتي وأنا مسافر يوم الأحد وهاستلمه بكره بعد لما إديتهم رقم لون العربية اللي بيبقى تحت الكبوت ( A39 ) ده رقم لون عربيتي ولقيت عنده أربعه محجوزين ابيض وكحلي وشامبين وأسود ، اللي عجبني بقه أكثر تركيبه لأنه بيركب من غير تخريم في الشنطه لأنه له شفتين من الجناب بكاوتش حمايه والشفتين دول بيتركبوا على شفف الشنطة يمين وشمال وليهم رجلاش علشان يتربطوا بيهم بصراحه عجبني جدا جدا لأن خامته حلوه قوي وفنشه أحلى وموضوع إنه بيجي مرشوش جاهز ده هو الأحلى .

ثانيا موضوع الستائر الكبس كانت ناس سألتني عليهم وللأسف الراجل اللي في التوفيقية مكنش عنده غير أنواع معينه لعربيات معينه هما بقه خدوا الستائر ديه وعملوها في مصنعهم لجميع أنواع السيارات وبصراحه خامتهم أنظف بكثير ولقيت عندهم للكورولا والبيجو والسيفك كمان ولو ما عندهمش لعربيتك بياخدوا مقاس الاستمبه وثاني يوم تستلم وتركب .

الأسعار أنا مش هتكلم فيها بس هي مناسبة جدا وده رقم أمير للي عايز يستفسر أكثر 0103511020 اللي يتصل بس يقول إنه من نايل موتوز .

**badblood** · 19-04-2008 04:05 AM

ممكن اعرف العنوان فين بالظبت

**momomania22** · 19-04-2008 04:24 AM

المشاركة الأصلية كتبت بواسطة badblood

ممكن اعرف العنوان فين بالظبت

ياريت بعد اذنك العنوان وهل في للماتريكس لأني دايخ عليهم

**م/محمد صلاح** · 19-04-2008 05:49 AM

باقولك ايه ياسولوم
هما ماعندهومش حاجه للسيفيك؟
اصلى عايزاروشها بسبويلر كده وكمان ياريت وايرليس باركينج سينسور من اللى بكاميرا

**nader makram** · 19-04-2008 08:09 AM

ممكن يا اسلام تقولى هو الاسبويلر ده زى الاصلى بالظبط و اللا مختلف فى الشكل و ممكن اعرف سعره كام عشان انا لسه حايب الفوانيس اللى بلينسس و رينجات قريب فمعيش فلوس كتير

**إسلام شاهين** · 19-04-2008 12:09 PM

العنوان معروف يا جماعه وهو أمام وزارة الداخليه على طول في ميدان لاظوغلي أو لو إنت جاي من التحرير هتدخل شارع نجيب الريحاني على طول لغاية لما تلاقي الداخليه يمينك وهما قدامها على طول .

ميمو باشا عندهم ستاير السيفك أنا شفتها إمبارح ولو مش موجوده بياخد مقاس الاستمبه وثاني يوم تستلمهم .

نادر الاسبويلر مش قادر أقولك إنه أحلى من الأصلي طبعا ديه مبالغه بس هو فعلا تحفه تحفه وميزته حاجتين إنه خفيف وتركيبه من غير تخريم في الشنطه يعني ممكن يتشال ويتحط عادي جدا وكمان الفنيش بتاعه حكاية ، بالنسبة لسعره أنا حجزت بتاعي ب 360 ورايح النهارده إن شاء الله أستلمه وأركبه .

momomania22 عندهم يا باشا للماتريكس وزي ما قولت لو ما عندهمش بياخدوا المقاس وثاني يوم تتعمل على طول .

**إسلام شاهين** · 19-04-2008 12:10 PM

معلش أنا آسف يا ميمو بالنسبةللوايرلس باركينج سينسور ممكن تتصل بأمير وهو يجبهولك أكيد عنده منهم .

**momomania22** · 19-04-2008 02:44 PM

شكرا جزيلا ودمت بخير

**nader makram** · 19-04-2008 03:13 PM

ممكن تبقى تصورلى الاسبويلر يا اسلام قبل و بعد التركيب
بجد شكرا معلش تعبك معايا

**Karim_Monir** · 19-04-2008 03:30 PM

اسلام الاسبويلر الخفيف مش ميزة لانه المفروض ليه تقل معين عشان انسيابية الهواء والتوازن لى السرعات

ميمو في واحد عامل جروب على الفيس بووك في بورسعيد بيجيب اكسسوارات كتير قوي
لو قولتلة عليىه هايجبهولك
بس الوير ليس على كامير صعب قوي انه اشارة الكامير تتنقل ويرليس على تردد 2.4 جيجا هاتلاقي الصورة بتتنقل بعد بجزء من الثانية وانت محتاج كل جزء من الثانية عشان بترجع
وكمان لازم تركبلها مونيتور لو معندكش دي فيدي