محتاج راى الشباب معايا

**titos_81** · 03-05-2011 07:55 AM

السلام عليكم الاول
انا يا جماعه بقالى 15 سنه معانا مرسيدس و اللى معانا حاليا w123 المعدله 200 موديل85
انا كنت شاريها عامله 151000 كم و احنا 3 يد ليها بس دلوقت بفكر اغير و اركب bmw 316 موديل
97 بس مش عارف هل المرسيدس حتكون افضل منها ولا لايا رييت اسمع رايكوا عشان انا محتار
اكييد طبعا فى فرق فى اسعار قطع الغيار بس الثبات فى انهى احسن و السحب و كده و كمان
ناس كتير بتقولى البى ام واطيه و حتتبهدل من المطبات و المرسيدس اجمد و اعفى منها انتوا
رايكوا ايه؟؟

**MBhead** · 03-05-2011 05:02 PM

ال w123 عربيه جميله
انا عندي خبره علي ادي كده بالمرسيدس اما البي ام معرفش فيها حاجه بس متاكد انها عربيه ممتازه
من حيث ثبات و سحب الخ الخ الخ اظن البي ام افضل ...اما w123 متينه اكتر
و قطع الغيار بتاع البي ام اظن اغلي
لو عايز حاجه شكلها شبابي جيب البي ام اما لو عايز حاجة شيك ممكن تجيب مرسيدس w124 و ممكن بردو w126 (بس الضريبه عاليه )و لك حريه الاختيار

**titos_81** · 04-05-2011 03:58 AM

يا باشا ربنا يعزك و يكرمك الف الف شكر على اهتمامك بس انا بقكر اخليها و اجيب حاجه هتش باك صغيره بولو 2001 او ابيزا او سكودا فابيا و الللهى الواحد محتار بس هى صعبانه عليا جدا و المرسيدس فير اى عربيه تانيه يالا زى ربنا ما يريد

**MBhead** · 04-05-2011 07:35 PM

ليه كده فكرتني بس
انا كان معايا(الخنزيره) W114 280 موديل 1968 (اول الانتاج) سته سلندر 2800 سي سي كامله(اوتوماتك-ازاز كهربا-فتحه سقف كهربا-سنتر-عفشه ب level Control اللي بيوطي العربيه و يعلها من ورا -فوجائي بنزين -دافيه كراسي قدام -جلد طبيعي+الكماليات الاساسيه )
كان الوالد شاريها زيرو و غير عليها كذا مرسيدس و هيا موجوده..العربيه دي سبب اني بعشق الكلاسيك
كانت ملكه ...الفرش اللي لونه نبيتي و لونها اسود و جنوط AMG Penta اصلي و التابلوه فيه ابانوس و الطاره الكلاسيك لونها ابيض ...و في الجري حدث ولا حرج كانت بتطير بس استهلاك البنزين متدورش عليه و ثبات و عزل هواء
اتذكر مره خدتها و رحت لتاجر معرفه كده و كانت بفكر اشتري اوكتافيا قلت للراجل اشتري اوكتافيا و لا المرسيدس اللي واقفه بره دي ....قالي اشوفها الاول ... شفها و خد المفتاح و جربها و رجع قالي ماشاء الله ....خد عربيتك و اتكل علي الله انا عايز ابيع
اعدت معانا 40 سنه و الله اعطالها لا تذكر بس صيانات عاديه اتعمرت مره واحده غيرنا الموتور و العفشه و شويه حاجات و الصالون من المانيا جديد و رجعت زي الاول .....خدتها لنفسي كنت بروح بيها كل مكان انا و اصحابي كانت بتجيب 200 و 210 ..و لا في اي مشاكل و كانها لسه خارجه من المصنع و اصحابي مش مصدقين انها موديل 68
و لما بعتها بعتها لواحد هاوي مرسيدس كان وقفني في الشارع و سالني لو ببعها لقيت عنده ponton كوبيه و 280SE 4.5 W108 و 450SLC C107 و280C C123 و كلهم حالات فوق الممتازه كانت عيني طلعه علي ال450SLC ..بس طبعا دا بيشتري بس
و بعتها بعد ما عملت معنا اكتر من مليون و 300 الف كيلو (والدي كان بيحسب لما العداد يقلب) و التايلوه كله و العداد سليم و الراديو الbecker Europa شغال و كل الكماليات شغاله بكفاءه .
شكرا جزيلا لمرسيدس-بنر الشركه العظيمه اللي صنعت عربيه ساحره و اعتماديه للدرجه دي
لو الW123 بتاعت حضرتك لها قيمه معنويه ممكن تجيب اي عربيه تمشي بيها و تركن المرسيدس
اسف علي الاطاله

