فلتر تكيف النيو اكسنت 2010

**meshmesh_egypt** · 02-05-2011 03:15 PM

السلام عليكم
من كام يوم قولت اغير فلتر التكيف واجيب جديد علما بانى عامل 35000 كيلو بالعربيه
المهم سئلت على سعره لاقيت الاصلى ب 300 جنيه
وصاحبى معاه النترا 2010 جاب الاصلى ب 125 جنيه قول هو ليه الاكسنت قطع غيرها اغلى من الالنترا فيما عدا البوجيهات بس بتاعت الالنترا هى الى اغلى من الاكسنت
المهم بصيت على فلتر التكيف بتاع الالنترا لاقيته حجمه نفس حجم فلتر تكيف النيو اكسنت وكمان حسيت ان خامته افضل من النيو اكسنت المهم قولت اتكل على الله واشترى واحد من بتوع الالنترا ركبته وركب زى الفل والتكيف بقى ثلاجه وقوة اندفاع الهواء بقت رهيبه عن حتى والعربيه زيرو
الى كل ملاك النيو اكسنت اتكلوا على الله وهاتوا فلتر تكيف الالنترا وهيركب عندكم زى الفل والاداء هيبقى عالى وانتم اولى بفرق الفلوس من 300 جنيه الى 125 جنيه

**bentrewsha** · 02-05-2011 06:02 PM

شكرا على المعلومه
سؤال ممكن تشرح مكان الفلتر
وازاى اركبه

**JUVENTUS** · 02-05-2011 06:11 PM

مبروك يا باشا الفلتر
بس عندي سؤال هل الفلتر فرق معاك في برودة الهواء نفسه و لا ملوش دعوة

**megaman** · 02-05-2011 06:59 PM

مع انى ما بحطش اى قطعه مش اصلى انما فلتر التكييف اشتريت واحد من التوفيقيه كورى سعره 55 جنيه على فكره هو بيتغير او على الاقل يتنضف بكمبريسور الهواء كل 15000 ك لضمان الهواء النظيف والاداء الجيد للتكييف وشكرا

**meshmesh_egypt** · 03-05-2011 11:33 AM

أولا فلتر التكيف بيبقى خلف درج التبلوه على الشمال بتفتح الدرج بتلاقى كلبسيتين على الجنبين بتشيلهم ينزل الدرج للاخر وبعدين هتلاقى فى وشك مشط بلاستيك اسود برده بكلبستين من الجنب تتغط عليهم وتخرج المشط لبره هتلاقى الفلتر يا معلم تقدر تنظفه او تغيره بس بلاش تحط عليه موضوع المعطر عشان يعطر التكيف او لو هتحط تحط خفيف جدا وعطر ميكنش مزييت لانه بيعمل بقع على الفلتر والفلتر بعد كده بيخلى اندفاع الهواء ضعيف

ثانيا بالنسبه للبروده فى الهواء نفسه هو البرودة زادت شويه بس الاهم هو قوة اندفاع الهواء لان الفلتر لما بيبقى مش نظيف بيعوق اندفاع الهواء وبيخلى الهواء يخش العربية ريحته وحشه نتيجة الفطريات الى بتتكون جوه

أخير اهم حاجه تحافظلك على فلتر التكيف انك دايما اقفل هوايات العربيه عشان تقلل من دخول التراب ليه وتكون فطريات كريهية عليه وده من خلال زرار قفل الهوايات وبرده لما تشرب سجاير فى العربيه تفتح الشباك لان دخان السجاير بيهلك الفلتر لانه بيكون فطريات اكتر وبيخلى الفلتر ريحته وحشه