أصدقائي الأعزاء اجدع ناس في منتدانا خبراء العزيزة لوجي ..بعد خالص التحية .. أستأذن حضراتكم في استفسارين و أرجو اني مكونش باتتاقل على حضراتكم
العبد الفقير استلم لوجي من 27 يوم و الحمد لله كل شيئ على ما يرام و بشكل اكثر من مرضي و مفاجي لي جدا جدا و عملت بيها 1750 كم و مديها راحتها تماما في التليين ..مريحها و مدلعها من غير شد ولا قرص ولا غيره فلو سمحتم عاوز أعرف :
1- مدة التليين المثالية اللي تضمن سلامة الموتور و تحسين أداؤه و إطالة عمره بقدر الإمكان هل هي 3000 كم ولا 5000 كم مع الاخد في الاعتبار أن عمري ما زودت السرعة عن 100 و لما كانت بتسرح مني على الطريق و توصل 110 كنت بهدي على طول (العبد الفقير عامة مش غاوي جري و شد يعني دي معدلات مشيي) و الrpm عمره ما زاد عن 3000 و يمكن بيقل . بنقل الثاني على 20 و الثالث على 40 و الرابع على 60 و الخامس على 80 زي ما كنت متعود مع الأكسنت الله يرحمها يا ترى الطريقة دي كويسة ولا فيه مقترحات تانية تخلي الأمور أفضل مع الأخد في الاعتبار برضه إني خواف و موسوس حبتين
2- ما شغلتش التكييف لحد دلوقت (جربته لما استلمتها من المعرض لمدة 1/2 دقيقة) برضه علشان ما أحملش على الموتور يا ترى ممكن أشغله بعد قد إيه ؟ خصوصا أن الجو بقى حر و عندي في المنيا ربنا ما يوريكم شيئ خانق (حر + رطوبة)
معلش استحملوني لأني عارف إن حضراتكم ممكن تكونوا زهقتم من تكرار هذه التساؤلات و تكرار الإجابة عليها لكن برضه البركة فيكم دايما , و بالمناسبة لي اقتراح لحضراتم و للسادة الأفاضل مشرفي القسم : هو اننا نعمل موضوع مثبت فيه كل التساؤلات المتكررة من الوجاناوية الجدد زي حالاتي و إجابتها يكون مفيد للكل و يرد على كل الاستفسارات الشائعة و الأمر متروك لسيادتكم . مع خالص الشكر و التقدير
المفضلات