الموضوع: صيانة ال 5000 كم لبونتو كلاسيك بمركز خدمة إسكندرية الجديد

السلام على أحلى رجالة ،، رجالة منتدى نايل موتورز الغالي و بالأخص قسم فيات.
أنا معايا بونتو كلاسيك 2011 زي ما في بعضكم عارف و كنت جايبها من شهر 12 اللي فات و الحمد لله الإسبوع ده كنت داخل على 4700 كم فقولت اروح أعمل صيانة ال 5000 بالمرة.
إتكلت على الله إمبارح 3\5\2011 و طلعت على مركز الصيانة الجديد اللي موجود في مرغم، دخلت مكتب كده قابتلني فيه سكرتيرة سألتني على موديل العربية و أخدت نمرة التليفون و قالتلي هتقابل المهندس أحمد دلوقتي.
قابلت المهندس أحمد و قلتله على الملاحظات اللي كنت ذكرتها قبل في موضوع منفصل اللي تخص التدوير اللي بتتأخر و صوت تسقيف الموتور، المهم من غير تطويل دخلت العربية لمدة ساعة إلا 10 دقايق و خرجت بسأل المهندس كله تمام قاللي أه !!!
قلتله كان فيها ايه قاللي " بالنسبة لموضوع التدوير ده بيكون تهريج بين الكونترولات لكن هي مش حاجة تقلق خالص و بالنسبة لصوت التسقيف، أحنا قرصنا على البوجيهات شوية و خلينا نشوف لحد ال 5000 كم اللي جايين بس انت احرق على الغيارات "
و كان هو ده كل اللي تم في التوكيل بس كانت الملاحظات بعد ما مشيت و رجعت إسكندرية إن الفرامل بقت أنشف بكتير و عدد تكات فرامل اليد قلت النص تقريبا و إن موضوع التدوير و التسقيف زي ما هو.
في النهاية أسف على الإطالة بس أنا لاحظت إن مش لوحدي اللي عندي المشاكل دي، عموما لو في حد عنده اي استفسار أنا في الخدمة .

المشاركة الأصلية كتبت بواسطة yoko

شوف شنوري في موضوع الإستيكر ده ولو مكنش معاه هتصرف
وgap إيه الي في البوجيه المفروض إنه ثابت مبيتغيرش لو قصدهم على السن

والله يا يوكو مش عارف ايه موضوع ال Gap ده
و بالنسبة للإستيكر انا معيش نمرة شنوري يا ريت لو حد بديهالي و أنا هكلمه و أشوفه.

المشاركة الأصلية كتبت بواسطة Ghamrawy

يبقى البوجيه مش مظبوط اساسا و مش مطابق لمواصفات و متطلبات منظومة الاشعال الاليكترونى للموتور و كان المفروض يتظبط السن بتاعه قبل ما يركب فى العربية و ده فعلا يعمل ترسبات كربون على السن و على صبابات العادم و فى الشكمان و يخرب البخاخات و يسدها و يسخن العربية و يكتمها و يزود استهلاك البنزين و يعلى صوت العربية و يأخر الدوارة و يبوظ حساسات الشكمان ويسد علبة البيئة و لو طول الموضوع ده كان المفروض يعمل error "miss fire"

حط منظف دورة وقود على تانك بنزين 92 على الاقل و اطلع الطريق الصحراوى و انفخ العربية 150 170 كم/س

غمراوي باشا انت كده قلقتني بجد انا مش عارف اعمل ايه طيب دلوقتي اروحلهم تاني ولا استنى شوية ولا ايه يا ريت بجد تفيدوني انا كده بدات اقلق على العربية، دي اول فرحة زيرو، يا رب استر.