مغامراتي على الصحراوي مستمرة... وادي الضحايا
امبارح رحت في غارة سريعة على اسكندرية عشان عشوة سمك ورديت الطريق على نص الليل كده
كان معايا أخو مراتي بهوندا سيفيك... العربية دي يا جدعان متعبة... هو ده اللفظ الصح.. يعني الجري وراها مذلة... وهو الصراحة كان بيسيبني اطلع منه عادي عشان اخد الهوا في وشي وهو يتدنجل ورايا... وكنا بنبدل طول الطريق وأصلاً الفردة اللي طالعة اسكندرية وحشة جداً
المغامرات كانت في الراجع... ماشيين 12 ونص وقررنا نوصل القاهرة قبل الحظر... وبدأ الرزع على الطريق
كنا زي ما تقولوا شله لقينا بعض وفضلنا نجري مع بعض لحد القاهرة... لو حد يعرف حد فيهم يقوللي
- كروز
- جين 2 نمرها ملاكي قديمة وفيها زينون عمى من غير عدسات
- ميجان فيها باب نصه لونه احمر وفيها زينون في فانوس واحد ع العالي بس
- هوندا سيفيك
الجري كان هستيري.. يعني كله بيدب رجله... ومفيش لعب غرز.. كنا بنوسع لبعض حتى لو ده معناه انه حد يسقط ورا التاني..
من الثبات... الجين 2 كانت بتتطلع مرتاحة... وبعدين أنا... وبعدين الميجان... الهوندا مكانش بيجري معانا من الثبات عشان معاه بنوته صغيرة رينا يخليهالوا في الكار سيت ورا بس أظن السيفيك تعمل الصح معانا كلنا.... وبعدين أول مرة اخد بالي من اللي بيسموه ال"فلات زون" بتاع العزم... يعني على ال60 كده... الميجان بتطلع من الكل.. والجين 2 بتريح شوية.... على ال100... الكروز بتريح في الرابع شوية ف الجين 2 طلع مني... بس الميجان كان جمبي... والهوندا في ضهري بس هو قاصد يمشي ورانا...
بعد ال100 لحد ال200... الجين 2 نفس الاداء بالظبط... بس التوب سبيد بتاعتها اقل.. يعني قفلنا عدادات.. أنا 205 طلعت منه كتييييير... ف أتخيل انه بتقفل عدادها عند 180... بس ادائها حلو جداً (مع اني تخيلت انه هيخيطني عشان فرق الوزن انا راكب نص مجنزرة بالنسبة له)... الميجان على السرعات كنا بنشوفه تخاطيف كده في المرايات وكان بيحصلنا عند المطبات... بس وصل معانا وسلمنا على بعض بعد البوابات
الكروز قفلت الخامس لحد 190... وخدت السادس.. غيار راحة... التسارع فيه مش شديد... بس وصلت 205
الهوندا بقى وما أدراك... يسيبني لحد ال200 وبعدين ييجي جمبي.. ويطلع!!!!... أكبس وأجيب الخامس... 205 لازق في ضهره.. معرفش كان ممكن هو كمان يكبس ويطلع ويسيبني في الظلام؟ أصل الفيكترا سي من كام شهر عملت كده... بعد ال 205 دي فضل يبعد عني لحد ما راااااااح عن نظري
طبعاً كله خلص الطريق وعلى أول بنزينة.... انا فولت التانك وانا طالع... العداد قاللي 540كم... روحت ورجعت الجري الهستيري ده... والعداد كاتب 120كم تحت.... ف أظن كده استهلاك زوزو أصلي... اه.. وانا رايح الكروز قفلت عدادها والتكييف شغال
احترامااااتي للجين 2 بجد... والميجان احلى ركوبة بس مجابتش معانا جري... وكان فيه لانسر حاول وفشل... وكان فيه رانجلر خاف على بنزينه جري معانا 10 كيلو وهدي... وطبعاً الهوندا سيفيك وحش الوحوش