تفتكروا ممكن يلغوا السياحه

**Ayman-Ahmed** · 05-05-2011 02:50 AM

المشاركة الأصلية كتبت بواسطة ahmedbatoos

جميلة جدا !!! هي اندونيسيا كلها شفت افلام وثائقية مشاء الله فيها ولايات روعة في الجمال . .

علي كدة شرم الشيخ الي رحتها دية مش نافعة خالص d:

شرم الشيخ ايه بس يا راجل يا طيب.طب روح شوف الجونة فى الغردقة

.

**ashouhdy** · 05-05-2011 03:30 AM

!!!!! اللى بيتكلم عن السياحة كأنها قلة ادب بس يبقى مسافرش ومرحش ومشفش

انا رحت شرم والغردقة سنيييين وكان تحفظى الوحيد على الخمر

طب وهى الخمرة هناك بس ؟؟؟؟؟؟؟؟؟ ما محلات درنكيز فاتحة فى اسكنرية فوق ال 10 فروع و كلها خمرة !! وفى القاهرة متعدش

وفى الفنادق و ديسكوهات الفنادق موجودة

يبقى متجيش تلغى الخمرة من هناك و هنا لأ .... الراجل الدكر الصح هو اللى يمنع دخول الخمور فى البلد كلها مش هناك بس

نيجى بقى على (المايوة)

بصراحة الست الغيرانة متوديش جوزها هناك هههههههههههههه

يعنى برضوا المايوهات هناك بس ؟؟؟ جربت رحت الساحل او السخنة ؟؟؟!!!! ماهو مينفعش نقول للسياح البسوا مايوة شرعى !!! طب فكر فيها كدة ؟؟؟!!! دة فى النوادى ممنوع النزول بغير المايوة

ولا نقولهم فترة نسائية وفترة رجالية ؟؟؟؟؟ ياجماعة الموضوع معقد فوق ما تتخيلوا

واكيد عارفين ان دخل مصر والاقتصاد القومى مش قايم الا على السياحة .... يبقى نمنعهم من دخول البلاد ؟؟؟ ماينفعش ... ماهو برضوا البلد مش مسجد كبير.

نقول سياحة داخلية ؟؟؟؟ ههههههههههههه انا قعدت فى سهل حشيش ييجى 14 يوم كاملين .... مشوفتش حد بيوسخ و يكسر غير المصرى ... ماشوفتش غير اكل على الشاطئ وسندويتشات غير المصرى مشوفتش حد بياخد معاة الشامبو بتاع الفندق غير المصرى....

ياجماعة لسة بدرى قوووووى على السلوكيات ولو الاسعار رخصت وبقت مباحة يبقى توقع شاطىء سيدى بشر ولا ميامى العام او جمصة اخرى فى الغردقة وشرم الشيخ

دة الاجانب بيرموا طافية السجائر جوة طفايات على البحر!!!!!! والمصريين بيرموا الزبالة على الرملة مع العلم انة لو مد ايدة حيحطها فى صندوق الزبالة ....

ماهو ببساطة مينفعش !!!! ولكم دليل فى اى شاطئ مجانى رخيص فى البلد بداية من مطروح الى مويبع
....

**heshamzaky** · 05-05-2011 05:26 AM

نلغى السياحة و نلغى الفلوس الى داخلة البلد و لو الافكار فضلت بالشكل دة الناس مش حا تلاقى تاكل و نرجع 100 سنة للخلف .

