مش عارف اختار اسم للموضوع
بسم الله الرحمن الرحيم
اللهم صل على محمد وعلى آله وصحبه أجمعين
السلام عليكم ورحمة الله وبركاته
طبعا يا جماعة احنا كلنا عارفين ايه اللى بيحصل من وقت ما الشرطة اختفت من الشارع المصرى،،، وطبعا دى نقطة سوداء فى تاريخ الداخلية وسقطة لن ينساها التاريخ ( حلوة سقطة لن ينساها التاريخ دى)
فى طبعا ناس حابة موضوع الفوضى والهرجلة اللى بتحصل،،، وبتستغل موضوع ان الشرطة مبقتش زى الاول
الموضوع ده لسه حاصل من ساعة وقدامى،،،، راجع من الشغل ركبت الميكروباص الجو حر وحاجة تخنق وصلت اكتوبر الحمدلله،، وعند ميدان ماجدة اللى موازى لميدان الحصرى 2 عساكر شرطة موقفين 5 او 6 عيال بتوع الدليفرى،، طبعا معروف ان دول بيمشوا من غير رخص وبيجروا وخلاص بالموتوسيكلات ( من اسبوعين مسكت واحد شرشحته فى الشارع) المهم العساكر بتتكلم بكل احترام فجأة هوب الاقى واد منهم نط من على الموتوسيكل ونزل فى العسكرى ضرب،، العسكرى مسكتش طبعا مسكوا فى بعض الاتنين،،، ايه اللى احنا بقينا فيه ده،،، هى بقت كده يعنى،،، الاشكال دى هى الى بتخلى الناس تقول ادى اللى اخدناه من الثورة،،، ايه الحل؟؟ مش عارف!!! هو كل حاجة بقت قلة ادب وشتيمة واهانة طيب ليه وعلشان ايه؟ يعنى لو ده ظابط مش عسكرى ونزل مسك فيه وكان الظابط طلع الطبنجة وموته ( ماهو الشيطان بيتحكم فى الانسان فى لحظات الغضب) كان ايه اللى هيحصل؟؟ هتقوم الدنيا ومش هتقعد
الشرطة عملت لنا كبت وخلتنا كرهنا حاجة اسمها داخلية،،، بس خلاص لازم نتعلم الالتزام شوية
والله المستعان وربنا يرحمنا برحمته
نسيت حاجة مهمة حد يبقى يختار اسم للموضوع لانى مش لاقى اسم مناسب