منتدى الـ 6% فقط

**د.أحمد سمير** · 04-06-2007 04:43 AM

قمت بإجراء إحصائية بسيطة .. حيث أنني مغرم بالإحصاء حول موضوع السلبية في المنتدى ، فحاولت قياس نسبة المشاركات والردود بالنسبة لنسبة المتصفحين للموضوع ، حيث قمت باختيار عينة عشوائية من صفحات المنتدى العام وبلغت 4 صفحات ، حيث بلغ مجموع المشاهدات لموضوع هذه الصفحات مع تضمين الموضوعات المثبتة لمرة واحدة فقط في العينة 125692 مشاهدة ، وبلغت عدد الردود 7885 بما يعني أن نسبة المشاركة بالرد هي 6.2% فقط ، ولا شك أنها نسبة ضئيلة جداً في منتدانا ، وابرز مثال على هذا الاستفتاء على الإدارة الذي طرح قبل ذلك وكانت نسبة المشاركة فيه حوالي 6% أيضاً ، وهو ما يشير إلى السلبية من جهة ، وإلى صدقية نتائج هذا الاستفتاء من جهة أخرى .. وهذا للعلم
تقبلوا خالص مودتي

**hazem_khidr** · 04-06-2007 05:30 AM

و انا شايف ان كلام حضرتك صح يا دكتور بدليل اني رقم 8 اللي اشوف الموضوع و رقم 1 اللي يرد عليه :D

**TAG_Turbo0** · 04-06-2007 06:17 AM

انا شايف ان معظم الناس بتنبهر بالعنوان فتدخل على الموضوع لو عجبها بترد ولو معجبهاش مبتردش
وانا شايف كده أحسن منعمل زى المنتديات الى لازم ترد علشان تشوف الموضوع وكل الناس تعد تأول شكراَ ومتشكرين ومنتحرمش
علشان يعملو رقم مشاركات كبير وبس

**Driver** · 04-06-2007 07:48 AM

اولا...صباح الفل عليكم جميعا

ثانيا:ما هو تعريف المشاهدة؟؟

المشاهدة هي عملية الضغط بالبوينتر بتاع الماوس على الينك بتاع الموضوع...يقوم السيرفر مسجل عملية مشاهدة..
طب انا النهاردة دخلت مثلا على موضوع 30 مرة..مرة واحدة علشان اشارك و29 علشان اتابع..على فترات متباعدة
تكون النتيجة ايه؟؟ تسجيل 30 عملية مشاهدة...وتكون نسبة المشاركة بتاعتي 0.033% طب هل ده مش طبيعي؟؟

بلاش..موضوع ماليش فيه مثلا!! عن الفيراري F50 (اللي عمر اهلي ما شافوها..ولا هيشوفوها :mrgreen: ) اللا لو كنت مثلا من متابعي الفئات المتوحشة..و بحلم بيها والسلام :D ...اقوم برضه اخش اخرط في اي كلام ...واعمل نفسي مضحكة للخلق والسلام؟؟ :mrgreen: واهو اسمها مشاركة برضوا..؟؟؟(مع العلم انها اتحسبت مشاهدة)

بلاش ده كمان....الاقي عنوان زي: احقوووووونى يالهويييييييييي....وادخل (اشاهد) والاقي واحد بيقول مثلا فردة الكاوتش ضربت ...اغيرها ازاي؟؟؟ تبقى ساعتها عملية الرد ملهاش اي معنى ملموس....علشان تبقى مشاركة والسلام...

لا اعفي الأدارة من حذف مشاركات و ردود بدون اسباب وجيهة...و اغلاق المواضيع بشكل مش مفهوم..وبدون ابداء اسباب في اغلب الأحيان...واستعمال نظام مجلس الشعب: شكرا للسيد العضو..ولنكتفي بهذا اقدر :mrgreen:
طب ما ده بيخللي الناس تحبط من الكتابة...

وسؤال كده على الماشي...مهو منتدى سبرانزا فيه اكثر من 240 موضوع و3400 مشاركة....والنتيجة ايه؟؟ 8 مواضيع مفلقة(في اول صفحة بس)...والصراحة محدش يعرف ليه؟؟....وهل ده مقياس نجاح في رايك؟؟

و مع احترامي لأخوانا الخليجيين و منتدياتهم الجامدة...عايز كل ماتيجى تلاقى موضوع من 10 صفحات..تلاقي9.5 منهم:
20مشكور اخوى...والله ما جصرت
30 والله كلام زين يا رياال
80 خوش مشاركة..حلوة مرة
طب ده اسمو كلام برضه....؟؟؟؟

وعلشان ما أطولش...السلبية وحشة برضه بس عدد المشاهدات الكتير معناه موضوع قوي يستحق الاشادة...لأن اللي بيشوفه بيفضل يتابعه (زي TEST DRIVE بتاعى مثلا )

وربنا يحمي السايت ده من الرغي والخرط اللي لا يودي ولا يجيب

وليقل خيرا او ليصمت

**ehabbadr** · 04-06-2007 10:33 AM

وربنا يحمي السايت ده من الرغي والخرط اللي لا يودي ولا يجيب

وليقل خيرا او ليصمت

و انا متفق معاك تماما علشان كده فيه 8 مواضيع فى الاسبرانزا مقفولين بس مش حايتحذفوا علشان الناس لما تقراهم تعرف اتقفلوا ليه

**3mr Farrag** · 04-06-2007 10:44 AM

ازيك يا دكتور....حضرتك عامل ايه؟؟؟؟

موضوع ال 6%اللي حضرتك قلت عليهم مش كله صح ليه؟؟؟
لأن الواحد احيانا و يمكن معظم الوقت ممكن يدخل علي موضوع اكثر من مره ...ممكن توصل لاربع مرات و ممكن اكتر...
بس ده حسب الموضوع ان الواحد يكون متشوق ليه و عايز يشوف ايه الجديد في الردود
موضوع الردود بقي ...يمكن انا عدد مشاركاتي مش كيتير
بس ذي ما قال الاخ ZEZO ان الواحد مش يدخل و يكتب اي كلام و خلاص ...يعني لو انا عايز اقول معلومه في موضوع ..في كيتير عنده نفس المعلومه...فبكتفي برأي الشخص الاخر ..مش لازم اكتب رأيي و اللي هو نفس الشخص اللي رد قبلي
يبقي احنا استفدنا ايه؟؟؟
ده حتا حمل علي الموقع علي الفاضي
اما بجد اللي انا مش بحبه ان الواحد يكون كاتب موضوع او كتب رد في مشاركه و الواحد بيكون مستني ردود لأن الموضوع بيكون مهم بجد
و حصل معايا كذا مره الموضوع ده...بصراحه اضايقت ...لأني مش بحب ادخل اكتب اي كلام و خلاص...لأما كلام مفيد لأما بلاش منه...او علي الاقل احاول يكون معظمه مفيد
فحسيت اني بكتب خلاصه الموضوع و محدش عارف يرد ورايا يقول ايه؟؟؟
و يمكن يكون الكلام اصلا مش عاجبهم :!: :!: :!:

هو ده بس اللي بضايق منه في موضوع الردود

و الف شكر علي الموضوع يا دكتور