الموضوع: تقرير رحله العين السخنه بقياده كريم منير

ابطال القصه :
1: كريم منير
2: خالد عادل
3: يوكو
4: محمد قاسم (damasry) ومعاه 3 من اصدقائه
5: هاني عبد الفتاح (razini)
6: العبد الفقير الي الله محمد الشنوري
==================================

كنت نايم في امان الله لقيت تليفوني بيرن
ايه ده الساعه 1 الضهر
مين اللي بيتصل بدري كده ده
ايه العالم دي
شنوري : ايه
كريم منير : ايه ايه دي يا جدع انت
شنوري : كيمو صباح الفل
كريم: صباح ايه الله ^$%#& دا انا قربت اخلص شغلي وانتي بتقولي صباح يا &%^$^%#$%
شنوري: حقك عليا ياعم
كريم : بقولك ايه عندنا مهمه خاصه في العين السخنه راشق ولا خالع
شنوري : راشق جدا - راشق بقلب - راشق حتي النخاع
كريم : الحاج عبد الرحمن انا كنت حاجز منه المركب بتاعته وحنطلع عليها يوم 29 ابريل
شنوري : انا جاااااااااااااااااااااااا اااااااااي
بس اديني تفاصيل
كريم : بص يا سيدي
الحاج عبد الرحمن من اجدع الشخصيات اللي اتعرفت عليها ومحترم جدا
وعامل اعلان عندنا في المنتدي عن المركب بتاعته واسمها بورتوفينو 2
شنوري : اديني لينك ياعم
كريم : خد اهوه http://www.nilemotors.net/Nile/206653-2.html
شنوري : ما شاء الله ودي حتبقي مختلطه يا كيمو
كريم : يلا يا تيت يا ^%&$^&$^#%%@%&^&
شنوري : هو الواحد ميفكش نفسه معاك بكلمتين ياعم
كريم : $%$^%$^#$&*
وقرب يوم السفر
ترررررررررررررت ترررررررررررررررن
شنوري : الو مين
: خالد عادل : انا خالد يا عم شنوري مش كل مره تقول مين وابقي سجل النمره يا &^&$^^#^&....^*&%&
شنوري : معلش اصله موبايل زبون وبجربه (احسن عذر للموضوع ده)
خالد عادل : طيب انت ايه نظامك كريم قالي انك طالع
بس انا مبعرفش اعوم يا شنوري وخايف
شنوري : متقلقش يا خالد انا حبقي معاك
خالد عادل : يعني انت بتعوم كويس يا شنوري وحتلحقني
شنوري : لا مبعرفش اعوم انا قصدي حبقي جنبك ونغرق سوا
خالد عادل : ^&$^$^#%$#%&%*
طيب يا شنوري ابقي اركن عربيتك تحت بيتي واركب معايا نروح سوا
================================
ترررررررررررررررن تررررررررررررررررررن
شنوري : الو مين
دا مصري : انا دامصري يا شنوري انت مش مسجل النمره عندك ولا ايه
شنوري : مسجلها طبعا بس دا موبايل زبون وبجربه
دامصري : ^%&*%&$^%^^^
طيب مستنيينك يا شنوري
-----------------------------------------------------
ترررررررررررررررن ترررررررررررررررررررن
شنوري : الوووووووووووووووووو ميييييييييييييييييييييين
ابو ليلي : انت مسجلتش ام الرقم لسه
شنوري : معلش اصله موبايل زبون وبجربه يا وائل بيك هو انت جاي معانا ؟
ابوليلي : جاي فين ياعم انا بكلمك علشان اسالك علي كذا كذا كذا
شنوري : معرفش
ابوليلي : انت كده زي قلتك &....&^^%#%#%
==================================
شنوري : طيب لما اتصل بهاني عبد الفتاح (razini) كريم كان قالي انه جاي
طلعت نمرته من علي الموبايل
تررررررررررررررن ترررررررررررررررررن
شنوري : هاني باشا عامل ايه
صوت غريب : هاني مين ياد يا $^&$^&$^^^#
شنوري: يعني النمره الوحيده اللي مسجلها اطلع مسجلها غلط ايه الحظ ده
==================================
المهم علشان مطولش عليكم وصلت القاهره
وتم التجمع في طريق العين السخنه
ووصلنا بامان الله الي مرفاء اليخوت بعد تصاريح مخابرات واخدوا بطايقنا مرتين

