الموضوع: حد هنا ليه فى رياضة الرماية ؟

المشاركة الأصلية كتبت بواسطة abdallah

انهى نوع من الرماية يا باشا سكيت ولا
ثابت ولا متحرك ولا خرطوش ولا حى ولا رش؟؟
الرماية هى هواية الملوك وهى ليست مجرد حمل سلاح والأطلاق به فىالسلاح له اداب وقوانين
لو حضرتك مبتدىء فى الهواية قدامك حاجة من اتنين
مسدس او بندقية رش وتبتدى تتدرب على اهداف ثابتة من مدى فوق ال 30 متر لو بندقية و 20 لو مسدس ومنصحكش بالمسدس علشان غالبا بيكون غاز
الحل الثانى اسلحة الأيرسوفت ودى ممتازة جدا فى التدريب على المراية وخصوصا فى مدى من 10 الى 20 متر

فى فرق شاسع بين ضغط الهواء والحى سواء فى اسلوب الرماية او فى رد الفعل
امتع انواع الرماية الخرطوش على اطباق السكيت والحى ال 9 مللى

يا باشا أنا لسه ببتدى......يعنى ثابت فى الأول و رش

أنا اللى عاوز أعرفه هو أنواع الأسلحة و الفرق بينهم

المشاركة الأصلية كتبت بواسطة ahmedabutaleb

ياباشا لازم تحدد الاول صيد ولا رماية
لو عايز تتعلم رماية فية فى نادى طلائع الجيش واسمع ان اسعارة رخيصة وكمان فية فرصة انك تكون فى الفريق لو سنك صغير
والرماية تلات انواع فيه الرش والرصاص والخرطوش
واكيد هتبتدى بالرش وبصراحه ووجهة نظر شخصية الرش هوا الامتع لان عايز دقة عالية
ولو هتبتدى انصك خليك فى حاجه نمرة 2 وتكون باور متوسط
وبرده الاير سوفت شغال وكويس ولو عايز اى استفسار ممكن تكلمنى
وبعت لك لينك كده شوفه واقرا المواضيع كلها وان شاء الله هتفيدك

أنا فيه مكان هبتدى فيه إن شاء الله.....لأنى مش فى مصر

و أنا سنى صغير فعلاً........داخل على 34 سنة بس :)

أنا الفكرة كلها من الموضوع أنى أشغل وقت فراغى فى حاجة بحبها....لأنى كان عندى رش رمسيس زمااااااااان و كنت بستعملها لما أسافر البلد بس....و حالياً فكرت أنى أتدرب شوية على موضوع الرماية.

شكراً على اللينك و هبتدى أشوفه بعد ما أسجل إن شاء الله

المشاركة الأصلية كتبت بواسطة heshamzaky

علشان تتعلم رماية القصة مش صعبة لو مش حا تدخل مسابقات يعنى
بداي الطريق و أول السلم اتعلم تضرب ب البندقية الرش بجد بجد دى مدرسة لانك بتتعلم عليها و مفيش أى خطر كبير و بتبتدى مهارتك تكون عالية الاول أهداف ثابتة كبيرة نسبيا و تبتدى تتدرج لغاية ما ممكن جدا توصل أنك من على بعد 10 متر تضرب مسمار متثبت فى لوح خشب مسمار متثبت و باقى المسمار ظاهر طبعا و ممكن تلعب لعبة أنك تولع شمعة و تضرب على النار تطفى الشمعة بالرش يعنى الرشة حا تضرب فى الفتيل بتاع الشمعة ينزل الفتيل على الشمع السائح على الشمعة تطفى النار
لو حا تصطاد مثى عصفورة أم يمامة حا تعرف تضرب أزاى لان الهدف و خصوصا الطيور و هى واقفة على الارض حاجة و هية واقفة على غصن شجرة حاجة و و هية واقفة على أريال أو سلك كهرباء حاجة حا تتعلم كيفية القنص و زاوية الاطلاق الصحيحة بلاممارسة يعنى امتى تضرب فى الرقبة و أمتى تضرب فى الجنب و أمتى تضرب من ناحية الذيل و دة بيبقى لو اليمامة واقفة على سلك كهرباء و المكان مفتوح .
لو أيدك اصبحت متزنة تماما و عاوز تضرب ب طبنجة سواء رش أو حى الفكرة واحدة .
بص طبعا الفرق كبير جدا جدا لان الحى لة رد فعل و صوت عالى فى البداية حا تتخض من الصوت و تلاقى ان الدنيا مش متزبطة بعد فترة حا تتعود عليها
بس الحى دة مشكلة كبيرة دة سلاح قاتل و مش لعبة
لو حا تضرب فى ميدان رماية مفيش أى مشكلة فية ساتر خلف الشكل و مفيش حد واقف خلف الشكل فممكن بتعور و بيارق ((( أعلام ))) محددة أماكن ما يتخطهاش حد . أما لو حا تضرب فى مكان مفتوح دة عاوز خبرة مش غشومية لان الموضوع مش فرح العمدة لازم تبقى فاهم القاعدة بتاعت الاطلاق لان الطلقة بتوصل لمدى بعيد ممكن الى بيضرب يكون بينشن على حاجة و الطلقة عادى ما تجيش فى الشكل الى بيضرب علية و النتيجة طلقة طائشة تصيب شخص بعيد

شكراً على الإفادة يا هشام بك.....أنا هبتدى فى ميدان إن شاء الله

المشاركة الأصلية كتبت بواسطة walidadel

عموما اي استفسار انا موجود وقولى لو حابب نروح نادي الرمايه سوا و نشجع بعض شغال بردوا

شكراً يا باشا......بس أنا مش فى مصر.....إن شاء الله فى واحد أعرفه هنا مصرى برضه بيقولى أنه كان فى منتخب مصر زمان و مصنف جمهورية و كلام كده.....المفروض أنى هروح معاه إن شاء الله.