**MohaMed_Refaat** · 05-05-2011 05:29 AM

مفيش حاجة اسمها اجانب وسياحة من غير خمرة دة بالنسبة ليهم زى الشاى والقهوة عندنا
طبعا فى جنسيات معينة متاكلهاش وشربها خمرة على راسهم الالمان والسويد والدنمارك دة اللى انا فاكرة

وطبعا انا بتكلم على سياحة الاثار اللى انا شغال فيها انا كذا مرة روحت الغردقة اللى هية سياحة ترفيهية وشوفت بلاوى

اللى بيجوا الاقصر واسوان بيكونوا مختلفين عن اللى بيروحوا الغردقة والجونة وشرم فقط( شارتر على الغردقة) بيكونوا مهتمين بمعرفة اثار البلد وتاريخها وبرضوة المتعة فى كروزة جميلة فى النيل يعنى مش جايين للهلس والشرب بس ومع ذلك لازم بليل بعد العشا فى البار الخمرة تبقى موجودة وانا قابلت كتير من السفير للغنى للفقير وكلهم الخمرة اساسى عندهم مع اختلاف السكير والشريب على خفيف كل واحد وثقافتة......

الحمد الله انا دلوقتى غيرت المجال دة علشان اتعقدت من حكاية فلوسة حراااااااااااام
بس فى ناس خصوصا فى الاقصر واسوان مش متعلمة ومش ينفع تسيب اكل عيشها اللى بقالها سنين شغالة فية ومتعرفش ومفيش اساسا حاجة غيرة ودة راجع لعدم وجود اى مجال اخر فى الصعيد غير السياحة وهى مجال نشط وفلوسة كويسة جدا كمان يا ترى اية الحل للناس دية لو اتلغت السياحة ؟؟؟؟؟؟؟؟؟؟؟؟

معلش سؤال هو مش الضرايب حرام برضوة ؟؟؟؟؟؟؟؟؟
الناس اللى بتقول نلغى الساحة ارجوا انها تجوبنى

**FunnyMickey** · 05-05-2011 05:42 AM

طيب ساعتها نعمل لسعادتهم ايه يعني
نوفر لهم الخمره بقي
عشان نكسب؟
طب ماهي الفلوس ساعتها حتبقي حرام
ومنبقاش نزعل بقي لما ربنا يرزقنا بواحد زي حسني مبارك تاني يسرقنا
ماهو اللي بييجي من الحرام بيروح في حرام

الشيوخ لما قالوا في الفتاوي لما فندق بيبقي فيه خمره حرام اصلا تشتغل فيه حتي لو شغلك في الحسابات مثلا
ده لان المال فيه جزء حرام
يعني جزء من مرتبي حرام
يعني انا بوكل ولادي ومراتي حرام

طب لو بلد بحالها حاكمها موافق علي وجود الخمر والمحرمات دي كلها بدعوي المكسب
طب ماهو البلد رأس مالها حيبقي فيه جزء حرام
وكلنا حتبقي عيشتنا حرام
وتقل البركه من الاكل والرزق
واللي بياخد 1000 مش مكفيينه
واللي ياخد 10 الالاف بردو مش مكفينه

ياسيدي الفاضل مش معني انهم عيشتهم كلها خمره يبقي نوفرها لهم عشان نكسب او اللي بيشتغل في السياحه يشتغل
هات شيخ واسأله الشغل في السياحه حرام ولا حلال حيقولك حرام
ليه
عشان حاجات كتير اوي اوي
ياراجل ده كفايه اوي انك اصلا حرام تقعد مع واحد علي ترابيزه بيشرب خمره وانتا قاعد مبتشربش
عاوز ايه اكتر من كده :)

وزي ما قلنا
مينفعش نتكلم في الفرعيات دي دلوقتي واحنا بلدنا عامله كده
عندنا حاجات كتير اوي لو كبرناها وشغلنا الشباب اللي مش لاقي شغل ده في مصانع بالهبل ممكن تتفتح
ساعتها انتا وغيرك اللي شغالين في السياحه حتفكر الف مره في الحرام والحلال
وحتسيب الحرام طالما فيه الف طريق للحلال
زي ما هما كده لغوا الحجاب من عندهم
ليه ؟
عشان هما مش محتاجين لنا
احنا مش بنمثل لهم اي جزء في اهتمامتهم
من الاخر كده اللي عاجبه يقلع ويقعد عاجبه مش عاجبه الباب يفوت جمل
لما حضرتك بقي اقتصادك يقوي علي مقومات وعوامل اخري غير السياحه

