المشاركة الأصلية كتبت بواسطة khaled_sabry
السلام عليكم و رحمة الله و بركاته
اول موضوع ليا فى قسم الورشه من فتره طوييييله و الحمد لله (لأن ماحصلتشى مشاكل فى العربيه)
وكان اخر موضوع ليا هنا ك كان عن ان مره فى رمضان اللى فات حصل انى مشيت بالعربيه بسرعه و ماكنشى فيه زيت فى الكرونه
وادى ده لصوت الونه فى السرعات الاعلى من 50
المهم اشتريت مانع الونه و صوت الونه انتهى و الحياه ماشيه حلو من ساعتها
فى نفس الوقت اللى حصلت فيها المشاكل دى لاحظت بوش فى الكرونه ( بمعنى انى بسمع صوت خبط الحديد فى بعضه من الكرونه لما بطلع مره واحده بالعربيه )
و نزلت انا تحت العربيه و حركت عامود الكردان بايدي و لاقيته بيتحرك عادى لما تبقى العربيه مموره و بيعمل صوت حبط الحديد بالفعل من الكرونه
روحت للميكانيكي قالى ان ده بالفعل بوش فى الكرونه و مالهوش حل الا انها تتغير ...
بس اللى قالهولى ان ممكن فى المتسقبل الحاله تسوء اكتر من كده و الكرونه تقفش و تقف مره واحده
الكلام ده كان من 6 اشهر تقريبا
و من ساعتها الحاله مستقره ... بس لاحظت ان صوت الونه بيظهر على خفيف من اول 110 او 100 ا و مش بيبقى باين اوى من صوت الهواء اصلا
فياريت حد يأكدلى المعلومه دى ( معلومه ان الكرونه ممكن تقفش مره واحده ) ...لأنى افتكرت الكلام ده و انا على طريق الصعيد الصحراوى و قولت ربنا يستر لأنى بسافر بيها كتير ولو حصل كده فى سكة سفر ممكن العربيه تتقلب