**titos_81** · 06-05-2011 10:33 PM

والله انت عندك حق المرسيدس اللى بيركبها مش بيعرف يركب غيرها احنا عربيتنا كانت عامله 151000 كم و احنا 3 يد ليها موديل 85 و كانت فيها ال level control برضه و ابانوس فى التابلوه و الكنسوله و عصى الفتيس اخدناها من صاحبها بالعافيه ب 87000 و كل كاروح حته الاقى زبون لس نزول سعرها خلى ناس اى كلام تركبها و ده قتلها اكتر كمان المستوردين بطلوا يجيبوا الاكسسوار الاصلى و بقى معظم الموجود مضروب يلا اللى فيه الخير يقدمه ربنا و يا رييت لو تعرف حد فى الحرفيين يكون عنده حجات استعمال يبقى تمام اوى و شكرا على اهتمامك جدا و جزاك الله خيرا

**MBhead** · 07-05-2011 08:56 PM

العفو يا باشا
هيا مش فكرة ناس اي كلام .......الفكرة ان المرسيدس-بنز عربيه شعبيه في مصر....فخمه طبعا و رائعة بس شعبيه
يعني اي واحد كده عايز يعمل فيها جنتل و باشا و بتاع يجري يجبها و يقولك انا راكب مرسيدس ...و الكلام علي علي الجديد والقديم
اما مثلا عربيه زي الجاجوار ...فخمه بس كلام تاني تحس انها ارستقراطيه مع ان الS-Class افضل و اغلي من الجاجوار
يس بردو مرسيدس ...لما الناس تشوف الجاج و هيا ماشيه يجي في دماغهم مليون حاجة و حاجة
ف عادي جدا ان تلاقي ناس عايزه تركب المرسيدس ..اللي بيضايق الواحد ان في ناس مش بيقدرو قيمة العربية صح ...يعني يحط نور كده غريب قي كل حته و جنوط اسبور و يسقط العربية و يمشي بس طبعا دي حريتهم الشخصيه و مليكتهم الخاصة و هما اذواقهم كده
و الركيب بيبان و الناس اللي قصد حضرتك عليهم بيبانوا برضه....انا بصرف علي عربيتي و اضيطها و انضفها و امشي بيها لمتعه الركوب و لعشقي للماركه و طبعا تقضيه المشاوير و مش بركز بقي من بيركب عربيه زي عربيتي ولا بيعمل فيها ايه
و للاسف انا معرفش حد في الحرفيين بتاع اكسسوار بس حضرتك ممكن تشوف اي بتاع قطع غيار يكون شغال في المرسيدس من زمان حتلاقي عنده حاجات اصليه اكيد

**ahmzd** · 09-05-2011 01:40 AM

سألخص - إن شاء الله - رأيي الشخصي في النقاط الآتية:
1. للمرسيدس طعم مميز لا يعرفه إلا مقتنيها ومستخدميها.
2. لا يعب المرسيدس أنها شعبية وإنما هو دليل عل كفاءتها.
3. انتشار السيارة يساوي سهولة الصيانة ورخص قطع الغيار وارتفاع سعر إعادة البيع ومميزات أخرى كثيرة جميع أعضاء المنتدى المحترمين يعرفونها أكثر مني بكثير.
4. يكفي أن المرسيدس هي سيارة الملوك والأمراء والرؤساء والسيارة الرسمية الأولى على مستوى العالم بلا أدنى خلاف.
5. المرسيدس تعني الفخامة والرفاهية والشياكة والحداثة ومواكبة العصر والأمان والجودة والقيمة العالية و.. إلخ.
5. لا يوجد سيارة كاملة لأن الكمال لله وحده.
هذا رأيي والله أعلى وأعلم وآسف على الإطالة.