ساعتها بقي اقول الشط ده للسيدات بس
والفنادق عندنا مفيهاش خمره
واللي عاجبه عاجبه واللي مش عاجبه ايييييييييييييييييييييييي يييييه
:)
الله ينور عليك

انما متجيش علي واحد مش لاقي ياكل ودي شغلته ووسط اللي احنا فيه ده واقوله سيبها عشان حرام
بس بقدر الامكان بردو نراعي اننا نبعد عن شبهات الحرام ونتقي الله في شغلنا
وربنا يقدرنا ان شاء الله ويقوي ايماننا ويخلينا نقدر نتقي شبهات الحرام مش الحرام بس

**heshamzaky** · 05-05-2011 03:30 PM

معلش سؤال للأخوة هو لية الناس عندها تخيل أن كلمة سياحة يعنى لازم زجاجة خمر و رقاصة هو السياحة ما تنفعش الا لما نتكلم عن الخمور الى بتقدم و عن صالات القمار .
أمال السياحة الى ممكن تكون مراكب بتمشى فى النيل بها مطاعم دى أية مش سياحة أمال الناس فى نزلة السمان بيأجرو خيل و جمال و بيبيعو ورق بردى للسواح دول أية .
أمال المسارح دى أية أمال البازرات الى بتبيع منتجات زى الجلاليب و الجواكت الجلد دى أية
مش كل دة ينطبق تحت بند سياحة برضو و لا مسكنا فى الخمور و صالة القمار و هو بس كدة و الموضوع دخل فى مواضيع غريبة . و الموضوع تحول ل حلال و حرام من فلوس السياحة مش كل ما سبق دة فلوس داخلة من السياحة برضو و لا دى مش بركة و لا فيها بركة

**ahmedbatoos** · 05-05-2011 03:37 PM

انا مش عارف . . سياحة اية الي كلها متعلقة بلخمرا و القمار !!

انا لو سايح جي عشان يسكر ويلعب قمار ومش جي عشان يشوف البلد وحضارتها ويستفاد واستفيد والله احتقر نفسي لو هو جاي عشان كدة

للعلم مصر من الدول الي بتتعبر بتاجر بلبشر بسبب كثرة البنات الي بيشتغلوا في الدعارة من دول الاتحاد السوفيتي السابق . . مع السياح في مصر . .

عار علينا والله . . . عشان كدة السايح الي بيجي مصر من افقر واحقر سياح الغرب الايطالين والروس !!!

وللأسف السياح اصحاب الدخل العالي و الانفاق الاكبر والمستوي الثقافي والاجتماعي الاكبر الامارات تركيا ماليزيا و غيرة . . احنا الي استقصدنا الشريحة دية عشان كدة لا عدد كبير بيجي فاشلين سياحيا في العدد ولا دخل سياحي بيدخل بسبب الشريحة الي بنستهدفها

**aminibrahim** · 05-05-2011 04:06 PM

[QUOTE=emo_ayman;3873470966]جنسيته ايه ده يا زميل؟

انا ممكن اكون شفت فى عيونهم اننا لينا تاريخ وهما معندهومش او انبهار بعبقرية المصرى القديم بابسط امكانيات عمل عجائب.[/QUا

ايطالي لما بيكون من اصل يهودي ربنا مايوريك

-

-

الموضوع: تفتكروا ممكن يلغوا السياحه

LinkBack

أدوات الموضوع

عرض

-

-

-

المواضيع المتشابهه

تفتكروا ممكن نوصل لكده ؟؟؟

تفتكروا لو حبيت ابيعها ممكن تعمل كام !!

تفتكروا طلمه البنزين ممكن تبوظ من ايه!

ألف تحية لشرطة النجدة(تفتكروا ممكن؟)

تفتكروا ممكن حد يشترى العربية دي

الكلمات الدلالية لهذا الموضوع

المفضلات

المفضلات

ضوابط المشاركة