فين المركب يا عم كريم
كريم : في اخر الرصيف ده

شنوري : دي بعيد اوي يا عم ما تيجي ناخد اول واحده
كريم :%^$%#^#%@
المهم وصلنا المركب

وحطينا حاجاتنا في الريسيبشن بتاع المركب

وبدات التصاوير
كريم منير -محمد عبدالله - محمد قاسم

مش مهم مين متصور بس شوفوا البحر والطبيعه
بس عموما علشان ميزعلوش
كريم منير ومحمد قاسم

ودي صوره واحنا في السطح العلوي للمركب وكريم مصورنا من تحت
محمد الشنوري - هاني عبد الفتاح - يوكو
واثبات صريح اننا كنا علي بورتو فينو
بس مش موضح ان كانت 1 ولا 2 بس عموما هي 2

اصدقاء محمد بيك قاسم في عرض البحر
د

القرش اللي اكل السياح في شرم الشيخ
ربنا كرمنا واصطدناه

اوعوا حد يفتكر اني دي السمكه الي كريم اصطادها
دا الطعم اللي جيبنا بيه القرش

مادبه الغداء الفاخره ده جزء منها

قبطان المركب
الشخصيه المرحه المحبوبه اللي قو قعدنا شهر معاه في البحر مش حنزهق من جمال اخلاقه وروعه حديثه
وطبعا مناظرنا باينه واحنا بناكل وفاقدين النطق
محدش عنده استعداد يضيع وقت في الكلام ويوفر وقته للاكل

صوره جماعيه لمادبه الغداء
وكلنا بنقول اخلص وصور ياعم عاوزين ناااااااااااااااااااااااا كل

خالد بيك عادي ومحمد بيك قاسم في لحظه استجمام
هو استجمام غصب عنهم لعدم القدره علي الحركه بعد الاكل
وهما علي السطح العلوي للمركب

المركب مفيهاش حاجه ناقصه
زي ما احنا شايفين عازف الناي في الصوره

وتتناثر الانغام من عزفه العذب فتفطر قلب الولهان وتطفئ نار الخرمان

هاني بيك عبد الفتاح
من اروع الشخصيات اللي قابلتها في حياتي
وهو فاقد القدره علي الحركه بعد الاكل
واظن انه كان فاقد النطق برضه

يوكو باشا برضه بعد الاكل
بس بيحبس دوبل علشان يعرف يهضم

علشان مقعدش اشرح كتير
كل الصور اللي ماسكين فيها مشروبات وقاعدين متنحين هي بعد الاكل

ايطاليا يا ريس علي الشارع لو سمحت

لما نقرصن علي الباخره اللي هناك دي الاول

زهقتوني منكم
انط واشيبكم في عرض البحر احسنلي وارتاح من صداعكم

وبعد ما كريم نط في الميه تولي قاسم الرحله

صوره جماعيه لاورع صحبه

تيتانيك

محمد قاسم وجهاز كشف الاعماق وخلفه بورتو السخنه

لونكم حزايني ليه يا رجاله
خالد عادل وكريم منير

والي هنا انتهي يوم من اجمل ايام اللقائات
شكرا لكريم منير منظم اللقاء
وشكرا للحاج عبد الرحمن صاحب المركب
وشكرا لطاقم المركب اللي حسسوني اني قاعد في كارفور كل ما نطلب حاجه نلاقيها موجوده
كان يوم رائع بس زعلت انه انتهي بدري
بدا 7 صباحا وانتهي 5 المغرب
باذن الله المره الجايه يكون يوم كامل 24 ساعه
وفي انتظار تعليقاتكم